2. упосатхаккхандхака

пуччха̄ – ча̄туддасе ча а̄вусо паннарасе ча паккхасса ча ат̣т̣хамийа̄ саннипатитва̄ дхаммам̣ бха̄ситум̣ бхагавата̄ каттха анун̃н̃а̄там̣, кисмим̣ ваттхусмим̣ анун̃н̃а̄там̣.

виссаджджана̄ – ра̄джагахе бханте самбахуле бхиккхӯ а̄раббха анун̃н̃а̄та̄, самбахула̄ бханте бхиккхӯ ча̄туддеса паннарасе ат̣т̣хамийа̄ ча паккхасса саннипатитва̄ тун̣хӣ нисӣдим̣су, тасмим̣ бханте ваттхусмим̣ анун̃н̃а̄та̄.

ануджа̄на̄ми бхиккхаве ча̄туддасе паннарасе ат̣т̣хамийа̄ ча паккхасса саннипатитум̣.

нану на̄ма саннипатитехи дхаммо бха̄ситаббо.

пуччха̄ – када̄ а̄вусо бхиккхӯнам̣ па̄тимоккхуддесо бхагавата̄ анун̃н̃а̄то.

виссаджджана̄ – йада̄ бханте бхагавато рахогатасса пат̣исаллӣнасса евам̣ четасо паривитакко удапа̄ди ‘‘йам̣нӯна̄хам̣ йа̄ни майа̄ бхиккхӯнам̣ пан̃н̃атта̄ни сиккха̄пада̄ни, та̄ни несам̣ па̄тимоккхуддесам̣ ануджа̄неййам̣, со несам̣ бхависсати упосатхакамма’’нти тада̄ бханте бхагавата̄ бхиккхӯнам̣ па̄тимоккхуддесо анун̃н̃а̄то.

пуччха̄ – сӣмам̣ а̄вусо самманитум̣ бхагавата̄ каттха анун̃н̃а̄там̣, кисмин̃ча ваттхусмим̣ анун̃н̃а̄там̣.

виссаджджана̄ – ра̄джагахе бханте анун̃н̃а̄там̣, ра̄джагахе бханте бхагавати вихарати бхиккхӯнам̣ етадахоси ‘‘бхагавата̄ пан̃н̃аттам̣ етта̄вата̄ са̄маггӣ, йа̄вата̄ ека̄ва̄соти китта̄вата̄нукхо ека̄ва̄со хотӣ’’ти, тасмим̣ бханте ваттхусмим̣ анун̃н̃а̄там̣.

пуччха̄ – кати а̄вусо упосатха̄ дивасавасена ча ка̄ракапуггалавасена ча ка̄табба̄ка̄равасена ча.

виссаджджана̄ – дивасавасена бханте тайо упосатха̄, пуггалавасена ча бханте тайо упосатха̄, ка̄табба̄ка̄равасена ча бханте тайо упосатха̄.

пуччха̄ – кати а̄вусо упосатхакамма̄ни тесу ча кӣдисам̣ упосатхакаммам̣ бхагавата̄ анун̃н̃а̄там̣, кӣдисам̣ ананун̃н̃а̄там̣.

виссаджджана̄ – чатта̄рима̄ни бханте упосатхакамма̄ни, адхаммена ваггам̣ упосатхакаммам̣, адхаммена самаггам̣ упосатхакаммам̣, дхаммена ваггам̣ упосатхакаммам̣, дхаммена самаггам̣ упосатхакаммам̣. татра бханте йадидам̣ адхаммена ваггам̣ упосатхакаммам̣, адхаммена самаггам̣ упосатхакаммам̣ дхаммена ваггам̣ упосатхакаммам̣, еварӯпам̣ бханте упосатхакаммам̣ ананун̃н̃а̄там̣, татра бханте йадидам̣ дхаммена самаггам̣ упосатхакаммам̣, еварӯпам̣ бханте упосатхакаммам̣ анун̃н̃а̄там̣.

пуччха̄ – упосатхам̣ пуччхиссам̣, санида̄нам̣ саниддесам̣. самуккат̣т̣хапада̄нам̣ а̄вусо кати а̄паттийо.

виссаджджана̄ – упосатхам̣ виссаджджиссам̣, санида̄нам̣ саниддесам̣. самуккат̣т̣хапада̄нам̣ бханте тиссо а̄паттийо.