1. пат̣хамаа̄хунеййасуттам̣

1. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘чхахи, бхиккхаве, дхаммехи саманна̄гато бхиккху а̄хунеййо хоти па̄хунеййо даккхин̣еййо ан̃джаликаран̣ӣйо ануттарам̣ пун̃н̃аккхеттам̣ локасса. катамехи чхахи [дӣ. ни. 3.328; пат̣и. ма. 3.17]? идха, бхиккхаве, бхиккху чаккхуна̄ рӯпам̣ дисва̄ нева сумано хоти на думмано, упеккхако вихарати сато сампаджа̄но. сотена саддам̣ сутва̄ нева сумано хоти на думмано, упеккхако вихарати сато сампаджа̄но. гха̄нена гандхам̣ гха̄йитва̄ нева сумано хоти на думмано, упеккхако вихарати сато сампаджа̄но. дживха̄йа расам̣ са̄йитва̄ нева сумано хоти на думмано, упеккхако вихарати сато сампаджа̄но. ка̄йена пхот̣т̣хаббам̣ пхуситва̄ нева сумано хоти на думмано, упеккхако вихарати сато сампаджа̄но. манаса̄ дхаммам̣ вин̃н̃а̄ нева сумано хоти на думмано, упеккхако вихарати сато сампаджа̄но. имехи кхо, бхиккхаве, чхахи дхаммехи саманна̄гато бхиккху а̄хунеййо хоти па̄хунеййо даккхин̣еййо ан̃джаликаран̣ӣйо ануттарам̣ пун̃н̃аккхеттам̣ локасса̄’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти. пат̣хамам̣.