намо тасса бхагавато арахато самма̄самбуддхасса

намакка̄рапа̄л̣и

1. сугатам̣ сугатам̣ сет̣т̣хам̣, кусалам̣кусалам̣ джахам̣;

аматам̣ аматам̣ сантам̣, асамам̣ асамам̣ дадам̣.

саран̣ам̣ саран̣ам̣ локам̣, аран̣ам̣ аран̣ам̣ карам̣;

абхайам̣ абхайам̣ т̣ха̄нам̣, на̄йакам̣ на̄йакам̣ наме.

2. найанасубхагака̄йан̇гам̣,

мадхураварасаропетам̣;

амитагун̣аган̣а̄дха̄рам̣,

дасабаламатулам̣ ванде.

3. йо буддхо дхитима̄н̃н̃адха̄рако,

сам̣са̄ре анубхоси ка̄йикам̣;

дуккхам̣ четасикан̃ча локато,

там̣ ванде нарадеваман̇галам̣.

4. ба̄ттим̣сатилаккхан̣ачитрадехам̣,

дехаджджутиниггатападжджалантам̣;

пан̃н̃а̄дхитисӣлагун̣огхавиндам̣,

ванде мунимантимаджа̄тийуттам̣.

5. па̄тодайам̣ ба̄ладива̄карам̣ва,

маджджхе йатӣнам̣ лалитам̣ сирӣхи;

пун̣н̣индусан̇ка̄самукхам̣ анеджам̣,

ванда̄ми саббан̃н̃умахам̣ муниндам̣.

6. упетапун̃н̃о варабодхимӯле,

сасенама̄рам̣ сугато джинитва̄;

абоджджхи бодхим̣ арун̣одайамхи,

нама̄ми там̣ ма̄раджинам̣ абхан̇гам̣.

7. ра̄га̄дичхеда̄малан̃а̄н̣акхаггам̣,

сатӣсаман̃н̃а̄пхалака̄бхига̄хам̣;

сӣлогхалан̇ка̄равибхӯситам̣ там̣,

нама̄мибхин̃н̃а̄варамиддхупетам̣.

8. дайа̄лайам̣ саббадхи дуккарам̣ карам̣,

бхаван̣н̣ава̄тиккамамаггатам̣ гатам̣;

тилокана̄тхам̣ сусама̄хитам̣ хитам̣,

самантачаккхум̣ пан̣ама̄ми там̣митам̣.

9. тахим̣ тахим̣ па̄рамисан̃чайам̣ чайам̣,

гатам̣ гатам̣ саббхи сукхаппадам̣ падам̣;

нара̄нара̄нам̣ сукхасамбхавам̣ бхавам̣,

нама̄нама̄нам̣ джинапун̇гавам̣ гавам̣.

10. магган̇гана̄вам̣ мунидаккхана̄вико,

ӣха̄пхийам̣ н̃а̄н̣акарена га̄хако;

а̄руйха йо та̄йа бахӯ бхаван̣н̣ава̄,

та̄реси там̣ буддхамагхаппахам̣ наме.

11. саматим̣сатипа̄рамисамбхаран̣ам̣,

варабодхидуме чатусаччадасам̣;

варамиддхигатам̣ нарадевахитам̣,

тибхавӯпасамам̣ пан̣ама̄ми джинам̣.

12. сатапун̃н̃аджалаккхан̣икам̣ вираджам̣,

гаганӯпамадхим̣ дхитимерусамам̣;

джаладжӯпамасӣталасӣлайутам̣,

патхавӣсаханам̣ пан̣ама̄ми джинам̣.

13. йо буддхо сумати диве дива̄карова,

собханто ратиджанане сила̄санамхи;

а̄сӣно сивасукхадам̣ адеси дхаммам̣,

дева̄нам̣ тамасадисам̣ нама̄ми ниччам̣.

14. йо па̄дапан̇каджамудутталара̄джикехи,

локехи тӣхивикалехи нира̄кулехи;

сампа̄пун̣е нирупамеййатамева на̄тхо,

там̣ саббалокамахитам̣ асамам̣ нама̄ми.

15. буддхам̣ нара̄нарасамосаран̣ам̣ дхитаттам̣,

пан̃н̃а̄падӣпаджутийа̄ вихатандхака̄рам̣;

аттха̄бхика̄манарадевахита̄вахам̣ там̣,

ванда̄ми ка̄рун̣икамаггаманантан̃а̄н̣ам̣.

