5. паччуппанна̄на̄гатава̄ро

169. (ка) йо дуккхасаччам̣ париджа̄на̄ти со самудайасаччам̣ паджахиссатӣти? но.

(кха) йо ва̄ пана самудайасаччам̣ паджахиссати со дуккхасаччам̣ париджа̄на̄тӣти? но.

(ка) йо дуккхасаччам̣ на париджа̄на̄ти со самудайасаччам̣ наппаджахиссатӣти?

йе маггам̣ пат̣илабхиссанти те дуккхасаччам̣ на париджа̄нанти, но ча самудайасаччам̣ наппаджахиссанти. араха̄ йе ча путхуджджана̄ маггам̣ на пат̣илабхиссанти те дуккхасаччан̃ча на париджа̄нанти самудайасаччан̃ча наппаджахиссанти.

(кха) йо ва̄ пана самудайасаччам̣ наппаджахиссати со дуккхасаччам̣ на париджа̄на̄тӣти?

аггамаггасаман̇гӣ самудайасаччам̣ наппаджахиссати, но ча дуккхасаччам̣ на париджа̄на̄ти. араха̄ йе ча путхуджджана̄ маггам̣ на пат̣илабхиссанти те самудайасаччан̃ча наппаджахиссанти дуккхасаччан̃ча на париджа̄нанти.