3. аппамеййасуттам̣

116. ‘‘тайоме, бхиккхаве, пуггала̄ санто сам̣виджджама̄на̄ локасмим̣. катаме тайо? суппамеййо, дуппамеййо, аппамеййо. катамо ча, бхиккхаве, пуггало суппамеййо? идха, бхиккхаве, екаччо пуггало уддхато хоти уннал̣о чапало мукхаро викин̣н̣ава̄чо мут̣т̣хассати асампаджа̄но асама̄хито виббхантачитто па̄катиндрийо. айам̣ вуччати, бхиккхаве, пуггало суппамеййо.

‘‘катамо ча, бхиккхаве, пуггало дуппамеййо? идха, бхиккхаве, екаччо пуггало ануддхато хоти ануннал̣о ачапало амукхаро авикин̣н̣ава̄чо упат̣т̣хитассати сампаджа̄но сама̄хито екаггачитто сам̣вутиндрийо. айам̣ вуччати, бхиккхаве, пуггало дуппамеййо.

‘‘катамо ча, бхиккхаве, пуггало аппамеййо? идха, бхиккхаве, бхиккху арахам̣ хоти кхӣн̣а̄саво. айам̣ вуччати, бхиккхаве, пуггало аппамеййо. име кхо, бхиккхаве, тайо пуггала̄ санто сам̣виджджама̄на̄ локасми’’нти. татийам̣.