2. адхивуттипадасуттаван̣н̣ана̄

22. дутийе йе те дхамма̄ти йе те дасабалан̃а̄н̣ам̣ саббан̃н̃утан̃н̃а̄н̣адхамма̄. адхивуттипада̄нанти адхивачанапада̄нам̣, кхандха̄йатанадха̄тудхамма̄нанти аттхо. адхивуттийоти хи адхивачана̄ни вуччанти, тесам̣ йе падабхӯта̄ десана̄йа падат̣т̣ха̄натта̄. атӣта̄ буддха̄пи хи ете дхамме катхайим̣су, ана̄гата̄пи етева катхайиссанти. тасма̄ кхандха̄дайо адхивуттипада̄ни на̄ма. тесам̣ адхивуттипада̄нам̣. атха ва̄ бхӯтаматтхам̣ абхибхавитва̄ йатха̄сабха̄вато аггахетва̄ ваттанато адхивуттийоти дит̣т̣хийо вуччанти, адхивуттӣнам̣ пада̄ни адхивуттипада̄ни, дит̣т̣хидӣпака̄ни вачана̄нӣти аттхо. тесам̣ адхивуттипада̄нам̣ дит̣т̣хивоха̄ра̄нам̣. абхин̃н̃а̄ саччхикирийа̄йа̄ти джа̄нитва̄ паччаккхакаран̣аттха̄йа. виса̄радоти н̃а̄н̣асоманассаппатто. таттха̄ти тесу дхаммесу тесам̣ тесам̣ татха̄ татха̄ дхаммам̣ десетунти тесам̣ тесам̣ дит̣т̣хигатика̄нам̣ ва̄ итаресам̣ ва̄ а̄сайам̣ н̃атва̄ татха̄ татха̄ дхаммам̣ десетум̣. хӣнам̣ ва̄ хӣнанти н̃ассатӣти хӣнам̣ ва̄ дхаммам̣ ‘‘хӣно дхаммо’’ти джа̄ниссати. н̃а̄теййанти н̃а̄таббам̣. дат̣т̣хеййанти дат̣т̣хаббам̣. саччхикареййанти саччхика̄таббам̣. таттха таттха йатха̄бхӯтан̃а̄н̣анти тесу тесу дхаммесу йатха̄сабха̄ван̃а̄н̣ам̣. имина̄ саббан̃н̃утан̃н̃а̄н̣ам̣ дассети. евам̣ саббан̃н̃утан̃н̃а̄н̣ам̣ дассетва̄ пуна дасабалан̃а̄н̣ам̣ дассенто дасайима̄нӣтиа̄дима̄ха. дасабалан̃а̄н̣ампи хи таттха таттха йатха̄бхӯтан̃а̄н̣амева̄ти.