16. акхилагун̣анидха̄но йо муниндопагантва̄,

ванамисипатанавхам̣ сан̃н̃ата̄нам̣ никетам̣;

тахимакусалачхедам̣ дхаммачаккам̣ паватто,

таматуламабхикантам̣ ванданеййам̣ нама̄ми.

17. сучипарива̄ритам̣ суручираппабха̄хи раттам̣,

сиривисара̄лайам̣ гупитаминдрийехупетам̣;

рависасиман̣д̣алаппабхутилаккхан̣опачиттам̣,

суранарапӯджитам̣ сугатама̄дарам̣ нама̄ми.

18. маггол̣умпена мухапат̣игха̄са̄диуллолавӣчим̣,

сам̣са̄рогхам̣ тари тамабхайам̣ па̄рапаттам̣ паджа̄нам̣;

та̄н̣ам̣ лен̣ам̣ асамасаран̣ам̣ екатиттхам̣ патит̣т̣хам̣,

пун̃н̃аккхеттам̣ парамасукхадам̣ дхаммара̄джам̣ нама̄ми.

19. кан̣д̣амбам̣мӯле парахитакаро йо муниндо нисинно,

аччхерам̣ сӣгхам̣ найанасубхагам̣ а̄кулан̣н̣аггиджа̄лам̣;

дуджджа̄ладдхам̣сам̣ мунибхиджахитам̣ па̄т̣ихерам̣ ака̄си,

ванде там̣ сет̣т̣хам̣ парамаратиджам̣ иддхидхаммехупетам̣.

20. муниндакко йвеко дайудайарун̣о н̃а̄н̣авиттхин̣н̣абимбо,

винеййаппа̄н̣огхам̣ камалакатхитам̣ дхаммарам̣сӣварехи;

субодхесӣ суддхе тибхавакухаре бйа̄питаккиттинан̃ча,

тилокекаччаккхум̣ дукхамасаханам̣ там̣ махесим̣ нама̄ми.

21. йо джино анекаджа̄тийам̣ сапуттада̄раман̇гаджӣвитампи,

бодхипемато алаггама̄насо ада̄сийева аттхикасса;

да̄напа̄рамим̣ тато парам̣ апӯри сӣлапа̄рама̄дикампи,

та̄самиддхийопайа̄тамаггатам̣ тамекадӣпакам̣ нама̄ми.

22. дева̄дева̄тидевам̣ нидханавапудхарам̣ ма̄рабхан̇гам̣ абхан̇гам̣,

дӣпам̣ дӣпам̣ паджа̄нам̣ джайаварасайане бодхипаттам̣дхипаттам̣;

брахма̄брахма̄гата̄нам̣ варагиракатхикам̣ па̄пахӣнам̣ пахӣнам̣,

лока̄лока̄бхира̄мам̣ сататамабхинаме там̣ муниндам̣ муниндам̣.

23. буддхо нигродхабимбо мудукарачаран̣о брахмагхосен̣иджан̇гхо,

косаччха̄дан̇гаджа̄то пунарапи сугато суппатит̣т̣хитапа̄до;

мӯдода̄тун̣н̣аломо атхамапи сугато брахмуджуггаттабха̄во,

нӣлаккхӣ дӣгхапан̣хӣ сукхумамалачхавӣ тхомйарасаггасаггӣ.

24. чатта̄лӣсаггаданто самакалапанаджо антарам̣саппапӣно,

чаккенан̇китапа̄до авирал̣адасано ма̄раджуссан̇кхапа̄до.

тит̣т̣ханто нонамантобхайакарамудуна̄ джан̣н̣ука̄на̄масанто,

ват̣т̣аккхандхо джино готарун̣апакхумако сӣхапуббад̣д̣хака̄йо.

25. саттаппӣно ча дӣгхан̇гули матха сугато ломакӯпекаломо,

сампаннода̄тада̄т̣хо канакасаматачо нӣламуддхаггаломо.

самбуддхо тхӯладживхо атха сӣхахануко джа̄ликаппа̄дахаттхо,

на̄тхо ун̣хӣсасӣсо итигун̣асахитам̣ там̣ махесим̣ нама̄ми.

26. буддхобуддхотигхосо атидулабхатаро ка̄ катха̄ буддхабха̄во,

локе тасма̄ вибха̄вӣ вивидхахитасукхам̣ са̄дхаво паттхайанта̄.

ит̣т̣хам̣ аттхам̣ вахантам̣ суранарамахитам̣ ниббхайам̣ даккхин̣еййам̣,

лока̄нам̣ нандивад̣д̣хам̣ дасабаламасамам̣ там̣ намассанту ниччам̣.

