1. раджанӣйасуттам̣

81. ‘‘пан̃чахи, бхиккхаве, дхаммехи саманна̄гато тхеро бхиккху сабрахмача̄рӣнам̣ аппийо ча хоти амана̄по ча агару ча абха̄ванӣйо ча. катамехи пан̃чахи? раджанӣйе раджджати, дуссанӣйе [дусанӣйе (сӣ. сйа̄. кам̣. пӣ.)] дуссати, моханӣйе муйхати, куппанӣйе [купанӣйе (сӣ. сйа̄. кам̣.), копанӣйе (пӣ.)] куппати, маданӣйе маджджати – имехи кхо, бхиккхаве, пан̃чахи дхаммехи саманна̄гато тхеро бхиккху сабрахмача̄рӣнам̣ аппийо ча хоти амана̄по ча агару ча абха̄ванӣйо ча.

‘‘пан̃чахи, бхиккхаве, дхаммехи саманна̄гато тхеро бхиккху сабрахмача̄рӣнам̣ пийо ча хоти мана̄по ча гару ча бха̄ванӣйо ча. катамехи пан̃чахи? раджанӣйе на раджджати, дуссанӣйе на дуссати, моханӣйе на муйхати, куппанӣйе на куппати, маданӣйе на маджджати – имехи кхо, бхиккхаве, пан̃чахи дхаммехи саманна̄гато тхеро бхиккху сабрахмача̄рӣнам̣ пийо ча хоти мана̄по ча гару ча бха̄ванӣйо ча̄’’ти. пат̣хамам̣.