17. саттарасамавагго

(174) 9. на ваттаббам̣ сан̇гхассадиннам̣ махаппхалантикатха̄

797. на ваттаббам̣ – ‘‘сан̇гхасса диннам̣ махаппхала’’нти? а̄манта̄. нану сан̇гхо а̄хунеййо па̄хунеййо даккхин̣еййо ан̃джаликаран̣ӣйо ануттарам̣ пун̃н̃аккхеттам̣ локасса̄ти? а̄манта̄. хан̃чи сан̇гхо а̄хунеййо…пе… ануттарам̣ пун̃н̃аккхеттам̣ локасса, тена вата ре ваттаббе – ‘‘сан̇гхасса диннам̣ махаппхала’’нти.

на ваттаббам̣ – ‘‘сан̇гхасса диннам̣ махаппхала’’нти? а̄манта̄. нану чатта̄ро пурисайуга̄ ат̣т̣ха пурисапуггала̄ даккхин̣еййа̄ вутта̄ бхагавата̄ти? а̄манта̄. хан̃чи чатта̄ро пурисайуга̄ ат̣т̣ха пурисапуггала̄ даккхин̣еййа̄ вутта̄ бхагавата̄, тена вата ре ваттаббе – ‘‘сан̇гхасса диннам̣ махаппхала’’нти.

798. на ваттаббам̣ – ‘‘сан̇гхасса диннам̣ махаппхала’’нти? а̄манта̄. нану вуттам̣ бхагавата̄ – ‘‘сан̇гхе, готами, дехи, сан̇гхе те динне ахан̃чева пӯджито бхависса̄ми сан̇гхо ча̄’’ти [ма. ни. 3.376]. аттхева суттантоти? а̄манта̄. тена хи сан̇гхасса диннам̣ махаппхаланти.

на ваттаббам̣ – ‘‘сан̇гхасса диннам̣ махаппхала’’нти? а̄манта̄. нану сакко дева̄наминдо бхагавантам̣ етадавоча –

‘‘йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, каттха диннам̣ махаппхаланти.

‘‘чатта̄ро ча пат̣ипанна̄, чатта̄ро ча пхале т̣хита̄;

еса сан̇гхо уджубхӯто, пан̃н̃а̄сӣласама̄хито.

‘‘йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, сан̇гхе диннам̣ махаппхала’’нти [сам̣. ни. 1.262; ви. ва. 642, 751].

‘‘есо хи сан̇гхо випуло махаггато,

есаппамеййо удадхӣва са̄гаро;

ете хи сет̣т̣ха̄ наравӣраса̄вака̄ [нарасӣхаса̄вака̄ (ка.)],

пабхан̇кара̄ дхаммамудӣрайанти.

‘‘тесам̣ судиннам̣ сухутам̣ суйит̣т̣хам̣,

йе сан̇гхамуддисса даданти да̄нам̣;

са̄ даккхин̣а̄ сан̇гхагата̄ патит̣т̣хита̄,

махаппхала̄ локавидӯна ван̣н̣ита̄.

‘‘ета̄дисам̣ йан̃н̃амануссаранта̄,

йе ведаджа̄та̄ вичаранти [вихаранти (сӣ. ка.)] локе;

винеййа маччхерамалам̣ самӯлам̣,

аниндита̄ саггамупенти т̣ха̄на’’нти [ви. ва. 645, 754].

аттхева суттантоти? а̄манта̄. тена хи сан̇гхасса диннам̣ махаппхаланти.

на ваттаббам̣ сан̇гхасса диннам̣ махаппхалантикатха̄ нит̣т̣хита̄.