6. сама̄дхисуттаван̣н̣ана̄

6. чхат̣т̣хе нева патхавийам̣ патхавӣсан̃н̃ӣ асса̄ти патхавим̣ а̄рамман̣ам̣ катва̄ патхавӣти евам̣ уппанна̄йа сан̃н̃а̄йа сан̃н̃ӣ на бхавеййа. а̄па̄дӣсупи есева найо. на идхалокети идхалоке уппаджджанакачатуккапан̃чакаджджха̄насан̃н̃а̄йа на сан̃н̃ӣ бхавеййа. на паралокети паралоке уппаджджанакачатуккапан̃чакаджджха̄насан̃н̃а̄йа на сан̃н̃ӣ бхавеййа. сан̃н̃ӣ ча пана асса̄ти атха ча панасса сама̄патти савитаккасама̄паттийева асса̄ти вуччати. етам̣ сантам̣ етам̣ пан̣ӣтанти сантам̣ сантанти аппетва̄ нисиннасса дивасампи читтуппа̄до ‘‘сантам̣ санта’’нтева паваттати, пан̣ӣтам̣ пан̣ӣтанти аппетва̄ нисиннасса дивасампи читтуппа̄до ‘‘пан̣ӣтам̣ пан̣ӣта’’нтева паваттати. йадидам̣ саббасан̇кха̄расаматхоти нибба̄нам̣ нибба̄нанти аппетва̄ нисиннасса дивасампи читтуппа̄до ‘‘нибба̄нам̣ нибба̄на’’нтева паваттатӣти саббампетам̣ пхаласама̄паттисама̄дхим̣ сандха̄йа вуттам̣.