6. сена̄санаккхандхака

пуччха̄ – пан̃ча а̄вусо лен̣а̄ни бхагавата̄ каттха анун̃н̃а̄та̄ни, кам̣ а̄раббха кисмим̣ ваттхусмим̣ анун̃н̃а̄та̄ни.

виссаджджана̄ – ра̄джагахе бханте самбахуле бхиккхӯ а̄раббха анун̃н̃а̄та̄ни, самбахула̄ бханте бхиккхӯ бхагавантам̣ упасан̇камитва̄ етадавочум̣ ‘‘ра̄джагахако бханте сет̣т̣хӣ виха̄ре ка̄ра̄петука̄мо, катхам̣ ну кхо бханте пат̣ипаджджитабба’’нти, тасмим̣ бханте ваттхусмим̣ анун̃н̃а̄та̄ни.

пуччха̄ – катхам̣ а̄вусо виха̄ра̄ пат̣хамам̣ уппанна̄, катхан̃ча те патит̣т̣ха̄пи та̄.

виссаджджана̄ – ека̄хенева бханте ра̄джагахакена сет̣т̣хина̄ чхат̣т̣хивиха̄ра̄ патит̣т̣ха̄пита̄, те идха бханте сат̣т̣хивиха̄ра̄ буддхаппамукхасса а̄гата̄на̄гатасса ча̄туддисасса сан̇гхасса патит̣т̣ха̄пита̄.

пуччха̄ – виха̄ре а̄вусо пат̣ибха̄накаммам̣ пат̣иккхипитва̄ ма̄ла̄камма̄дӣни бхагавата̄ каттха анун̃н̃а̄та̄ни, кам̣ а̄раббха кисмим̣ ваттхусмим̣ анун̃н̃а̄та̄ни.

виссаджджана̄ – ра̄джагахе бханте чхаббаггийе бхиккхӯ а̄раббха анун̃н̃а̄та̄ни. чхаббаггийа̄ бханте бхиккхӯ виха̄ре пат̣ибха̄начиттам̣ ка̄ра̄песум̣ иттхирӯпакам̣ пурисарӯпакам̣, тасмим̣ бханте ваттхусмим̣ анун̃н̃а̄та̄ни.

пуччха̄ – йатха̄вуд̣д̣хам̣ а̄вусо абхива̄дана̄дӣни ча агга̄сана̄дӣни ча ануджа̄нитва̄ сан̇гхикам̣ йатха̄вуд̣д̣хам̣ пат̣иба̄хантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – антара̄ ча бханте веса̄лим̣ антара̄ ча са̄ваттхим̣ чхаббаггийа̄нам̣ бхиккхӯнам̣ антева̄сике бхиккхӯ а̄раббха пан̃н̃аттам̣, чхаббаггийа̄нам̣ бханте бхиккхӯнам̣ антева̄сика̄ бхиккхӯ буддхаппамукхасса сан̇гхасса пурато пурато гантва̄ виха̄ре пат̣иггахесум̣, сеййа̄йо пат̣иггахесум̣ ‘‘идам̣ амха̄кам̣ упаджджха̄йа̄нам̣ бхависсати, идам̣ амха̄кам̣ а̄чарийа̄нам̣ бхависсати, идам̣ амха̄кам̣ бхависсатӣ’’ти, тасмим̣ бханте ваттхусмим̣ пан̃н̃аттам̣.

пуччха̄ – екена а̄вусо две пат̣иба̄хантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – са̄ваттхийам̣ бханте а̄йасмантам̣ упанандам̣ сакйапуттам̣ а̄раббха пан̃н̃аттам̣, а̄йасма̄ бханте упанандо сакйапутто еко две пат̣иба̄хи, тасмим̣ бханте ваттхусмим̣ пан̃н̃аттам̣.

пуччха̄ – навакена а̄вусо уддисантена самаке ва̄ а̄сане нисӣдитум̣ уччатаре ва̄ дхаммага̄равена, тхерена пана бхиккхуна̄ уддиса̄пентена самаке ва̄ а̄сане нисӣдитум̣ нӣчатаре ва̄ дхаммага̄равена бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте самбахуле бхиккхӯ а̄раббха анун̃н̃а̄там̣, самбахула̄ бханте бхиккхӯ а̄йасмато упа̄лисса сантике винайам̣ парийа̄пун̣им̣су, а̄йасма̄ бханте упа̄ли т̣хитакова уддисати тхера̄нам̣ бхиккхӯнам̣ га̄равена, таттха бханте тхера̄ чева бхиккхӯ киламим̣су а̄йасма̄ ча упа̄ли килами, тасмим̣ бханте ваттхусмим̣ анун̃н̃а̄там̣.

