9. кхиппанисантисуттам̣

169. атха кхо а̄йасма̄ а̄нандо йена̄йасма̄ са̄рипутто тенупасан̇ками; упасан̇камитва̄ а̄йасмата̄ са̄рипуттена саддхим̣ саммоди. саммоданӣйам̣ катхам̣ са̄ран̣ӣйам̣ [са̄ра̄н̣ӣйам̣ (сӣ. сйа̄. кам̣. пӣ.)] вӣтиса̄ретва̄ екамантам̣ нисӣди. екамантам̣ нисинно кхо а̄йасма̄ а̄нандо а̄йасмантам̣ са̄рипуттам̣ етадавоча –

‘‘китта̄вата̄ ну кхо, а̄вусо са̄рипутта, бхиккху кхиппанисанти ча хоти, кусалесу дхаммесу суггахитагга̄хӣ ча, бахун̃ча ган̣ха̄ти, гахитан̃часса наппамуссатӣ’’ти? ‘‘а̄йасма̄ кхо а̄нандо бахуссуто. пат̣ибха̄ту а̄йасмантам̣йева а̄нанда’’нти. ‘‘тенаха̄вусо са̄рипутта, сун̣а̄хи, са̄дхукам̣ манаси карохи; бха̄сисса̄мӣ’’ти. ‘‘евама̄вусо’’ти кхо а̄йасма̄ са̄рипутто а̄йасмато а̄нандасса паччассоси. а̄йасма̄ а̄нандо етадавоча –

‘‘идха̄вусо са̄рипутта, бхиккху аттхакусало ча хоти, дхаммакусало ча, бйан̃джанакусало ча, нируттикусало ча, пубба̄паракусало ча. етта̄вата̄ кхо, а̄вусо са̄рипутта, бхиккху кхиппанисанти ча хоти кусалесу дхаммесу, суггахитагга̄хӣ ча, бахун̃ча ган̣ха̄ти, гахитан̃часса наппамуссатӣ’’ти. ‘‘аччхарийам̣, а̄вусо! аббхутам̣, а̄вусо!! йа̄ва субха̄ситам̣ чидам̣ а̄йасмата̄ а̄нандена. имехи ча майам̣ пан̃чахи дхаммехи саманна̄гатам̣ а̄йасмантам̣ а̄нандам̣ дха̄рема – ‘а̄йасма̄ а̄нандо аттхакусало дхаммакусало бйан̃джанакусало нируттикусало пубба̄паракусало’’’ти. навамам̣.