17. саттарасамавагго

(175) 10. на ваттаббам̣ буддхассадиннам̣ махаппхалантикатха̄

799. на ваттаббам̣ – ‘‘буддхасса диннам̣ махаппхала’’нти? а̄манта̄. нану бхагава̄ двипада̄нам̣ агго, двипада̄нам̣ сет̣т̣хо, двипада̄нам̣ памоккхо, двипада̄нам̣ уттамо, двипада̄нам̣ паваро асамо асамасамо аппат̣исамо аппат̣ибха̄го аппат̣ипуггалоти? а̄манта̄. хан̃чи бхагава̄ двипада̄нам̣ агго, двипада̄нам̣ сет̣т̣хо, двипада̄нам̣ памоккхо, двипада̄нам̣ уттамо, двипада̄нам̣ паваро асамо асамасамо аппат̣исамо аппат̣ибха̄го аппат̣ипуггало, тена вата ре ваттаббе – ‘‘буддхасса диннам̣ махаппхала’’нти.

на ваттаббам̣ – ‘‘буддхасса диннам̣ махаппхала’’нти? а̄манта̄. аттхи кочи буддхена самасамо – сӣлена сама̄дхина̄ пан̃н̃а̄йа̄ти? наттхи. хан̃чи наттхи кочи буддхена самасамо – сӣлена сама̄дхина̄ пан̃н̃а̄йа, тена вата ре ваттаббе – ‘‘буддхасса диннам̣ махаппхала’’нти.

на ваттаббам̣ – ‘‘буддхасса диннам̣ махаппхала’’нти? а̄манта̄. нану вуттам̣ бхагавата̄ –

‘‘найимасмим̣ ва̄ локе парасмим̣ ва̄ пана,

буддхена сет̣т̣хо ча само ча виджджати;

йама̄хунеййа̄нам̣ аггатам̣ гато,

пун̃н̃аттхика̄нам̣ випулаппхалесина’’нти [ви. ва. 1047].

аттхева суттантоти? а̄манта̄. тена хи буддхасса диннам̣ махаппхаланти.

на ваттаббам̣ буддхасса диннам̣ махаппхалантикатха̄ нит̣т̣хита̄.