8. саппурисасуттам̣

38. ‘‘саппурисо, бхиккхаве, куле джа̄йама̄но бахуно джанасса аттха̄йа хита̄йа сукха̄йа хоти – ма̄та̄питӯнам̣ аттха̄йа хита̄йа сукха̄йа хоти, путтада̄расса аттха̄йа хита̄йа сукха̄йа хоти, да̄сакаммакарапорисасса аттха̄йа хита̄йа сукха̄йа хоти, митта̄мачча̄нам̣ аттха̄йа хита̄йа сукха̄йа хоти, пуббапета̄нам̣ аттха̄йа хита̄йа сукха̄йа хоти, ран̃н̃о аттха̄йа хита̄йа сукха̄йа хоти, девата̄нам̣ аттха̄йа хита̄йа сукха̄йа хоти, саман̣абра̄хман̣а̄нам̣ аттха̄йа хита̄йа сукха̄йа хоти.

‘‘сеййатха̄пи, бхиккхаве, маха̄мегхо саббасасса̄ни сампа̄денто бахуно джанасса аттха̄йа хита̄йа сукха̄йа [хита̄йа…пе… (сйа̄. ка.)] хоти; евамевам̣ кхо, бхиккхаве, саппурисо куле джа̄йама̄но бахуно джанасса аттха̄йа хита̄йа сукха̄йа хоти – ма̄та̄питӯнам̣ аттха̄йа хита̄йа сукха̄йа хоти, путтада̄расса аттха̄йа хита̄йа сукха̄йа хоти, да̄сакаммакарапорисасса аттха̄йа хита̄йа сукха̄йа хоти, митта̄мачча̄нам̣ аттха̄йа хита̄йа сукха̄йа хоти, пуббапета̄нам̣ аттха̄йа хита̄йа сукха̄йа хоти, ран̃н̃о аттха̄йа хита̄йа сукха̄йа хоти, девата̄нам̣ аттха̄йа хита̄йа сукха̄йа хоти, саман̣абра̄хман̣а̄нам̣ аттха̄йа хита̄йа сукха̄йа хотӣ’’ти.

‘‘бахӯнам̣ [бахуннам̣ (сӣ. пӣ.)] вата аттха̄йа, саппан̃н̃о гхарама̄васам̣;

ма̄тарам̣ питарам̣ пуббе, раттиндиваматандито.

‘‘пӯджети сахадхаммена, пуббекатамануссарам̣;

ана̄га̄ре паббаджите, апаче брахмача̄райо [брахмача̄рино (сйа̄.)].

‘‘нивит̣т̣хасаддхо пӯджети, н̃атва̄ дхамме ча песало [песале (ка.)];

ран̃н̃о хито девахито, н̃а̄тӣнам̣ сакхинам̣ хито.

‘‘саббесам̣ [саббесу (ка.)] со [са (сйа̄. пӣ. ка.)] хито хоти, саддхамме суппатит̣т̣хито;

винеййа маччхерамалам̣, са локам̣ бхаджате сива’’нти. ат̣т̣хамам̣;