7. ан̃н̃аман̃н̃апаччайо

сахаджа̄тапаччайе вибхаттесу дхаммесу йо йо паччайа дхаммоти вутто, со со ева идха паччайадхаммо чева паччайуппанна дхаммо ча хоти. саббепи читтачетасика̄ дхамма̄ ан̃н̃аман̃н̃асса паччайадхамма̄ ча хонти ан̃н̃аман̃н̃асса паччайуппаннадхамма̄. сахаджа̄та̄ чатта̄ро маха̄бхӯта̄ ан̃н̃аман̃н̃асса паччайадхамма̄ ча хонти ан̃н̃аман̃н̃асса паччайуппаннадхамма̄ ча. пат̣исандхина̄маккхандха̄ ча пат̣исандхи сахаджа̄там̣ хадайаваттхурӯпан̃ча ан̃н̃аман̃н̃асса паччайадхамма̄ ча хонти ан̃н̃аман̃н̃асса паччайуппаннадхамма̄ ча. аттхо сувин̃н̃еййойева.

йатха̄ ан̃н̃аман̃н̃ам̣ нисса̄йа усса̄пита̄ тайо дан̣д̣а̄ ан̃н̃аман̃н̃асса ниссайа̄ ча хонти, ан̃н̃аман̃н̃ам̣ ниссита̄ ча. тесу екамекасмим̣ уссите саббе уссита̄ хонти, екамекасмим̣ патанте саббе патанти. евам̣ ан̃н̃аман̃н̃адхамма̄ ча дат̣т̣хабба̄.

еттха вадеййум̣, саббе четасика̄ дхамма̄ читтапаччайам̣ алабха ма̄на̄ уппаджджитум̣ на сакконтӣти йуттам̣. касма̄. пхусана̄дӣнам̣ четасика кичча̄нам̣ виджа̄нанакиччапуббан̇гаматта̄, манопуббан̇гама̄ти хи вуттам̣. читтам̣ пана четасикапаччайам̣ алабхама̄нам̣ уппаджджитум̣ на саккотӣти на йуджджеййа̄ти. вуччате, четасикадхамма̄ на̄ма читтасса саха̄йан̇га̄ни хонти. тасма̄ техи вина̄ читтампи уппаджджитум̣ на саккотийева. есева найо чатӯсу маха̄бхӯтесупӣти. упа̄да̄рӯпа̄ни пана маха̄бхӯта̄нам̣ ниссандаматтатта̄ саха̄йан̇га̄ни на хонтӣти. нану а̄ха̄рарӯпан̃ча джӣвитарӯпан̃ча паччайависесатта̄ саха̄йан̇гам̣ хотӣти. вуччате, т̣хитийа̄ ева саха̄йан̇гам̣ хоти. на уппа̄де. идха пана уппа̄де саха̄йан̇гам̣ адхиппетанти. ан̃н̃аман̃н̃апаччайадӣпана̄ нит̣т̣хита̄.