2. а̄рамман̣апаччайо

катамо а̄рамман̣апаччайо. саббепи читтачетасика̄ дхамма̄ саббепи рӯпадхамма̄ саббам̣пи нибба̄нам̣ сабба̄пи пан̃н̃аттийо а̄рамман̣а паччайо. на хи со на̄ма екопи дхаммо аттхи, йо читта четасика̄нам̣ а̄рамман̣ам̣ на хоти. сан̇кхепато пана а̄рамман̣ам̣ чхаббидхам̣ хоти рӯпа̄рамман̣ам̣ садда̄рамман̣ам̣ гандха̄рамман̣ам̣ раса̄рамман̣ам̣ пхот̣т̣хабба̄рамман̣ам̣ дхамма̄рамман̣анти.

катаме дхамма̄ а̄рамман̣апаччайасса паччайуппанна̄. саббепи читта четасика̄дхамма̄ а̄рамман̣апаччайасса паччайуппанна̄. на хи кин̃чи читтам̣ на̄ма аттхи, йам̣ читтам̣ бхӯтена ва̄ абхӯтена ва̄ а̄рамман̣ена вина̄ паваттати.

таттха паччуппаннам̣ рӯпа̄рамман̣ам̣ дувидхасса чаккхувин̃н̃а̄н̣ачиттасса а̄рамман̣апаччайо. паччуппаннам̣ садда̄рамман̣ам̣ дувидхасса сотавин̃н̃а̄н̣а читтасса. паччуппаннам̣ гандха̄рамман̣ам̣ дувидхасса гха̄навин̃н̃а̄н̣ачиттасса. паччуппаннам̣ раса̄рамман̣ам̣ дувидхасса дживха̄вин̃н̃а̄н̣ачиттасса. паччуппаннам̣ тивидхам̣ пхот̣т̣хабба̄рамман̣ам̣ дувидхасса ка̄йавин̃н̃а̄н̣ачиттасса. паччуппанна̄ни та̄ни пан̃ча̄рамман̣а̄ни тивидхасса манодха̄тучиттасса а̄рамман̣апаччайо. сабба̄ни та̄ни атӣта̄на̄гатапаччуппанна̄ни пан̃ча̄рамман̣а̄ни ва̄ сабба̄ни тека̄лика̄ни ка̄лавимутта̄ни дхамма̄рамман̣а̄ни ва̄ чха саттативидха̄нам̣ мановин̃н̃а̄н̣ачитта̄нам̣ йатха̄рахам̣ а̄рамман̣апаччайо.

кенат̣т̣хена а̄рамман̣ам̣, кенат̣т̣хена паччайоти. читта четасикехи а̄ламбитаббат̣т̣хена а̄рамман̣ам̣, упака̄ракат̣т̣хена паччайоти.

а̄ламбитаббат̣т̣хена̄ти четтха а̄ламбан̣акирийа̄ на̄ма читта четасика̄нам̣ а̄рамман̣аггахан̣акирийа̄, а̄рамман̣упа̄да̄на кирийа̄.

йатха̄ хи локе айодха̄тум̣ ка̄мети иччхатӣти аттхена айокантако на̄ма лохадха̄тувисесо аттхи. со айокхандхасамӣпам̣ сампатто там̣ айокхандхам̣ ка̄менто вийа иччханто вийа айокхандха̄бхимукхо чан̃чалати. сайам̣ ва̄ там̣ айокхандхам̣ упагаччхати. айокхандхам̣ ва̄ атта̄бхимукхам̣ а̄кад̣д̣хати, айокхандхо тадабхимукхо чан̃чалати, там̣ ва̄ упагаччхати. айам̣ айокантакасса а̄ламбан̣акирийа̄ на̄ма. евамева читтачетасика̄нам̣ а̄рамман̣есу а̄ламбан̣акирийа̄ дат̣т̣хабба̄. на кевалам̣ а̄рамман̣есу а̄ламбан̣а маттам̣ хоти. атха кхо читтачетасика̄ дхамма̄ саттасанта̄не уппаджджама̄на̄ чхасу два̄ресу а̄рамман̣а̄нам̣ а̄па̄та̄гамане ева кхан̣е кхан̣е уппаджджанти. уппаджджитва̄ ча кхан̣е кхан̣е нируджджханти.

йатха̄ там̣ бхеритале бхерисадда̄ уппаджджама̄на̄ таттха таттха хаттхена пахаран̣ака̄ле ева кхан̣е кхан̣е уппаджджанти, уппаджджитва̄ ча кхан̣е кхан̣е нируджджханти. вӣн̣а̄садда̄ уппаджджама̄на̄ вӣн̣а̄тантӣсу таттха таттха вӣн̣а̄дантакена пахаран̣ака̄ле ева кхан̣е кхан̣е уппаджджанти, уппаджджитва̄ ча кхан̣е кхан̣е нируджджхантӣти. нидда̄йантасса бхаван̇гачиттаппаватти ка̄лепи пуббабхаве маран̣а̄саннака̄ле чхасу два̄ресу а̄па̄та ма̄гата̄ни камма камманимитта гатинимитта̄ни ева бхаван̇гачитта̄нам̣ а̄рамман̣апаччайоти. а̄рамман̣апаччайадӣпана̄ нит̣т̣хита̄.