(90) 7. витакка̄нупатитакатха̄

562. саббам̣ читтам̣ витакка̄нупатитанти? а̄манта̄. саббам̣ читтам̣ вича̄ра̄нупатитам̣ пӣта̄нупатитам̣ сукха̄нупатитам̣ дуккха̄нупатитам̣ соманасса̄нупатитам̣ доманасса̄нупатитам̣ упеккха̄нупатитам̣ саддха̄нупатитам̣ вӣрийа̄нупатитам̣ сата̄нупатитам̣ сама̄дха̄нупатитам̣ пан̃н̃а̄нупатитам̣ ра̄га̄нупатитам̣ доса̄нупатитам̣…пе… аноттаппа̄нупатитанти? на хевам̣ ваттаббе…пе….

саббам̣ читтам̣ витакка̄нупатитанти? а̄манта̄. нану аттхи авитакко вича̄раматто сама̄дхӣти? а̄манта̄. хан̃чи аттхи авитакко вича̄раматто сама̄дхи, но ча вата ре ваттаббе – ‘‘саббам̣ читтам̣ витакка̄нупатита’’нти.

саббам̣ читтам̣ витакка̄нупатитанти? а̄манта̄. нану аттхи авитакко авича̄ро сама̄дхӣти? а̄манта̄. хан̃чи аттхи авитакко авича̄ро сама̄дхи, но ча вата ре ваттаббе – ‘‘саббам̣ читтам̣ витакка̄нупатита’’нти. саббам̣ читтам̣ витакка̄нупатитанти? а̄манта̄. нану тайо сама̄дхӣ вутта̄ бхагавата̄ – савитакко савича̄ро сама̄дхи, авитакко вича̄раматто сама̄дхи, авитакко авича̄ро сама̄дхӣти [дӣ. ни. 3.305, 353]? а̄манта̄. хан̃чи тайо сама̄дхӣ вутта̄ бхагавата̄ – савитакко савича̄ро сама̄дхи, авитакко вича̄раматто сама̄дхи, авитакко авича̄ро сама̄дхи, но ча вата ре ваттаббе – ‘‘саббам̣ читтам̣ витакка̄нупатита’’нти.

витакка̄нупатитакатха̄ нит̣т̣хита̄.