3. пат̣хамакхатасуттам̣

3. ‘‘чатӯхи, бхиккхаве, дхаммехи саманна̄гато ба̄ло абйатто [авйатто (сӣ. пӣ.)] асаппурисо кхатам̣ упахатам̣ атта̄нам̣ парихарати, са̄ваджджо ча хоти са̄нуваджджо ча вин̃н̃ӯнам̣, бахун̃ча апун̃н̃ам̣ пасавати. катамехи чатӯхи? ананувичча апарийога̄хетва̄ аван̣н̣а̄рахасса ван̣н̣ам̣ бха̄сати, ананувичча апарийога̄хетва̄ ван̣н̣а̄рахасса аван̣н̣ам̣ бха̄сати, ананувичча апарийога̄хетва̄ аппаса̄данӣйе т̣ха̄не паса̄дам̣ упадам̣сети, ананувичча апарийога̄хетва̄ паса̄данӣйе т̣ха̄не аппаса̄дам̣ упадам̣сети – имехи кхо, бхиккхаве, чатӯхи дхаммехи саманна̄гато ба̄ло абйатто асаппурисо кхатам̣ упахатам̣ атта̄нам̣ парихарати, са̄ваджджо ча хоти са̄нуваджджо ча вин̃н̃ӯнам̣, бахун̃ча апун̃н̃ам̣ пасавати.

‘‘чатӯхи, бхиккхаве, дхаммехи саманна̄гато пан̣д̣ито вийатто [вйатто (сӣ. пӣ.), бйатто (сйа̄. кам̣.)] саппурисо аккхатам̣ анупахатам̣ атта̄нам̣ парихарати, анаваджджо ча хоти анануваджджо ча вин̃н̃ӯнам̣, бахун̃ча пун̃н̃ам̣ пасавати. катамехи чатӯхи? анувичча парийога̄хетва̄ аван̣н̣а̄рахасса аван̣н̣ам̣ бха̄сати, анувичча парийога̄хетва̄ ван̣н̣а̄рахасса ван̣н̣ам̣ бха̄сати, анувичча парийога̄хетва̄ аппаса̄данӣйе т̣ха̄не аппаса̄дам̣ упадам̣сети, анувичча парийога̄хетва̄ паса̄данӣйе т̣ха̄не паса̄дам̣ упадам̣сети – имехи кхо, бхиккхаве, чатӯхи дхаммехи саманна̄гато пан̣д̣ито вийатто саппурисо аккхатам̣ анупахатам̣ атта̄нам̣ парихарати, анаваджджо ча хоти анануваджджо ча вин̃н̃ӯнам̣, бахун̃ча пун̃н̃ам̣ пасаватӣ’’ти.

[су. ни. 663; сам̣. ни. 1.180] ‘‘йо ниндийам̣ пасам̣сати,

там̣ ва̄ ниндати йо пасам̣сийо;

вичина̄ти мукхена со калим̣,

калина̄ тена сукхам̣ на виндати.

[су. ни. 663; сам̣. ни. 1.180] ‘‘аппаматто айам̣ кали,

йо аккхесу дханапара̄джайо;

саббасса̄пи саха̄пи аттана̄,

айамева махантатаро кали;

йо сугатесу манам̣ падосайе.

‘‘сатам̣ сахасса̄нам̣ нираббуда̄нам̣,

чхаттим̣сатӣ пан̃ча ча аббуда̄ни;

йамарийагарахӣ [йамарийам̣ гарахӣйа (сйа̄. кам̣.)] нирайам̣ упети,

ва̄чам̣ манан̃ча пан̣идха̄йа па̄пака’’нти. татийам̣;