2. дутийапан̣н̣а̄сакам̣

(6) 1. пуггалавагго

53. ‘‘двеме, бхиккхаве, пуггала̄ локе уппаджджама̄на̄ уппаджджанти бахуджанахита̄йа бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. катаме две? татха̄гато ча арахам̣ самма̄самбуддхо, ра̄джа̄ ча чаккаваттӣ. име кхо, бхиккхаве, две пуггала̄ локе уппаджджама̄на̄ уппаджджанти бахуджанахита̄йа бахуджанасукха̄йа, бахуно джанасса аттха̄йа хита̄йа сукха̄йа деваманусса̄на’’нти.

54. ‘‘двеме, бхиккхаве, пуггала̄ локе уппаджджама̄на̄ уппаджджанти аччхарийаманусса̄. катаме две? татха̄гато ча арахам̣ самма̄самбуддхо, ра̄джа̄ ча чаккаваттӣ. име кхо, бхиккхаве, две пуггала̄ локе уппаджджама̄на̄ уппаджджанти аччхарийаманусса̄’’ти.

55. ‘‘двиннам̣, бхиккхаве, пуггала̄нам̣ ка̄лакирийа̄ бахуно джанасса анутаппа̄ хоти. катамесам̣ двиннам̣? татха̄гатасса ча арахато самма̄самбуддхасса, ран̃н̃о ча чаккаваттисса. имесам̣ кхо, бхиккхаве, двиннам̣ пуггала̄нам̣ ка̄лакирийа̄ бахуно джанасса анутаппа̄ хотӣ’’ти.

56. ‘‘двеме, бхиккхаве, тхӯпа̄раха̄. катаме две? татха̄гато ча арахам̣ самма̄самбуддхо, ра̄джа̄ ча чаккаваттӣ. име кхо, бхиккхаве, две тхӯпа̄раха̄’’ти.

57. ‘‘двеме, бхиккхаве, буддха̄. катаме две? татха̄гато ча арахам̣ самма̄самбуддхо, паччекабуддхо ча. име кхо, бхиккхаве, две буддха̄’’ти.

58. ‘‘двеме, бхиккхаве, асанийа̄ пхалантийа̄ на сантасанти. катаме две? бхиккху ча кхӣн̣а̄саво, хаттха̄джа̄нӣйо ча. име кхо, бхиккхаве, две асанийа̄ пхалантийа̄ на сантасантӣ’’ти.

59. ‘‘двеме, бхиккхаве, асанийа̄ пхалантийа̄ на сантасанти. катаме две? бхиккху ча кхӣн̣а̄саво, асса̄джа̄нӣйо ча. име кхо, бхиккхаве, две асанийа̄ пхалантийа̄ на сантасантӣ’’ти.

60. ‘‘двеме, бхиккхаве, асанийа̄ пхалантийа̄ на сантасанти. катаме две? бхиккху ча кхӣн̣а̄саво, сӣхо ча мигара̄джа̄. име кхо, бхиккхаве, две асанийа̄ пхалантийа̄ на сантасантӣ’’ти.

61. ‘‘двеме, бхиккхаве, аттхавасе сампассама̄на̄ ким̣пуриса̄ ма̄нусим̣ ва̄чам̣ на бха̄санти. катаме две? ма̄ ча муса̄ бхан̣имха̄, ма̄ ча парам̣ абхӯтена аббха̄чиккхимха̄ти. име кхо, бхиккхаве, две аттхавасе сампассама̄на̄ ким̣пуриса̄ ма̄нусим̣ ва̄чам̣ на бха̄сантӣ’’ти.

62. ‘‘двиннам̣ дхамма̄нам̣, бхиккхаве, атитто аппат̣ива̄но ма̄туга̄мо ка̄лам̣ кароти. катамесам̣ двиннам̣? метхунасама̄паттийа̄ ча виджа̄йанасса ча. имесам̣ кхо, бхиккхаве, двиннам̣ дхамма̄нам̣ атитто аппат̣ива̄но ма̄туга̄мо ка̄лам̣ каротӣ’’ти.

