9. татийаана̄гатабхайасуттам̣

79. ‘‘пан̃чима̄ни, бхиккхаве, ана̄гатабхайа̄ни етарахи асамуппанна̄ни а̄йатим̣ самуппаджджиссанти. та̄ни во [кхо (каттхачи)] пат̣ибуджджхитабба̄ни; пат̣ибуджджхитва̄ ча тесам̣ паха̄на̄йа ва̄йамитаббам̣.

‘‘катама̄ни пан̃ча? бхависсанти, бхиккхаве, бхиккхӯ ана̄гатамаддха̄нам̣ абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ ан̃н̃е упасампа̄дессанти. тепи [те (сӣ.)] на саккхиссанти винетум̣ адхисӣле адхичитте адхипан̃н̃а̄йа. тепи бхависсанти абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ ан̃н̃е упасампа̄дессанти. тепи [те (?)] на саккхиссанти винетум̣ адхисӣле адхичитте адхипан̃н̃а̄йа. тепи бхависсанти абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. ити кхо, бхиккхаве, дхаммасандоса̄ винайасандосо; винайасандоса̄ дхаммасандосо. идам̣, бхиккхаве, пат̣хамам̣ ана̄гатабхайам̣ етарахи асамуппаннам̣ а̄йатим̣ самуппаджджиссати. там̣ во пат̣ибуджджхитаббам̣; пат̣ибуджджхитва̄ ча тасса паха̄на̄йа ва̄йамитаббам̣.

‘‘пуна чапарам̣, бхиккхаве, бхависсанти бхиккхӯ ана̄гатамаддха̄нам̣ абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ ан̃н̃есам̣ ниссайам̣ дассанти. тепи на саккхиссанти винетум̣ адхисӣле адхичитте адхипан̃н̃а̄йа. тепи бхависсанти абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ ан̃н̃есам̣ ниссайам̣ дассанти. тепи на саккхиссанти винетум̣ адхисӣле адхичитте адхипан̃н̃а̄йа. тепи бхависсанти абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. ити кхо, бхиккхаве, дхаммасандоса̄ винайасандосо; винайасандоса̄ дхаммасандосо. идам̣, бхиккхаве, дутийам̣ ана̄гатабхайам̣ етарахи асамуппаннам̣ а̄йатим̣ самуппаджджиссати. там̣ во пат̣ибуджджхитаббам̣; пат̣ибуджджхитва̄ ча тасса паха̄на̄йа ва̄йамитаббам̣.

‘‘пуна чапарам̣, бхиккхаве, бхависсанти бхиккхӯ ана̄гатамаддха̄нам̣ абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ абхидхаммакатхам̣ ведаллакатхам̣ катхента̄ кан̣хадхаммам̣ оккамама̄на̄ на буджджхиссанти. ити кхо, бхиккхаве, дхаммасандоса̄ винайасандосо; винайасандоса̄ дхаммасандосо. идам̣, бхиккхаве, татийам̣ ана̄гатабхайам̣ етарахи асамуппаннам̣ а̄йатим̣ самуппаджджиссати. там̣ во пат̣ибуджджхитаббам̣; пат̣ибуджджхитва̄ ча тасса паха̄на̄йа ва̄йамитаббам̣.

‘‘пуна чапарам̣, бхиккхаве, бхависсанти бхиккхӯ ана̄гатамаддха̄нам̣ абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ йе те суттанта̄ татха̄гатабха̄сита̄ гамбхӣра̄ гамбхӣраттха̄ локуттара̄ сун̃н̃ата̄ппат̣исам̣йутта̄, тесу бхан̃н̃ама̄несу на суссӯсиссанти, на сотам̣ одахиссанти, на ан̃н̃а̄ читтам̣ упат̣т̣хапессанти, на ча те дхамме уггахетаббам̣ парийа̄пун̣итаббам̣ ман̃н̃иссанти. йе пана те суттанта̄ кавита̄ [кавиката̄ (сӣ. сйа̄. кам̣. пӣ., сам̣. ни. 2.229) т̣ӣка̄ олокетабба̄] ка̄веййа̄ читтаккхара̄ читтабйан̃джана̄ ба̄хирака̄ са̄вакабха̄сита̄, тесу бхан̃н̃ама̄несу суссӯсиссанти, сотам̣ одахиссанти, ан̃н̃а̄ читтам̣ упат̣т̣хапессанти, те ча дхамме уггахетаббам̣ парийа̄пун̣итаббам̣ ман̃н̃иссанти. ити кхо, бхиккхаве, дхаммасандоса̄ винайасандосо; винайасандоса̄ дхаммасандосо. идам̣, бхиккхаве, чатуттхам̣ ана̄гатабхайам̣ етарахи асамуппаннам̣ а̄йатим̣ самуппаджджиссати. там̣ во пат̣ибуджджхитаббам̣; пат̣ибуджджхитва̄ ча тасса паха̄на̄йа ва̄йамитаббам̣.

‘‘пуна чапарам̣, бхиккхаве, бхависсанти бхиккхӯ ана̄гатамаддха̄нам̣ абха̄витака̄йа̄ абха̄витасӣла̄ абха̄витачитта̄ абха̄витапан̃н̃а̄. те абха̄витака̄йа̄ сама̄на̄ абха̄витасӣла̄ абха̄витачитта̄ абха̄витапан̃н̃а̄ тхера̄ бхиккхӯ ба̄хулика̄ [ба̄хуллика̄ (сйа̄. кам̣.) а. ни. 2.49; 3.96] бхависсанти са̄тхалика̄ оккамане пуббан̇гама̄ павивеке никкхиттадхура̄, на вӣрийам̣ а̄рабхиссанти аппаттасса паттийа̄ анадхигатасса адхигама̄йа асаччхикатасса саччхикирийа̄йа. тесам̣ паччхима̄ джаната̄ дит̣т̣ха̄нугатим̣ а̄паджджиссати. са̄пи бхависсати ба̄хулика̄ са̄тхалика̄ оккамане пуббан̇гама̄ павивеке никкхиттадхура̄, на вӣрийам̣ а̄рабхиссати аппаттасса паттийа̄ анадхигатасса адхигама̄йа асаччхикатасса саччхикирийа̄йа. ити кхо, бхиккхаве, дхаммасандоса̄ винайасандосо; винайасандоса̄ дхаммасандосо. идам̣, бхиккхаве, пан̃чамам̣ ана̄гатабхайам̣ етарахи асамуппаннам̣ а̄йатим̣ самуппаджджиссати. там̣ во пат̣ибуджджхитаббам̣; пат̣ибуджджхитва̄ ча тасса паха̄на̄йа ва̄йамитаббам̣. ‘‘има̄ни кхо, бхиккхаве, пан̃ча ана̄гатабхайа̄ни етарахи асамуппанна̄ни а̄йатим̣ самуппаджджиссанти. та̄ни во пат̣ибуджджхитабба̄ни; пат̣ибуджджхитва̄ ча тесам̣ паха̄на̄йа ва̄йамитабба’’нти. навамам̣.