3. сам̣кхиттасуттам̣

63. атха кхо ан̃н̃атаро бхиккху йена бхагава̄ тенупасан̇ками…пе… екамантам̣ нисинно кхо со бхиккху бхагавантам̣ етадавоча – ‘‘са̄дху ме, бханте, бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. ‘‘евамевам̣ панидхекачче могхапуриса̄ маман̃н̃ева аджджхесанти. дхамме ча бха̄сите маман̃н̃ева анубандхитаббам̣ ман̃н̃антӣ’’ти. ‘‘десету ме, бханте, бхагава̄ сам̣кхиттена дхаммам̣, десету сугато сам̣кхиттена дхаммам̣. аппева на̄ма̄хам̣ бхагавато бха̄ситасса аттхам̣ а̄джа̄неййам̣, аппева на̄ма̄хам̣ бхагавато бха̄ситасса да̄йа̄до асса’’нти. ‘‘тасма̄тиха те, бхиккху евам̣ сиккхитаббам̣ – ‘аджджхаттам̣ ме читтам̣ т̣хитам̣ бхависсати сусан̣т̣хитам̣, на ча уппанна̄ па̄пака̄ акусала̄ дхамма̄ читтам̣ парийа̄да̄йа т̣хассантӣ’ти. еван̃хи те, бхиккху, сиккхитаббам̣’’.

‘‘йато кхо те, бхиккху, аджджхаттам̣ читтам̣ т̣хитам̣ хоти сусан̣т̣хитам̣, на ча уппанна̄ па̄пака̄ акусала̄ дхамма̄ читтам̣ парийа̄да̄йа тит̣т̣ханти, тато те, бхиккху, евам̣ сиккхитаббам̣ – ‘метта̄ ме четовимутти бха̄вита̄ бхависсати бахулӣката̄ йа̄нӣката̄ ваттхуката̄ анут̣т̣хита̄ паричита̄ сусама̄раддха̄’ти. еван̃хи те, бхиккху, сиккхитаббам̣.

‘‘йато кхо те, бхиккху, айам̣ сама̄дхи евам̣ бха̄вито хоти бахулӣкато, тато твам̣, бхиккху, имам̣ сама̄дхим̣ савитаккампи савича̄рам̣ [савитаккасавича̄рампи (ка.)] бха̄веййа̄си, авитаккампи вича̄раматтам̣ [авитаккавича̄раматтампи (ка.) висуддхи. 1.271 пасситаббам̣] бха̄веййа̄си, авитаккампи авича̄рам̣ [авитаккаавича̄рампи (ка.)] бха̄веййа̄си, саппӣтикампи бха̄веййа̄си, ниппӣтикампи бха̄веййа̄си, са̄тасахагатампи бха̄веййа̄си, упеккха̄сахагатампи бха̄веййа̄си.

‘‘йато кхо, те бхиккху, айам̣ сама̄дхи евам̣ бха̄вито хоти субха̄вито, тато те, бхиккху, евам̣ сиккхитаббам̣ – ‘карун̣а̄ ме четовимутти… мудита̄ ме четовимутти… упеккха̄ ме четовимутти бха̄вита̄ бхависсати бахулӣката̄ йа̄нӣката̄ ваттхуката̄ анут̣т̣хита̄ паричита̄ сусама̄раддха̄’ти. еван̃хи те, бхиккху, сиккхитаббам̣.

‘‘йато кхо те, бхиккху, айам̣ сама̄дхи евам̣ бха̄вито хоти субха̄вито, тато твам̣, бхиккху, имам̣ сама̄дхим̣ савитаккасавича̄рампи бха̄веййа̄си, авитаккавича̄раматтампи бха̄веййа̄си, авитаккаавича̄рампи бха̄веййа̄си, саппӣтикампи бха̄веййа̄си, ниппӣтикампи бха̄веййа̄си, са̄тасахагатампи бха̄веййа̄си, упеккха̄сахагатампи бха̄веййа̄си.

‘‘йато кхо те, бхиккху, айам̣ сама̄дхи евам̣ бха̄вито хоти субха̄вито, тато те, бхиккху, евам̣ сиккхитаббам̣ – ‘ка̄йе ка̄йа̄нупассӣ вихарисса̄ми а̄та̄пӣ сампаджа̄но сатима̄, винеййа локе абхиджджха̄доманасса’нти. еван̃хи те, бхиккху, сиккхитаббам̣.

‘‘йато кхо те, бхиккху, айам̣ сама̄дхи евам̣ бха̄вито хоти бахулӣкато, тато твам̣, бхиккху, имам̣ сама̄дхим̣ савитаккасавича̄рампи бха̄веййа̄си, авитаккавича̄раматтампи бха̄веййа̄си, авитаккаавича̄рампи бха̄веййа̄си, саппӣтикампи бха̄веййа̄си, ниппӣтикампи бха̄веййа̄си, са̄тасахагатампи бха̄веййа̄си, упеккха̄сахагатампи бха̄веййа̄си.

‘‘йато кхо те, бхиккху, айам̣ сама̄дхи евам̣ бха̄вито хоти субха̄вито, тато те, бхиккху, евам̣ сиккхитаббам̣ – ‘ведана̄су ведана̄нупассӣ вихарисса̄ми а̄та̄пӣ сампаджа̄но сатима̄, винеййа локе абхиджджха̄доманасса’нти; читте читта̄нупассӣ вихарисса̄ми а̄та̄пӣ сампаджа̄но сатима̄, винеййа локе абхиджджха̄доманасса’нти; дхаммесу дхамма̄нупассӣ вихарисса̄ми а̄та̄пӣ сампаджа̄но сатима̄, винеййа локе абхиджджха̄доманасса’нти. еван̃хи те, бхиккху, сиккхитаббам̣.

‘‘йато кхо те, бхиккху, айам̣ сама̄дхи евам̣ бха̄вито хоти субха̄вито, тато твам̣, бхиккху, йена йенева гаггхаси пха̄сум̣йева гаггхаси, йаттха йаттха т̣хассаси пха̄сум̣йева т̣хассаси, йаттха йаттха нисӣдиссаси пха̄сум̣йева нисӣдиссаси, йаттха йаттха сеййам̣ каппессаси пха̄сум̣йева сеййам̣ каппессасӣ’’ти.

атха кхо со бхиккху бхагавата̄ имина̄ ова̄дена овадито ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо со бхиккху еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти, тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана со бхиккху арахатам̣ ахосӣти. татийам̣.