9. дутийапариха̄нисуттам̣

29. ‘‘саттиме, бхиккхаве, дхамма̄ упа̄сакасса париха̄на̄йа сам̣ваттанти. катаме сатта? бхиккхудассанам̣ ха̄пети, саддхаммассаванам̣ памаджджати, адхисӣле на сиккхати, аппаса̄дабахуло хоти, бхиккхӯсу тхересу чева навесу ча маджджхимесу ча упа̄рамбхачитто дхаммам̣ сун̣а̄ти рандхагавесӣ, ито бахиддха̄ даккхин̣еййам̣ гавесати, таттха ча пуббака̄рам̣ кароти. име кхо, бхиккхаве, сатта дхамма̄ упа̄сакасса париха̄на̄йа сам̣ваттанти.

‘‘саттиме, бхиккхаве, дхамма̄ упа̄сакасса апариха̄на̄йа сам̣ваттанти. катаме сатта? бхиккхудассанам̣ на ха̄пети, саддхаммассаванам̣ наппамаджджати, адхисӣле сиккхати, паса̄дабахуло хоти, бхиккхӯсу тхересу чева навесу ча маджджхимесу ча анупа̄рамбхачитто дхаммам̣ сун̣а̄ти на рандхагавесӣ, на ито бахиддха̄ даккхин̣еййам̣ гавесати, идха ча пуббака̄рам̣ кароти. име кхо, бхиккхаве, сатта дхамма̄ упа̄сакасса апариха̄на̄йа сам̣ваттантӣ’’ти. идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘дассанам̣ бха̄витатта̄нам̣, йо ха̄пети упа̄сако;

саванан̃ча арийадхамма̄нам̣, адхисӣле на сиккхати.

‘‘аппаса̄до ча бхиккхӯсу, бхиййо бхиййо павад̣д̣хати;

упа̄рамбхакачитто ча, саддхаммам̣ сотумиччхати.

‘‘ито ча бахиддха̄ ан̃н̃ам̣, даккхин̣еййам̣ гавесати;

таттхева ча пуббака̄рам̣, йо кароти упа̄сако.

‘‘ете кхо париха̄нийе, сатта дхамме судесите;

упа̄сако севама̄но, саддхамма̄ париха̄йати.

‘‘дассанам̣ бха̄витатта̄нам̣, йо на ха̄пети упа̄сако;

саванан̃ча арийадхамма̄нам̣, адхисӣле ча сиккхати.

‘‘паса̄до часса бхиккхӯсу, бхиййо бхиййо павад̣д̣хати;

анупа̄рамбхачитто ча, саддхаммам̣ сотумиччхати.

‘‘на ито бахиддха̄ ан̃н̃ам̣, даккхин̣еййам̣ гавесати;

идхева ча пуббака̄рам̣, йо кароти упа̄сако.

‘‘ете кхо апариха̄нийе, сатта дхамме судесите;

упа̄сако севама̄но, саддхамма̄ на париха̄йатӣ’’ти. навамам̣;