10. четасовинибандхасуттам̣

72. ‘‘пан̃чиме, бхиккхаве, четасовинибандха̄ [четовинибаддха̄ (са̄раттхадӣпанӣт̣ӣка̄) а. ни. 5.206; дӣ. ни. 3.320]. катаме пан̃ча? идха, бхиккхаве, бхиккху ка̄месу авӣтара̄го хоти авигатаччхандо авигатапемо авигатапипа̄со авигатапарил̣а̄хо авигататан̣хо. йо со, бхиккхаве, бхиккху ка̄месу авӣтара̄го хоти авигатаччхандо авигатапемо авигатапипа̄со авигатапарил̣а̄хо авигататан̣хо, тасса читтам̣ на намати а̄таппа̄йа ануйога̄йа са̄тачча̄йа падха̄на̄йа. йасса читтам̣ на намати а̄таппа̄йа ануйога̄йа са̄тачча̄йа падха̄на̄йа, айам̣ пат̣хамо четасовинибандхо.

‘‘пуна чапарам̣, бхиккхаве, бхиккху ка̄йе авӣтара̄го хоти…пе… рӯпе авӣтара̄го хоти… йа̄вадаттхам̣ удара̄вадехакам̣ бхун̃джитва̄ сеййасукхам̣ пассасукхам̣ миддхасукхам̣ ануйутто вихарати … ан̃н̃атарам̣ деваника̄йам̣ пан̣идха̄йа брахмачарийам̣ чарати – ‘имина̄хам̣ сӣлена ва̄ ватена ва̄ тапена ва̄ брахмачарийена ва̄ дево ва̄ бхависса̄ми деван̃н̃атаро ва̄’ти. йо со, бхиккхаве, бхиккху ан̃н̃атарам̣ деваника̄йам̣ пан̣идха̄йа брахмачарийам̣ чарати – ‘имина̄хам̣ сӣлена ва̄ ватена ва̄ тапена ва̄ брахмачарийена ва̄ дево ва̄ бхависса̄ми деван̃н̃атаро ва̄’ти, тасса читтам̣ на намати а̄таппа̄йа ануйога̄йа са̄тачча̄йа падха̄на̄йа. йасса читтам̣ на намати а̄таппа̄йа ануйога̄йа са̄тачча̄йа падха̄на̄йа, айам̣ пан̃чамо четасовинибандхо. име кхо, бхиккхаве, пан̃ча четасовинибандха̄.

‘‘имесам̣ кхо, бхиккхаве, пан̃чаннам̣ четасовинибандха̄нам̣ паха̄на̄йа чатта̄ро сатипат̣т̣ха̄на̄ бха̄ветабба̄. катаме чатта̄ро? идха, бхиккхаве, бхиккху ка̄йе ка̄йа̄нупассӣ вихарати а̄та̄пӣ сампаджа̄но сатима̄ винеййа локе абхиджджха̄доманассам̣; ведана̄су…пе… читте…пе… дхаммесу дхамма̄нупассӣ вихарати а̄та̄пӣ сампаджа̄но сатима̄ винеййа локе абхиджджха̄доманассам̣. имесам̣ кхо, бхиккхаве, пан̃чаннам̣ четасовинибандха̄нам̣ паха̄на̄йа име чатта̄ро сатипат̣т̣ха̄на̄ бха̄ветабба̄’’ти. дасамам̣.

сатипат̣т̣ха̄навагго дутийо.