17. джха̄напаччайо

сатта джха̄нан̇га̄ни джха̄напаччайо, витакко вича̄ро пӣти соманассам̣ доманассам̣ упеккха̄ екаггата̄. техи сахаджа̄та̄ пан̃чавин̃н̃а̄н̣аваджджита̄ читтачетасикадхамма̄ ча рӯпадхамма̄ ча тасса паччайуппанна̄.

кенат̣т̣хена джха̄нанти. упаниджджха̄йанат̣т̣хена джха̄нам̣. упаниджджха̄йа нат̣т̣хена̄ти ча манаса̄ а̄рамман̣ам̣ упагантва̄ ниджджха̄йанат̣т̣хена пеккханат̣т̣хена. йатха̄ хи исса̄со дӯре т̣хатва̄ кхуддаке лаккхаман̣д̣але сарам̣ павесенто хаттхехи сарам̣ уджукан̃ча ниччалан̃ча катва̄ ман̣д̣алан̃ча вибхӯтам̣ катва̄ чаккхуна̄ ниджджха̄йанто павесети. евамева имехи ан̇гехи читтам̣ уджукан̃ча ниччалан̃ча катва̄ а̄рамман̣ан̃ча вибхӯтам̣ катва̄ ниджджха̄йанто пуггало упаниджджха̄йатӣти вуччати. евам̣ упаниджджха̄йитва̄ йам̣кин̃чи ка̄йакаммам̣ ва̄ вачӣкаммам̣ ва̄ манокаммам̣ ва̄ каронто авираджджхама̄но кароти.

таттха ка̄йакаммам̣ на̄ма абхиккамаппат̣иккама̄дикам̣ вуччати. вачӣкаммам̣ на̄ма аккхараван̣н̣апарипун̣н̣ам̣ вачӣбхедакаран̣ам̣ вуччати. манокаммам̣ на̄ма йам̣кин̃чи манаса̄ а̄рамман̣авибха̄ванам̣ вуччати. да̄накаммам̣ ва̄ па̄н̣а̄типа̄та каммам̣ ва̄ анурӯпехи джха̄нан̇гехи вина̄ дуббалена читтена ка̄тум̣ на сакка̄ хоти. еса найо сесесу кусала̄кусала каммесӯти.

айан̃ча аттхо витакка̄дӣнам̣ джха̄нан̇гадхамма̄нам̣ висум̣ висум̣ сабха̄ва лаккхан̣ехи дӣпетаббо. сампайуттадхамме а̄рамман̣а̄бхиниропана лаккхан̣о витакко, со читтам̣ а̄рамман̣е дал̣хам̣ нийоджети. а̄рамман̣а̄нумаджджаналаккхан̣о вича̄ро, со читтам̣ а̄рамман̣е дал̣хам̣ сам̣йоджети. а̄рамман̣асампийа̄йаналаккхан̣а̄пӣти, са̄ читтам̣ а̄рамман̣е паритут̣т̣хам̣ кароти. тиссопи ведана̄ а̄рамман̣араса̄ну бхаваналаккхан̣а̄, та̄пи читтам̣ а̄рамман̣е ит̣т̣ха̄нит̣т̣хамаджджхаттараса̄нубхавана киччена дал̣хаппат̣ибаддхам̣ каронти. сама̄дха̄налаккхан̣а̄ екаггата̄, са̄пи читтам̣ а̄рамман̣е ниччалам̣ катва̄ т̣хапетӣти. джха̄напаччайадӣпана̄ нит̣т̣хита̄.