4. ва̄сет̣т̣хасуттам̣

44. екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо ва̄сет̣т̣хо упа̄сако йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ва̄сет̣т̣хам̣ упа̄сакам̣ бхагава̄ етадавоча – ‘‘ат̣т̣хан̇гасаманна̄гато, ва̄сет̣т̣ха, упосатхо упавуттхо махаппхало хоти…пе… аниндита̄ саггамупенти т̣ха̄на’’нти.

евам̣ вутте ва̄сет̣т̣хо упа̄сако бхагавантам̣ етадавоча – ‘‘пийа̄ ме, бханте, н̃а̄тиса̄лохита̄ ат̣т̣хан̇гасаманна̄гатам̣ упосатхам̣ упавасеййум̣, пийа̄нампи ме асса н̃а̄тиса̄лохита̄нам̣ дӣгхараттам̣ хита̄йа сукха̄йа. саббе чепи, бханте, кхаттийа̄ ат̣т̣хан̇гасаманна̄гатам̣ упосатхам̣ упавасеййум̣, саббесамписса кхаттийа̄нам̣ дӣгхараттам̣ хита̄йа сукха̄йа. саббе чепи, бханте, бра̄хман̣а̄…пе… весса̄ … судда̄ ат̣т̣хан̇гасаманна̄гатам̣ упосатхам̣ упавасеййум̣, саббесамписса судда̄нам̣ дӣгхараттам̣ хита̄йа сукха̄йа̄’’ти.

‘‘еваметам̣, ва̄сет̣т̣ха, еваметам̣, ва̄сет̣т̣ха! саббе чепи, ва̄сет̣т̣ха, кхаттийа̄ ат̣т̣хан̇гасаманна̄гатам̣ упосатхам̣ упавасеййум̣, саббесамписса кхаттийа̄нам̣ дӣгхараттам̣ хита̄йа сукха̄йа. саббе чепи, ва̄сет̣т̣ха, бра̄хман̣а̄…пе… весса̄… судда̄ ат̣т̣хан̇гасаманна̄гатам̣ упосатхам̣ упавасеййум̣, саббесамписса судда̄нам̣ дӣгхараттам̣ хита̄йа сукха̄йа. садевако чепи, ва̄сет̣т̣ха, локо сама̄рако сабрахмако сассаман̣абра̄хман̣ӣ паджа̄ садеваманусса̄ ат̣т̣хан̇гасаманна̄гатам̣ упосатхам̣ упавасеййум̣ [упавасеййа (?)], садевакассаписса [садевакасса (саббаттха) а. ни. 4.193; ма. ни. 3.64 пасситаббам̣] локасса сама̄ракасса сабрахмакасса сассаман̣абра̄хман̣ийа̄ паджа̄йа садеваманусса̄йа дӣгхараттам̣ хита̄йа сукха̄йа. име чепи, ва̄сет̣т̣ха, маха̄са̄ла̄ ат̣т̣хан̇гасаманна̄гатам̣ упосатхам̣ упавасеййум̣, имесамписса маха̄са̄ла̄нам̣ дӣгхараттам̣ хита̄йа сукха̄йа ( ) [(саче четеййум̣) каттхачи аттхи. а. ни. 4.193 пасситаббам̣]. ко пана ва̄до мануссабхӯтасса̄’’ти! чатуттхам̣.