63. ‘‘асантасаннива̄сан̃ча во, бхиккхаве, десесса̄ми сантасаннива̄сан̃ча. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘катхан̃ча, бхиккхаве, асантасаннива̄со хоти, катхан̃ча асанто саннивасанти? идха, бхиккхаве, тхерасса бхиккхуно евам̣ хоти – ‘тхеропи мам̣ на вадеййа, маджджхимопи мам̣ на вадеййа, навопи мам̣ на вадеййа; тхерампа̄хам̣ на вадеййам̣, маджджхимампа̄хам̣ на вадеййам̣, навампа̄хам̣ на вадеййам̣. тхеро чепи мам̣ вадеййа ахита̄нукампӣ мам̣ вадеййа но хита̄нукампӣ, ноти нам̣ вадеййам̣ вихет̣хеййам̣ [вихесеййам̣ (сӣ. сйа̄. кам̣. пӣ.)] пассамписса наппат̣икареййам̣. маджджхимо чепи мам̣ вадеййа…пе… наво чепи мам̣ вадеййа ахита̄нукампӣ мам̣ вадеййа но хита̄нукампӣ, ноти нам̣ вадеййам̣ вихет̣хеййам̣ пассамписса наппат̣икареййам̣’. маджджхимассапи бхиккхуно евам̣ хоти…пе… навассапи бхиккхуно евам̣ хоти – ‘тхеропи мам̣ на вадеййа, маджджхимопи мам̣ на вадеййа, навопи мам̣ на вадеййа; тхерампа̄хам̣ на вадеййам̣, маджджхимампа̄хам̣ на вадеййам̣, навампа̄хам̣ на вадеййам̣. тхеро чепи мам̣ вадеййа ахита̄нукампӣ мам̣ вадеййа но хита̄нукампӣ ноти нам̣ вадеййам̣ вихет̣хеййам̣ пассамписса наппат̣икареййам̣. маджджхимо чепи мам̣ вадеййа…пе… наво чепи мам̣ вадеййа ахита̄нукампӣ мам̣ вадеййа но хита̄нукампӣ, ноти нам̣ вадеййам̣ вихет̣хеййам̣ пассамписса наппат̣икареййам̣’. евам̣ кхо, бхиккхаве, асантасаннива̄со хоти, еван̃ча асанто саннивасанти.

‘‘катхан̃ча, бхиккхаве, сантасаннива̄со хоти, катхан̃ча санто саннивасанти? идха, бхиккхаве, тхерасса бхиккхуно евам̣ хоти – ‘тхеропи мам̣ вадеййа, маджджхимопи мам̣ вадеййа, навопи мам̣ вадеййа; тхерампа̄хам̣ вадеййам̣, маджджхимампа̄хам̣ вадеййам̣, навампа̄хам̣ вадеййам̣. тхеро чепи мам̣ вадеййа хита̄нукампӣ мам̣ вадеййа но ахита̄нукампӣ, са̄дхӯти нам̣ вадеййам̣ на вихет̣хеййам̣ пассамписса пат̣икареййам̣. маджджхимо чепи мам̣ вадеййа…пе… наво чепи мам̣ вадеййа хита̄нукампӣ мам̣ вадеййа но ахита̄нукампӣ, са̄дхӯти нам̣ вадеййам̣ на нам̣ вихет̣хеййам̣ пассамписса пат̣икареййам̣’. маджджхимассапи бхиккхуно евам̣ хоти…пе… навассапи бхиккхуно евам̣ хоти – ‘тхеропи мам̣ вадеййа, маджджхимопи мам̣ вадеййа, навопи мам̣ вадеййа; тхерампа̄хам̣ вадеййам̣, маджджхимампа̄хам̣ вадеййам̣, навампа̄хам̣ вадеййам̣. тхеро чепи мам̣ вадеййа хита̄нукампӣ мам̣ вадеййа но ахита̄нукампӣ, са̄дхӯти нам̣ вадеййам̣ на нам̣ вихет̣хеййам̣ пассамписса пат̣икареййам̣. маджджхимо чепи мам̣ вадеййа…пе… наво чепи мам̣ вадеййа хита̄нукампӣ мам̣ вадеййа но ахита̄нукампӣ, са̄дхӯти нам̣ вадеййам̣ на нам̣ вихет̣хеййам̣ пассамписса пат̣икареййам̣’. евам̣ кхо, бхиккхаве, сантасаннива̄со хоти, еван̃ча санто саннивасантӣ’’ти.

