3. са̄рандадасуттам̣

143. екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа веса̄лим̣ пин̣д̣а̄йа па̄виси. тена кхо пана самайена пан̃чаматта̄нам̣ личчхависата̄нам̣ са̄рандаде четийе саннисинна̄нам̣ саннипатита̄нам̣ айамантара̄катха̄ удапа̄ди – ‘‘пан̃чаннам̣ ратана̄нам̣ па̄тубха̄во дуллабхо локасмим̣. катамесам̣ пан̃чаннам̣? хаттхиратанасса па̄тубха̄во дуллабхо локасмим̣, ассаратанасса па̄тубха̄во дуллабхо локасмим̣, ман̣иратанасса па̄тубха̄во дуллабхо локасмим̣, иттхиратанасса па̄тубха̄во дуллабхо локасмим̣, гахапатиратанасса па̄тубха̄во дуллабхо локасмим̣. имесам̣ пан̃чаннам̣ ратана̄нам̣ па̄тубха̄во дуллабхо локасми’’нти.

атха кхо те личчхавӣ магге пурисам̣ т̣хапесум̣ [песесум̣ (сйа̄. ка.)] – ‘‘йада̄ твам̣ [йатха̄ твам̣ (сӣ. пӣ.)], амбхо пуриса, пассеййа̄си бхагавантам̣, атха амха̄кам̣ а̄рочеййа̄сӣ’’ти. аддаса̄ кхо со пурисо бхагавантам̣ дӯратова а̄гаччхантам̣; дисва̄на йена те личчхавӣ тенупасан̇ками; упасан̇камитва̄ те личчхавӣ етадавоча – ‘‘айам̣ со, бханте, бхагава̄ гаччхати арахам̣ самма̄самбуддхо; йассада̄ни ка̄лам̣ ман̃н̃атха̄’’ти.

атха кхо те личчхавӣ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ ат̣т̣хам̣су. екамантам̣ т̣хита̄ кхо те личчхавӣ бхагавантам̣ етадавочум̣ –

‘‘са̄дху, бханте, йена са̄рандадам̣ четийам̣ тенупасан̇камату анукампам̣ упа̄да̄йа̄’’ти. адхива̄сеси бхагава̄ тун̣хӣбха̄вена. атха кхо бхагава̄ йена са̄рандадам̣ четийам̣ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ те личчхавӣ етадавоча – ‘‘ка̄йа нуттха, личчхавӣ, етарахи катха̄йа саннисинна̄, ка̄ ча пана во антара̄катха̄ виппаката̄’’ти? ‘‘идха, бханте, амха̄кам̣ саннисинна̄нам̣ саннипатита̄нам̣ айамантара̄катха̄ удапа̄ди – ‘пан̃чаннам̣ ратана̄нам̣ па̄тубха̄во дуллабхо локасмим̣. катамесам̣ пан̃чаннам̣? хаттхиратанасса па̄тубха̄во дуллабхо локасмим̣, ассаратанасса па̄тубха̄во дуллабхо локасмим̣, ман̣иратанасса па̄тубха̄во дуллабхо локасмим̣, иттхиратанасса па̄тубха̄во дуллабхо локасмим̣, гахапатиратанасса па̄тубха̄во дуллабхо локасмим̣. имесам̣ пан̃чаннам̣ ратана̄нам̣ па̄тубха̄во дуллабхо локасми’’’нти.

‘‘ка̄ма̄дхимутта̄нам̣ вата, бхо, личчхавӣнам̣ [ка̄ма̄дхимутта̄нам̣ вата во личчхавӣнам̣ (сӣ.), ка̄ма̄дхимутта̄нам̣ вата во личчхавӣ (сйа̄.), ка̄ма̄дхимутта̄нам̣ва во личчхавӣ (?)] ка̄мам̣йева а̄раббха антара̄катха̄ удапа̄ди. пан̃чаннам̣, личчхавӣ, ратана̄нам̣ па̄тубха̄во дуллабхо локасмим̣. катамесам̣ пан̃чаннам̣? татха̄гатасса арахато самма̄самбуддхасса па̄тубха̄во дуллабхо локасмим̣, татха̄гатаппаведитасса дхаммавинайасса десета̄ пуггало дуллабхо локасмим̣, татха̄гатаппаведитасса дхаммавинайасса деситасса вин̃н̃а̄та̄ пуггало дуллабхо локасмим̣, татха̄гатаппаведитасса дхаммавинайасса деситасса вин̃н̃а̄та̄ [вин̃н̃а̄тасса (сӣ. пӣ.) а. ни. 5.195] дхамма̄нудхаммаппат̣ипанно пуггало дуллабхо локасмим̣, катан̃н̃ӯ катаведӣ пуггало дуллабхо локасмим̣. имесам̣ кхо, личчхавӣ, пан̃чаннам̣ ратана̄нам̣ па̄тубха̄во дуллабхо локасми’’нти. татийам̣.