пуччха̄ – тивассантарена а̄вусо саха нисӣдитум̣ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте самбахуле бхиккхӯ а̄раббха анун̃н̃а̄там̣, самбахула̄нам̣ бханте бхиккхӯнам̣ етадахоси ‘‘китта̄вата̄ну кхо сама̄на̄санико хотӣ’’ти, тасмим̣ бханте ваттхусмим̣ анун̃н̃а̄там̣.

пуччха̄ – ман̃че ча а̄вусо пӣт̣хе ча двиннам̣йева нисӣдитум̣ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте самбахуле сама̄на̄санике а̄раббха пан̃н̃аттам̣, самбахула̄ бханте бхиккхӯ сама̄на̄саника̄ ман̃че нисӣдитва̄ ман̃чам̣ бхиндим̣су, пӣт̣хе нисӣдитва̄ пӣт̣хам̣ бхиндим̣су, тасмим̣ бханте ваттхусмим̣ анун̃н̃а̄там̣.

пуччха̄ – дӣгха̄сане пана̄вусо асама̄на̄саникехипи нисӣдитум̣ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте самбахуле бхиккхӯ а̄раббха анун̃н̃а̄там̣, самбахула̄ бханте бхиккхӯ дӣгха̄сане асама̄на̄саникехи саха нисӣдитум̣ куккучча̄йим̣су, тасмим̣ бханте ваттхусмим̣ анун̃н̃а̄там̣.

пуччха̄ – пан̃ча а̄вусо ависсаджджийа̄ни бхагавата̄ каттха пан̃н̃атта̄ни, кам̣ а̄раббха кисмим̣ ваттхусмим̣ пан̃н̃атта̄ни.

виссаджджана̄ – са̄ваттхийам̣ бханте самбахуле бхиккхӯ а̄раббха пан̃н̃атта̄ни, самбахула̄ бханте бхиккхӯ сан̇гхикам̣ сена̄санам̣ виссаджджесум̣, тасмим̣ бханте ваттхусмим̣ пан̃н̃аттам̣.

пуччха̄ – пан̃ча а̄вусо авебхан̇гийа̄ни бхагавата̄ каттха пан̃н̃атта̄ни, кам̣ а̄раббха кисмим̣ ваттхусмим̣ пан̃н̃атта̄ни.

виссаджджана̄ – кӣт̣а̄гирисмим̣ бханте ассаджипунаббасуке бхиккхӯ а̄раббха пан̃н̃атта̄ни, ассаджипунаббасука̄ бханте бхиккхӯ сан̇гхикам̣ сена̄санам̣ вибхаджим̣су, тасмим̣ бханте ваттхусмим̣ пан̃н̃атта̄ни.

пуччха̄ – ан̃н̃атра парибхогам̣ а̄вусо ан̃н̃атра парибхун̃джантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – а̄л̣авийам̣ бханте самбахуле бхиккхӯ а̄раббха пан̃н̃аттам̣, самбахула̄ бханте бхиккхӯ ан̃н̃атарасса упа̄сакасса виха̄рапарибхогам̣ сена̄санам̣ ан̃н̃атра парибхун̃джим̣су, тасмим̣ бханте ваттхусмим̣ пан̃н̃аттам̣.

пуччха̄ – адхотехи ча а̄вусо аллехи ча па̄дехи сена̄санам̣ аккамантасса ча саупа̄ханена сена̄санам̣ аккамантасса ча дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – а̄л̣авийам̣ бханте самбахуле бхиккхӯ а̄раббха пан̃н̃аттам̣, самбахула̄ бханте бхиккхӯ адхотехи па̄дехи сена̄санам̣ аккамим̣су, аллехи ча па̄дехи сена̄санам̣ аккамим̣су, саупа̄хана̄пи сена̄санам̣ аккамим̣су, сена̄санам̣ дусси, тасмим̣ бханте ваттхусмим̣ пан̃н̃аттам̣.

пуччха̄ – парикаммаката̄йа а̄вусо бхӯмийа̄ нит̣т̣хубхантасса ча парикаммакатам̣ бхиттим̣ апассайантасса ча дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – а̄л̣авийам̣ бханте самбахулева бхиккхӯ а̄раббха пан̃н̃аттам̣, самбахула̄ бханте бхиккхӯ парикаммаката̄йа бхӯмийа̄ нит̣т̣хубхим̣су, парикаммакатам̣ бхиттим̣ апассайим̣су, тасмим̣ бханте ваттхусмим̣ пан̃н̃аттам̣.

пуччха̄ – сена̄санаккхандхакам̣ пуччхиссам̣, санида̄нам̣ саниддесам̣. самуккат̣т̣хапада̄нам̣ а̄вусо кати а̄паттийо.

виссаджджана̄ – сена̄санаккхандхакам̣ виссаджджиссам̣, санида̄нам̣ саниддесам̣. самуккат̣т̣хапада̄нам̣ бханте тиссо а̄паттийо.