64. ‘‘йасмим̣, бхиккхаве, адхикаран̣е убхато вачӣсам̣са̄ро дит̣т̣хипал̣а̄со четасо а̄гха̄то аппаччайо анабхираддхи аджджхаттам̣ авӯпасантам̣ хоти, тасметам̣, бхиккхаве, адхикаран̣е па̄т̣икан̇кхам̣ – ‘дӣгхатта̄йа кхаратта̄йа ва̄л̣атта̄йа сам̣ваттиссати, бхиккхӯ ча на пха̄сум̣ [пха̄су (ка.)] вихариссанти’. йасмин̃ча кхо, бхиккхаве, адхикаран̣е убхато вачӣсам̣са̄ро дит̣т̣хипал̣а̄со четасо а̄гха̄то аппаччайо анабхираддхи аджджхаттам̣ сувӯпасантам̣ хоти, тасметам̣, бхиккхаве, адхикаран̣е па̄т̣икан̇кхам̣ – ‘на дӣгхатта̄йа кхаратта̄йа ва̄л̣атта̄йа сам̣ваттиссати, бхиккхӯ ча пха̄сум̣ вихариссантӣ’’’ти.

пуггалавагго пат̣хамо.

(7) 2. сукхавагго

65. ‘‘двема̄ни, бхиккхаве, сукха̄ни. катама̄ни две? гихисукхан̃ча паббаджитасукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ паббаджитасукха’’нти.

66. ‘‘двема̄ни, бхиккхаве, сукха̄ни. катама̄ни две? ка̄масукхан̃ча неккхаммасукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ неккхаммасукха’’нти.

67. ‘‘двема̄ни, бхиккхаве, сукха̄ни. катама̄ни две? упадхисукхан̃ча нирупадхисукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ нирупадхисукха’’нти.

68. ‘‘двема̄ни, бхиккхаве, сукха̄ни. катама̄ни две? са̄савасукхан̃ча ана̄савасукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ ана̄савасукха’’нти.

69. ‘‘двема̄ни, бхиккхаве, сукха̄ни. катама̄ни две? са̄мисан̃ча сукхам̣ нира̄мисан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ нира̄мисам̣ сукха’’нти.

70. ‘‘двема̄ни, бхиккхаве, сукха̄ни. катама̄ни две? арийасукхан̃ча анарийасукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ арийасукха’’нти.

71. ‘‘двема̄ни, бхиккхаве, сукха̄ни. катама̄ни две? ка̄йикан̃ча сукхам̣ четасикан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ четасикам̣ сукха’’нти.

72. ‘‘двема̄ни, бхиккхаве, сукха̄ни. катама̄ни две? саппӣтикан̃ча сукхам̣ ниппӣтикан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ ниппӣтикам̣ сукха’’нти.

73. ‘‘двема̄ни, бхиккхаве, сукха̄ни. катама̄ни две? са̄тасукхан̃ча упеккха̄сукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ упеккха̄сукха’’нти.

74. ‘‘двема̄ни, бхиккхаве, сукха̄ни. катама̄ни две? сама̄дхисукхан̃ча асама̄дхисукхан̃ча. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ сама̄дхисукха’’нти.

75. ‘‘двема̄ни, бхиккхаве, сукха̄ни. катама̄ни две? саппӣтика̄рамман̣ан̃ча сукхам̣ ниппӣтика̄рамман̣ан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ ниппӣтика̄рамман̣ам̣ сукха’’нти.

