5. саман̣асуттам̣

85. ‘‘‘саман̣о’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘бра̄хман̣о’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘ведагӯ’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘бхисакко’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘ниммало’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘вимало’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘н̃а̄н̣ӣ’ти, бхиккхаве, татха̄гатассетам̣ адхивачанам̣ арахато самма̄самбуддхасса. ‘вимутто’ти, бхиккхаве, татха̄гатассетам̣ адхивачанам̣ арахато самма̄самбуддхасса̄’’ти.

‘‘йам̣ саман̣ена паттаббам̣, бра̄хман̣ена вусӣмата̄;

йам̣ ведагуна̄ паттаббам̣, бхисаккена ануттарам̣.

‘‘йам̣ ниммалена паттаббам̣, вималена сучӣмата̄;

йам̣ н̃а̄н̣ина̄ ча паттаббам̣, вимуттена ануттарам̣.

‘‘сохам̣ виджитасан̇га̄мо, мутто мочеми бандхана̄;

на̄гомхи парамаданто, асекхо париниббуто’’ти. пан̃чамам̣;