1. рӯпа̄дивагга

пуччха̄ – екаканипа̄тепи а̄вусо рӯпа̄дивагго нӣваран̣аппаха̄навагго акамманийавагготиа̄дина̄ ваггабхедавасена бахувидха̄. таттха катарам̣ ваггам̣ пат̣хамам̣ сам̣га̄йим̣су.

виссаджджана̄ – екаканипа̄те бханте рӯпа̄дивагго нӣваран̣аппаха̄навагготиа̄дина̄ вӣсатийа̄ ваггесу рӯпа̄диваггам̣ пат̣хамам̣ сам̣га̄йим̣су.

пуччха̄ – са̄дху са̄дху а̄вусо, майампи да̄ни а̄вусо татойева пат̣т̣ха̄йа сам̣га̄ханаттха̄йа сам̣гӣтипуббан̇гама̄ни дхаммапуччханависсаджджанакичча̄ни а̄вахитум̣ сама̄рабха̄ма. тена̄вусо бхагавата̄ джа̄ната̄ пассата̄ арахата̄ самма̄самбуддхена ан̇гуттараника̄йе екаканипа̄те рӯпа̄дивагге пурима̄ни пан̃ча сутта̄ни каттха кам̣ а̄раббха катхан̃ча бха̄сита̄ни.

виссаджджана̄ – са̄ваттхийам̣ бханте самбахуле бхиккхӯ а̄раббха рӯпа̄дигарука̄нам̣ пан̃чаннам̣ пуриса̄нам̣ аджджха̄сайавасена ‘‘на̄хам̣ бхиккхаве ан̃н̃ам̣ екарӯпампи саманупасса̄ми, йам̣ евам̣ пурисасса читтам̣ парийа̄да̄йа тит̣т̣хати, йатхайидам̣ бхиккхаве иттхирӯпам̣, иттхирӯпам̣ бхиккхаве пурисасса читтам̣ парийа̄да̄йа тит̣т̣хатӣ’’ти евама̄дина̄ бхагавата̄ бха̄сита̄ни.

на̄хам̣ бхиккхаве ан̃н̃ам̣ екарӯпампи саманупасса̄ми, йам̣ евам̣ пурисасса читтам̣ парийа̄да̄йа тит̣т̣хати, йатхайидам̣ бхиккхаве иттхирӯпам̣, иттхирӯпам̣ бхиккхаве пурисасса читтам̣ парийа̄да̄йа тит̣т̣хати.

пуччха̄ – таттхева а̄вусо паччхима̄ни пан̃ча сутта̄ни бхагавата̄ каттха кам̣ а̄раббха катхан̃ча бха̄сита̄ни.

виссаджджана̄ – тасмим̣йева бханте са̄ваттхийам̣ самбахуле бхиккхӯ а̄раббха рӯпа̄дигарука̄нам̣ пан̃чаннам̣ иттхӣнам̣ аджджха̄сайавасена ‘‘на̄хам̣ бхиккхаве ан̃н̃ам̣ екарӯпампи саманупасса̄ми, йам̣ евам̣ иттхийа̄ читтам̣ парийа̄да̄йа тит̣т̣хати, йатхайидам̣ бхиккхаве пурисарӯпам̣, пурисарӯпам̣ бхиккхаве иттхийа̄ читтам̣ парийа̄да̄йа тит̣т̣хатӣ’’ти евама̄дина̄ бхагавата̄ бха̄сита̄ни.

на̄хам̣ бхиккхаве ан̃н̃ам̣ екарӯпампи саманупасса̄ми, йам̣ евам̣ иттхийа̄ читтам̣ парийа̄да̄йа тит̣т̣хати, йатхайидам̣ бхиккхаве пурисарӯпам̣, пурисарӯпам̣ бхиккхаве иттхийа̄ читтам̣ парийа̄да̄йа тит̣т̣хати.

нӣтаттхавасена, неййаттхавасена

пуччха̄ – имасмим̣ а̄вусо рӯпа̄дивагге бхагавата̄ нӣтаттхавасена ким̣ катхитам̣, неййаттхавасена пана ким̣ н̃а̄питам̣.

виссаджджана̄ – имасмим̣ бханте рӯпа̄дивагге бхагавата̄ нӣтаттхавасена ват̣т̣ам̣ катхитам̣. неййаттхавасена пана виват̣т̣ампи н̃а̄питам̣.