9. саттхуса̄санасуттам̣

83. атха кхо а̄йасма̄ упа̄ли йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ упа̄ли бхагавантам̣ етадавоча –

‘‘са̄дху ме, бханте, бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. ‘‘йе кхо твам̣, упа̄ли, дхамме джа̄неййа̄си – ‘име дхамма̄ на екантаниббида̄йа вира̄га̄йа ниродха̄йа упасама̄йа абхин̃н̃а̄йа самбодха̄йа нибба̄на̄йа сам̣ваттантӣ’ти; екам̣сена, упа̄ли, дха̄реййа̄си – ‘несо дхаммо несо винайо нетам̣ саттхуса̄сана’нти. йе ча кхо твам̣, упа̄ли, дхамме джа̄неййа̄си – ‘име дхамма̄ екантаниббида̄йа вира̄га̄йа ниродха̄йа упасама̄йа абхин̃н̃а̄йа самбодха̄йа нибба̄на̄йа сам̣ваттантӣ’ти; екам̣сена, упа̄ли, дха̄реййа̄си – ‘есо дхаммо есо винайо етам̣ саттхуса̄сана’’’нти. навамам̣.