8. дутийаана̄гатабхайасуттам̣

78. ‘‘пан̃чима̄ни, бхиккхаве, ана̄гатабхайа̄ни сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа. катама̄ни пан̃ча? идха, бхиккхаве, бхиккху ити пат̣исан̃чиккхати – ‘ахам̣ кхо етарахи дахаро йува̄ сусука̄л̣акесо бхадрена йоббанена саманна̄гато пат̣хамена вайаса̄. хоти кхо пана со самайо йам̣ имам̣ ка̄йам̣ джара̄ пхусати. джин̣н̣ена кхо пана джара̄йа абхибхӯтена на сукарам̣ буддха̄нам̣ са̄санам̣ манаси ка̄тум̣, на сукара̄ни аран̃н̃аванапаттха̄ни панта̄ни сена̄сана̄ни пат̣исевитум̣. пура̄ мам̣ со дхаммо а̄гаччхати анит̣т̣хо аканто амана̄по; ханда̄хам̣ пат̣икаччева [пат̣игаччева (сӣ.)] вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа, йена̄хам̣ дхаммена саманна̄гато джин̣н̣акопи пха̄сум̣ [пха̄су (пӣ. ка.)] вихарисса̄мӣ’ти. идам̣, бхиккхаве, пат̣хамам̣ ана̄гатабхайам̣ сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа.

‘‘пуна чапарам̣, бхиккхаве, бхиккху ити пат̣исан̃чиккхати – ‘ахам̣ кхо етарахи аппа̄ба̄дхо аппа̄тан̇ко самавепа̄кинийа̄ гахан̣ийа̄ саманна̄гато на̄тисӣта̄йа на̄ччун̣ха̄йа маджджхима̄йа падха̄наккхама̄йа. хоти кхо пана со самайо йам̣ имам̣ ка̄йам̣ бйа̄дхи пхусати. бйа̄дхитена кхо пана бйа̄дхина̄ абхибхӯтена [бйа̄дха̄бхибхӯтена (сӣ. пӣ. ка.)] на сукарам̣ буддха̄нам̣ са̄санам̣ манаси ка̄тум̣, на сукара̄ни аран̃н̃аванапаттха̄ни панта̄ни сена̄сана̄ни пат̣исевитум̣. пура̄ мам̣ со дхаммо а̄гаччхати анит̣т̣хо аканто амана̄по; ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа, йена̄хам̣ дхаммена саманна̄гато бйа̄дхитопи пха̄сум̣ вихарисса̄мӣ’ти. идам̣, бхиккхаве, дутийам̣ ана̄гатабхайам̣ сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа.

‘‘пуна чапарам̣, бхиккхаве, бхиккху ити пат̣исан̃чиккхати – ‘етарахи кхо субхиккхам̣ сусассам̣ сулабхапин̣д̣ам̣, сукарам̣ ун̃чхена паггахена йа̄петум̣. хоти кхо пана со самайо йам̣ дуббхиккхам̣ хоти дуссассам̣ дуллабхапин̣д̣ам̣, на сукарам̣ ун̃чхена паггахена йа̄петум̣. дуббхиккхе кхо пана манусса̄ йена субхиккхам̣ тена сан̇каманти [тенупасан̇каманти (ка.)]. таттха сан̇ган̣икавиха̄ро хоти а̄кин̣н̣авиха̄ро. сан̇ган̣икавиха̄ре кхо пана сати а̄кин̣н̣авиха̄ре на сукарам̣ буддха̄нам̣ са̄санам̣ манаси ка̄тум̣, на сукара̄ни аран̃н̃аванапаттха̄ни панта̄ни сена̄сана̄ни пат̣исевитум̣. пура̄ мам̣ со дхаммо а̄гаччхати анит̣т̣хо аканто амана̄по; ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа, йена̄хам̣ дхаммена саманна̄гато дуббхиккхепи пха̄су вихарисса̄мӣ’ти. идам̣, бхиккхаве, татийам̣ ана̄гатабхайам̣ сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа.

‘‘пуна чапарам̣, бхиккхаве, бхиккху ити пат̣исан̃чиккхати – ‘етарахи кхо манусса̄ самагга̄ саммодама̄на̄ авивадама̄на̄ кхӣродакӣбхӯта̄ ан̃н̃аман̃н̃ам̣ пийачаккхӯхи сампассанта̄ вихаранти. хоти кхо пана со самайо йам̣ бхайам̣ хоти ат̣ависан̇копо, чаккасама̄рӯл̣ха̄ джа̄напада̄ парийа̄йанти. бхайе кхо пана сати манусса̄ йена кхемам̣ тена сан̇каманти. таттха сан̇ган̣икавиха̄ро хоти а̄кин̣н̣авиха̄ро. сан̇ган̣икавиха̄ре кхо пана сати а̄кин̣н̣авиха̄ре на сукарам̣ буддха̄нам̣ са̄санам̣ манаси ка̄тум̣, на сукара̄ни аран̃н̃аванапаттха̄ни панта̄ни сена̄сана̄ни пат̣исевитум̣. пура̄ мам̣ со дхаммо а̄гаччхати анит̣т̣хо аканто амана̄по; ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа, йена̄хам̣ дхаммена саманна̄гато бхайепи пха̄сум̣ вихарисса̄мӣ’ти. идам̣, бхиккхаве, чатуттхам̣ ана̄гатабхайам̣ сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа.

‘‘пуна чапарам̣, бхиккхаве, бхиккху ити пат̣исан̃чиккхати – ‘етарахи кхо сан̇гхо самагго саммодама̄но авивадама̄но екуддесо пха̄су вихарати. хоти кхо пана со самайо йам̣ сан̇гхо бхиджджати. сан̇гхе кхо пана бхинне на сукарам̣ буддха̄нам̣ са̄санам̣ манаси ка̄тум̣, на сукара̄ни аран̃н̃аванапаттха̄ни панта̄ни сена̄сана̄ни пат̣исевитум̣. пура̄ мам̣ со дхаммо а̄гаччхати анит̣т̣хо аканто амана̄по; ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа, йена̄хам̣ дхаммена саманна̄гато бхиннепи сан̇гхе пха̄сум̣ вихарисса̄мӣ’ти. идам̣, бхиккхаве, пан̃чамам̣ ана̄гатабхайам̣ сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа.

‘‘има̄ни кхо, бхиккхаве, пан̃ча ана̄гатабхайа̄ни сампассама̄нена аламева бхиккхуна̄ аппаматтена а̄та̄пина̄ пахитаттена вихаритум̣ аппаттасса паттийа̄ анадхигатасса адхигама̄йа асаччхикатасса саччхикирийа̄йа̄’’ти. ат̣т̣хамам̣.