6. пат̣хамаа̄джа̄нӣйасуттам̣

259. ‘‘чатӯхи, бхиккхаве, ан̇гехи саманна̄гато ран̃н̃о бхадро асса̄джа̄нӣйо ра̄джа̄рахо хоти ра̄джабхогго, ран̃н̃о ан̇гантева сан̇кхам̣ гаччхати. катамехи чатӯхи? идха, бхиккхаве, ран̃н̃о бхадро асса̄джа̄нӣйо ван̣н̣асампанно ча хоти баласампанно ча джавасампанно ча а̄рохапарин̣а̄хасампанно ча. имехи кхо, бхиккхаве, чатӯхи ан̇гехи саманна̄гато ран̃н̃о бхадро асса̄джа̄нӣйо ра̄джа̄рахо хоти ра̄джабхогго, ран̃н̃о ан̇гантева сан̇кхам̣ гаччхати.

‘‘евамевам̣ кхо, бхиккхаве, чатӯхи дхаммехи саманна̄гато бхиккху а̄хунеййо хоти…пе… ануттарам̣ пун̃н̃аккхеттам̣ локасса. катамехи чатӯхи? идха, бхиккхаве, бхиккху ван̣н̣асампанно ча хоти баласампанно ча джавасампанно ча а̄рохапарин̣а̄хасампанно ча.

‘‘катхан̃ча, бхиккхаве, бхиккху ван̣н̣асампанно хоти? идха, бхиккхаве, бхиккху сӣлава̄ хоти…пе… сама̄да̄йа сиккхати сиккха̄падесу. евам̣ кхо, бхиккхаве, бхиккху ван̣н̣асампанно хоти.

‘‘катхан̃ча, бхиккхаве, бхиккху баласампанно хоти? идха, бхиккхаве, бхиккху а̄раддхавӣрийо вихарати акусала̄нам̣ дхамма̄нам̣ паха̄на̄йа, кусала̄нам̣ дхамма̄нам̣ упасампада̄йа, тха̄мава̄ дал̣хапараккамо аниккхиттадхуро кусалесу дхаммесу. евам̣ кхо, бхиккхаве, бхиккху баласампанно хоти.

‘‘катхан̃ча, бхиккхаве, бхиккху джавасампанно хоти? идха, бхиккхаве, бхиккху ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти. евам̣ кхо, бхиккхаве, бхиккху джавасампанно хоти.

‘‘катхан̃ча, бхиккхаве, бхиккху а̄рохапарин̣а̄хасампанно хоти? идха, бхиккхаве, бхиккху ла̄бхӣ хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. евам̣ кхо, бхиккхаве, бхиккху а̄рохапарин̣а̄хасампанно хоти.

‘‘имехи кхо, бхиккхаве, чатӯхи дхаммехи саманна̄гато бхиккху а̄хунеййо хоти…пе… ануттарам̣ пун̃н̃аккхеттам̣ локасса̄’’ти. чхат̣т̣хам̣.