27. пун̃н̃енетена сохам̣ нипун̣амати сато сампара̄йе ча титто,

даккхо дит̣т̣худжджупан̃н̃о авикалавӣрийо бхогава̄ сам̣вибха̄гӣ.

тиккхо сӯро дхитатто сапарахитачаро дӣгхаджӣвӣ арого,

дхан̃н̃о ван̣н̣о йасассӣ атибалавадхаро киттима̄ кхантупето.

28. саддхо да̄тан̇гупето парамасиридхаро дит̣т̣хадхамме виратто,

ладжджӣ калйа̄н̣амитто абхиратакусало пан̃часӣла̄дираккхо.

аппиччхо аппакодхо ативуджухадайо иддхима̄ аппамеййо,

па̄сам̣со пемава̄чо суджанагун̣авидӯ ма̄мако со бхавеййам̣.

29. иттхам̣ асан̇кхайе на̄тха, гун̣е лаккхан̣адӣпите;

га̄тха̄су сӯчака̄свека, га̄тхампи сарате будхо.

30. чатура̄па̄йамутто со, са̄дхакаттхадвайасса ча;

хатӯпаддаваджа̄ло ча, ла̄бхӣ хитасукхасса ча.

31. адхипо нарадева̄нам̣, чатудӣписсаропи ва̄;

бхавеййа антиме дехе, таман̃н̃ам̣ сетачхаттакам̣.

32. бха̄вана̄йа̄нама̄руйха, самамессати суббато;

имасмим̣ аттабха̄вепи, арого дӣгхаджӣвико.

33. пӯджито саббалокехи, бха̄вана̄бхиратӣмано;

джанаппийо мана̄по ча, ка̄ катха̄кхиладха̄ран̣е.

намакка̄рапа̄л̣и нит̣т̣хита̄.

намакка̄рат̣ӣка̄

намо тасса бхагавато арахато самма̄самбуддхасса

1. сугатантйа̄диван̣н̣ехи, пасаттхан̃ча сукхаддадам̣;

ванданта̄нам̣ джинам̣ натва̄, дхаммам̣ суддхам̣ ган̣уттамам̣.

2. намакка̄рам̣ хитаттхӣхи, пора̄н̣а̄чарийехи ча;

ликхитва̄ т̣хапитам̣ пун̃н̃а, буддхийа̄ тена вандинам̣.

3. тассаттхаван̣н̣анам̣ кассам̣, гамбхӣраттхасубодханам̣;

мовипуна̄мена сантена, сӣлупетена йа̄чито.

4. ван̣н̣антопи ча тассаттхам̣, там̣ там̣ ат̣т̣хакатха̄дису;

вуттан̃а̄йена касса̄ми, саддха̄ сун̣а̄тха са̄дхаво.

5. наманам̣ наматӣтӣ ва̄, наматӣ тена ва̄ намо;

тасса ка̄ронти та̄хӣти, намакка̄роти вуччати.

6. тан̃ча буддхагхоса̄чари, йена пуббасутам̣ катам̣;

буддхагхосуппаттийан̃ча, там̣ там̣ пана катха̄дису.

7. на дит̣т̣хам̣ катака̄ран̣ам̣, тасма̄ хитаттхикехи ча;

пора̄н̣а̄чарийехӣ ча, т̣хапитанти майа̄ вуттам̣;

там̣ ка̄ран̣ам̣ вин̃н̃ӯхӣ ча, вича̄ретва̄ виджа̄нитанти.

1. сугатам̣ сугатам̣ сет̣т̣хам̣, кусалам̣кусалам̣ джахам̣;

аматам̣ аматам̣ сантам̣, асамам̣ асамам̣ дадам̣.

саран̣ам̣ саран̣ам̣ локам̣, аран̣ам̣ аран̣ам̣ карам̣;

абхайам̣ абхайам̣ т̣ха̄нам̣, на̄йакам̣ на̄йакам̣ наме.

1. [ка] ида̄ни пат̣хамам̣ та̄ва сугатантйа̄дӣхи ат̣т̣ха̄расахи гун̣ехи тхометва̄ буддхасса вандитука̄мена сугатантиа̄ди га̄тха̄двайам̣ а̄раддхам̣. айам̣ пана саббапа̄да̄дийамакапатхйа̄ ваттага̄тха̄ти дат̣т̣хаббам̣. там̣ пана йамакам̣ субодха̄лан̇ка̄ре килит̣т̣хадосанти вуттам̣.

вуттан̃хи таттха –

‘‘йам̣ килит̣т̣хападам̣ манда̄, бхидхеййам̣ йамака̄дикам̣;

килит̣т̣хапададосева, тампи анто карӣйатӣ’’ти.