22. ба̄вӣсатимавагго

(215) 8. абйа̄катакатха̄

901. саббам̣ супинагатасса читтам̣ абйа̄катанти? а̄манта̄. супинантена па̄н̣ам̣ ханеййа̄ти? а̄манта̄. хан̃чи супинантена па̄н̣ам̣ ханеййа, но ча вата ре ваттаббе – ‘‘саббам̣ супинагатасса читтам̣ абйа̄ката’’нти.

супинантена адиннам̣ а̄дийеййа…пе… муса̄ бхан̣еййа, писун̣ам̣ бхан̣еййа, пхарусам̣ бхан̣еййа, сампхам̣ палапеййа, сандхим̣ чхиндеййа, ниллопам̣ хареййа, ека̄га̄рикам̣ кареййа, парипантхе тит̣т̣хеййа, парада̄рам̣ гаччхеййа, га̄магха̄такам̣ кареййа, нигамагха̄такам̣ кареййа, супинантена метхунам̣ дхаммам̣ пат̣исевеййа, супинагатасса асучи муччеййа, супинантена да̄нам̣ дадеййа, чӣварам̣ дадеййа, пин̣д̣апа̄там̣ дадеййа, сена̄санам̣ дадеййа, гила̄напаччайабхесаджджапариккха̄рам̣ дадеййа, кха̄данӣйам̣ дадеййа, бходжанӣйам̣ дадеййа, па̄нӣйам̣ дадеййа, четийам̣ вандеййа, четийе ма̄лам̣ а̄ропеййа, гандхам̣ а̄ропеййа, вилепанам̣ а̄ропеййа…пе… четийам̣ абхидаккхин̣ам̣ кареййа̄ти? а̄манта̄. хан̃чи супинантена четийам̣ абхидаккхин̣ам̣ кареййа, но ча вата ре ваттаббе – ‘‘саббам̣ супинагатасса читтам̣ абйа̄ката’’нти.

902. на ваттаббам̣ – ‘‘саббам̣ супинагатасса читтам̣ абйа̄ката’’нти? а̄манта̄. нану супинагатасса читтам̣ аббоха̄рийам̣ вуттам̣ бхагавата̄ти? а̄манта̄. хан̃чи супинагатасса читтам̣ аббоха̄рийам̣ вуттам̣ бхагавата̄, тена вата ре ваттаббе – ‘‘саббам̣ супинагатасса читтам̣ абйа̄ката’’нти.

абйа̄катакатха̄ нит̣т̣хита̄.