5. дутийасиккха̄падасуттам̣

236. ‘‘чатта̄рима̄ни, бхиккхаве, камма̄ни майа̄ сайам̣ абхин̃н̃а̄ саччхикатва̄ паведита̄ни. катама̄ни чатта̄ри? аттхи, бхиккхаве, каммам̣ кан̣хам̣ кан̣хавипа̄кам̣; аттхи, бхиккхаве, каммам̣ суккам̣ суккавипа̄кам̣; аттхи, бхиккхаве, каммам̣ кан̣хасуккам̣ кан̣хасуккавипа̄кам̣; аттхи, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати.

‘‘катаман̃ча, бхиккхаве, каммам̣ кан̣хам̣ кан̣хавипа̄кам̣? идха, бхиккхаве, екаччена ма̄та̄ [екаччо ма̄тарам̣ (ка.)] джӣвита̄ воропита̄ хоти, пита̄ [питарам̣ (ка.)] джӣвита̄ воропито [воропита̄ (ка.)] хоти, арахам̣ [арахантам̣ (ка.)] джӣвита̄ воропито [воропита̄ (ка.)] хоти, татха̄гатасса дут̣т̣хена читтена лохитам̣ уппа̄дитам̣ [уппа̄дита̄ (ка.)] хоти, сан̇гхо бхинно хоти. идам̣ вуччати, бхиккхаве, каммам̣ кан̣хам̣ кан̣хавипа̄кам̣.

‘‘катаман̃ча, бхиккхаве, каммам̣ суккам̣ суккавипа̄кам̣? идха, бхиккхаве, екаччо па̄н̣а̄типа̄та̄ пат̣ивирато хоти, адинна̄да̄на̄ пат̣ивирато хоти, ка̄месумиччха̄ча̄ра̄ пат̣ивирато хоти, муса̄ва̄да̄ пат̣ивирато хоти, писун̣а̄йа ва̄ча̄йа пат̣ивирато хоти, пхаруса̄йа ва̄ча̄йа пат̣ивирато хоти, сампхаппала̄па̄ пат̣ивирато хоти, анабхиджджха̄лу хоти, абйа̄панначитто хоти, самма̄дит̣т̣хи [самма̄дит̣т̣хико (сӣ. сйа̄. кам̣.)] хоти. идам̣ вуччати, бхиккхаве, каммам̣ суккам̣ суккавипа̄кам̣.

‘‘катаман̃ча, бхиккхаве, каммам̣ кан̣хасуккам̣ кан̣хасуккавипа̄кам̣? идха, бхиккхаве, екаччо сабйа̄баджджхампи абйа̄баджджхампи ка̄йасан̇кха̄рам̣ абхисан̇кхароти…пе… идам̣ вуччати, бхиккхаве, каммам̣ кан̣хасуккам̣ кан̣хасуккавипа̄кам̣.

‘‘катаман̃ча, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати? татра, бхиккхаве, йамидам̣ каммам̣ кан̣хам̣ кан̣хавипа̄кам̣…пе… идам̣ вуччати, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати. има̄ни кхо, бхиккхаве, чатта̄ри камма̄ни майа̄ сайам̣ абхин̃н̃а̄ саччхикатва̄ паведита̄нӣ’’ти. пан̃чамам̣.