1. сиккха̄дуббалйасуттам̣

63. ‘‘пан̃чима̄ни, бхиккхаве, сиккха̄дуббалйа̄ни. катама̄ни пан̃ча? па̄н̣а̄типа̄то, адинна̄да̄нам̣, ка̄месумиччха̄ча̄ро, муса̄ва̄до, сура̄мерайамаджджапама̄дат̣т̣ха̄нам̣ – има̄ни кхо, бхиккхаве, пан̃ча сиккха̄дуббалйа̄ни.

‘‘имесам̣ кхо, бхиккхаве, пан̃чаннам̣ сиккха̄дуббалйа̄нам̣ паха̄на̄йа чатта̄ро сатипат̣т̣ха̄на̄ бха̄ветабба̄. катаме чатта̄ро? идха, бхиккхаве, бхиккху ка̄йе ка̄йа̄нупассӣ вихарати а̄та̄пӣ сампаджа̄но сатима̄ винеййа локе абхиджджха̄доманассам̣; ведана̄су…пе… читте…пе… дхаммесу дхамма̄нупассӣ вихарати а̄та̄пӣ сампаджа̄но сатима̄ винеййа локе абхиджджха̄доманассам̣. имесам̣ кхо, бхиккхаве, пан̃чаннам̣ сиккха̄дуббалйа̄нам̣ паха̄на̄йа име чатта̄ро сатипат̣т̣ха̄на̄ бха̄ветабба̄’’ти. пат̣хамам̣.