12. а̄севанапаччайо
два̄даса акусалачитта̄ни саттараса локийакусала читта̄ни а̄ваджджанадвайаваджджита̄ни ат̣т̣ха̄расакирийачитта̄нӣти сатта чатта̄лӣсам̣ локийаджаваначитта̄ни а̄севанапаччайо. тесу нирантараппаваттам̣ джаванасантатим̣ патва̄ пуримам̣ пуримам̣ джаваначиттам̣ а̄севана паччайо. чатӯхи маггачиттехи паччхимам̣ паччхимам̣ читтам̣ а̄севанапаччайуппаннам̣.
кенат̣т̣хена а̄севананти. упарӯпарипагун̣абха̄вавад̣д̣ханаттхам̣тха̄ма балавад̣д̣ханаттхан̃ча парива̄сагга̄ха̄панат̣т̣хена.
таттха пагун̣абха̄воти пунаппунам̣ саджджха̄йитасса па̄л̣ипа̄т̣хасса сукхена паваттанам̣ вийа джаванат̣т̣ха̄наджаванакиччасан̇кха̄те т̣ха̄накиччависесе паччхима паччхимачиттасса сукхена паваттанам̣. парива̄со на̄ма косеййаваттхам̣ пунаппунам̣ сугандхена парива̄санам̣ вийа читтасанта̄не пунаппуннам̣ раджджанадуссана̄дина̄ ва̄ араджджана адуссана̄дина̄ ва̄ парива̄санам̣. пуримасмим̣ джаваначитте нируддхепи тасса джаванавего на нируджджхати, паччхимам̣ читтасанта̄нам̣ пхарама̄но паваттатийева. тасма̄ паччхимам̣ паччхимам̣ джаваначиттам̣ уппаджджама̄нам̣ тена вегена паггахитам̣ балаватарам̣ хутва̄ уппаджджати. евам̣ пуримачиттам̣ аттано парива̄сам̣ паччхимачиттам̣ ган̣ха̄пети. паччхиман̃ча читтам̣ пуримасса читтасса парива̄сам̣ гахетва̄ паваттати. евам̣ сантепи со а̄севанавего пакатийа̄ саттахи читтава̄рехи париккхайам̣ гаччхати, тато парам̣ тада̄рамман̣авипа̄ка читтам̣ ва̄ уппаджджати, бхаван̇га читтава̄ро ва̄ паваттати.
идха суттанта̄севанапаччайопи ваттаббо. сатипат̣т̣ха̄нам̣ бха̄вети, саммаппадха̄нам̣ бха̄вети, сатисамбоджджхан̇гам̣ бха̄вети, дхамма вичайасамбоджджхан̇гам̣ бха̄вети, самма̄дит̣т̣хим̣ бха̄вети, самма̄сан̇каппам̣ бха̄ветӣтиа̄дина̄ бахӯсу т̣ха̄несу вутто. таттха бха̄ветӣти екам̣пи дивасам̣ бха̄вети, саттапи диваса̄ни бха̄вети, екам̣пи ма̄сам̣ бха̄вети, саттапи ма̄са̄ни бха̄вети, екам̣пи сам̣ваччхарам̣ бха̄вети, саттапи сам̣ваччхара̄ни бха̄ветӣти аттхо.
пуримапуримесу бхавесу а̄севита̄ни бха̄вита̄ни бахулӣ ката̄ни кусала̄ни ва̄ акусала̄ни ва̄ паччхимапаччхимесу бхавесу балаватара̄нам̣ кусала̄нам̣ ва̄ акусала̄нам̣ ва̄ уппаттийа̄ а̄севана паччайо.
ка̄лантаре ва̄ бхавантаре ва̄ та̄диса̄нам̣ кусала̄кусала̄нам̣ уппаттийа̄ паччайо упаниссайапаччайо на̄ма. тесам̣йева балаватараттха̄йа паччайо а̄севанапаччайо на̄ма.
локепи махантесу читтабха̄вана̄каммесу ва̄ча̄ бха̄вана̄каммесу ка̄йабха̄вана̄каммесу ан̇гапаччан̇габха̄вана̄каммесу камма̄йатанасиппа̄йатанавиджджа̄т̣ха̄несу ча а̄севана̄ бха̄вана̄ бахулӣкамма̄нам̣ ниссандагун̣а̄ на̄ма сандиссантийева.
саббесам̣ кхан̣икадхамма̄нам̣ маджджхе еварӯпасса а̄севана паччайасса виджджама̄натта̄ пурисабалапурисатха̄ма̄нам̣ упарӯпари вад̣д̣хана васена чирака̄лам̣ паваттита̄ни пурисакамма̄ни ниппхаттим̣ па̄пун̣анти, саббан̃н̃убуддхабха̄вам̣пи гаччханти. а̄севанапаччайадӣпана̄ нит̣т̣хита̄.