5. куласуттам̣

258. ‘‘йа̄ни ка̄ничи, бхиккхаве, кула̄ни бхогесу махаттам̣ патта̄ни на чират̣т̣хитика̄ни бхаванти, сабба̄ни та̄ни чатӯхи т̣ха̄нехи, етесам̣ ва̄ ан̃н̃атарена. катамехи чатӯхи? нат̣т̣хам̣ на гавесанти, джин̣н̣ам̣ на пат̣исан̇кхаронти, апаримитапа̄набходжана̄ хонти, дуссӣлам̣ иттхим̣ ва̄ пурисам̣ ва̄ а̄дхипачче т̣хапенти. йа̄ни ка̄ничи, бхиккхаве, кула̄ни бхогесу махаттам̣ патта̄ни на чират̣т̣хитика̄ни бхаванти, сабба̄ни та̄ни имехи чатӯхи т̣ха̄нехи, етесам̣ ва̄ ан̃н̃атарена.

‘‘йа̄ни ка̄ничи, бхиккхаве, кула̄ни бхогесу махаттам̣ патта̄ни чират̣т̣хитика̄ни бхаванти, сабба̄ни та̄ни чатӯхи т̣ха̄нехи, етесам̣ ва̄ ан̃н̃атарена. катамехи чатӯхи? нат̣т̣хам̣ гавесанти, джин̣н̣ам̣ пат̣исан̇кхаронти, паримитапа̄набходжана̄ хонти, сӣлавантам̣ иттхим̣ ва̄ пурисам̣ ва̄ а̄дхипачче т̣хапенти. йа̄ни ка̄ничи, бхиккхаве, кула̄ни бхогесу махаттам̣ патта̄ни чират̣т̣хитика̄ни бхаванти, сабба̄ни та̄ни имехи чатӯхи т̣ха̄нехи, етесам̣ ва̄ ан̃н̃атарена̄’’ти. пан̃чамам̣.