4. кхеттасуттам̣

34. ‘‘ат̣т̣хан̇гасаманна̄гате, бхиккхаве, кхетте бӣджам̣ вуттам̣ на махаппхалам̣ хоти на махасса̄дам̣ на пха̄тисеййам̣ [на пха̄тисеййанти (сӣ. сйа̄. ка.), на пха̄тисеййа̄ (каттхачи)]. катхам̣ ат̣т̣хан̇гасаманна̄гате? идха, бхиккхаве, кхеттам̣ унна̄манинна̄ми ча хоти, па̄са̄н̣асаккхарикан̃ча хоти, ӯсаран̃ча хоти, на ча гамбхӣраситам̣ хоти, на а̄йасампаннам̣ хоти, на апа̄йасампаннам̣ хоти, на ма̄тика̄сампаннам̣ хоти, на марийа̄дасампаннам̣ хоти. евам̣ ат̣т̣хан̇гасаманна̄гате, бхиккхаве, кхетте бӣджам̣ вуттам̣ на махаппхалам̣ хоти на махасса̄дам̣ на пха̄тисеййам̣.

‘‘евамевам̣ кхо, бхиккхаве, ат̣т̣хан̇гасаманна̄гатесу саман̣абра̄хман̣есу да̄нам̣ диннам̣ на махаппхалам̣ хоти на маха̄нисам̣сам̣ на маха̄джутикам̣ на маха̄виппха̄рам̣. катхам̣ ат̣т̣хан̇гасаманна̄гатесу? идха, бхиккхаве, саман̣абра̄хман̣а̄ миччха̄дит̣т̣хика̄ хонти, миччха̄сан̇каппа̄, миччха̄ва̄ча̄, миччха̄камманта̄, миччха̄а̄джӣва̄, миччха̄ва̄йа̄ма̄, миччха̄сатино, миччха̄сама̄дхино. евам̣ ат̣т̣хан̇гасаманна̄гатесу, бхиккхаве, саман̣абра̄хман̣есу да̄нам̣ диннам̣ на махаппхалам̣ хоти на маха̄нисам̣сам̣ на маха̄джутикам̣ на маха̄виппха̄рам̣.

‘‘ат̣т̣хан̇гасаманна̄гате, бхиккхаве, кхетте бӣджам̣ вуттам̣ махаппхалам̣ хоти махасса̄дам̣ пха̄тисеййам̣. катхам̣ ат̣т̣хан̇гасаманна̄гате? идха, бхиккхаве, кхеттам̣ анунна̄ма̄нинна̄ми ча хоти, апа̄са̄н̣асаккхарикан̃ча хоти, анӯсаран̃ча хоти, гамбхӣраситам̣ хоти, а̄йасампаннам̣ хоти, апа̄йасампаннам̣ хоти, ма̄тика̄сампаннам̣ хоти, марийа̄дасампаннам̣ хоти. евам̣ ат̣т̣хан̇гасаманна̄гате, бхиккхаве, кхетте бӣджам̣ вуттам̣ махаппхалам̣ хоти махасса̄дам̣ пха̄тисеййам̣.

‘‘евамевам̣ кхо, бхиккхаве, ат̣т̣хан̇гасаманна̄гатесу саман̣абра̄хман̣есу да̄нам̣ диннам̣ махаппхалам̣ хоти маха̄нисам̣сам̣ маха̄джутикам̣ маха̄виппха̄рам̣. катхам̣ ат̣т̣хан̇гасаманна̄гатесу? идха, бхиккхаве, саман̣абра̄хман̣а̄ самма̄дит̣т̣хика̄ хонти, самма̄сан̇каппа̄, самма̄ва̄ча̄, самма̄камманта̄, самма̄а̄джӣва̄, самма̄ва̄йа̄ма̄, самма̄сатино, самма̄сама̄дхино. евам̣ ат̣т̣хан̇гасаманна̄гатесу, бхиккхаве, саман̣абра̄хман̣есу да̄нам̣ диннам̣ махаппхалам̣ хоти маха̄нисам̣сам̣ маха̄джутикам̣ маха̄виппха̄ра’’нти.

‘‘йатха̄пи кхетте сампанне, павутта̄ бӣджасампада̄;

деве сампа̄дайантамхи [сан̃джа̄йантамхи (ка.)], хоти дхан̃н̃асса сампада̄.

‘‘анӣтисампада̄ хоти, вирӯл̣хӣ бхавати сампада̄;

вепулласампада̄ хоти, пхалам̣ ве хоти сампада̄.

‘‘евам̣ сампаннасӣлесу, динна̄ бходжанасампада̄;

сампада̄нам̣ упанети, сампаннам̣ хисса там̣ катам̣.

‘‘тасма̄ сампадама̄кан̇кхӣ, сампаннаттхӯдха пуггало;

сампаннапан̃н̃е севетха, евам̣ иджджханти сампада̄.

‘‘виджджа̄чаран̣асампанне, ладдха̄ читтасса сампадам̣;

кароти каммасампадам̣, лабхати чаттхасампадам̣.

‘‘локам̣ н̃атва̄ йатха̄бхӯтам̣, паппуййа дит̣т̣хисампадам̣;

маггасампадама̄гамма, йа̄ти сампаннама̄насо.

‘‘одхунитва̄ малам̣ саббам̣, патва̄ нибба̄насампадам̣;

муччати саббадуккхехи, са̄ хоти саббасампада̄’’ти. чатуттхам̣;