76. ‘‘двема̄ни, бхиккхаве, сукха̄ни. катама̄ни две? са̄та̄рамман̣ан̃ча сукхам̣ упеккха̄рамман̣ан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ упеккха̄рамман̣ам̣ сукха’’нти.

77. ‘‘двема̄ни, бхиккхаве, сукха̄ни. катама̄ни две? рӯпа̄рамман̣ан̃ча сукхам̣ арӯпа̄рамман̣ан̃ча сукхам̣. има̄ни кхо, бхиккхаве, две сукха̄ни. етадаггам̣, бхиккхаве, имесам̣ двиннам̣ сукха̄нам̣ йадидам̣ арӯпа̄рамман̣ам̣ сукха’’нти.

сукхавагго дутийо.

(8) 3. санимиттавагго

78. ‘‘санимитта̄, бхиккхаве, уппаджджанти па̄пака̄ акусала̄ дхамма̄, но анимитта̄. тассева нимиттасса паха̄на̄ евам̣ те па̄пака̄ акусала̄ дхамма̄ на хонтӣ’’ти.

79. ‘‘санида̄на̄, бхиккхаве, уппаджджанти па̄пака̄ акусала̄ дхамма̄, но анида̄на̄. тассева нида̄насса паха̄на̄ евам̣ те па̄пака̄ акусала̄ дхамма̄ на хонтӣ’’ти.

80. ‘‘сахетука̄, бхиккхаве, уппаджджанти па̄пака̄ акусала̄ дхамма̄, но ахетука̄. тассева хетусса паха̄на̄ евам̣ те па̄пака̄ акусала̄ дхамма̄ на хонтӣ’’ти.

81. ‘‘сасан̇кха̄ра̄, бхиккхаве, уппаджджанти па̄пака̄ акусала̄ дхамма̄, но асан̇кха̄ра̄. тесам̣йева сан̇кха̄ра̄нам̣ паха̄на̄ евам̣ те па̄пака̄ акусала̄ дхамма̄ на хонтӣ’’ти.

82. ‘‘саппаччайа̄, бхиккхаве, уппаджджанти па̄пака̄ акусала̄ дхамма̄, но аппаччайа̄. тассева паччайасса паха̄на̄ евам̣ те па̄пака̄ акусала̄ дхамма̄ на хонтӣ’’ти.

83. ‘‘сарӯпа̄, бхиккхаве, уппаджджанти па̄пака̄ акусала̄ дхамма̄, но арӯпа̄. тассева рӯпасса паха̄на̄ евам̣ те па̄пака̄ акусала̄ дхамма̄ на хонтӣ’’ти.

84. ‘‘саведана̄, бхиккхаве, уппаджджанти па̄пака̄ акусала̄ дхамма̄, но аведана̄. тасса̄йева ведана̄йа паха̄на̄ евам̣ те па̄пака̄ акусала̄ дхамма̄ на хонтӣ’’ти.

85. ‘‘сасан̃н̃а̄, бхиккхаве, уппаджджанти па̄пака̄ акусала̄ дхамма̄, но асан̃н̃а̄. тасса̄йева сан̃н̃а̄йа паха̄на̄ евам̣ те па̄пака̄ акусала̄ дхамма̄ на хонтӣ’’ти.

86. ‘‘савин̃н̃а̄н̣а̄, бхиккхаве, уппаджджанти па̄пака̄ акусала̄ дхамма̄, но авин̃н̃а̄н̣а̄. тассева вин̃н̃а̄н̣асса паха̄на̄ евам̣ те па̄пака̄ акусала̄ дхамма̄ на хонтӣ’’ти.

87. ‘‘сан̇кхата̄рамман̣а̄, бхиккхаве, уппаджджанти па̄пака̄ акусала̄ дхамма̄, но асан̇кхата̄рамман̣а̄. тассева сан̇кхатасса паха̄на̄ евам̣ те па̄пака̄ акусала̄ дхамма̄ на хонтӣ’’ти.

санимиттавагго татийо.

(9) 4. дхаммавагго

88. ‘‘двеме, бхиккхаве, дхамма̄. катаме две? четовимутти ча пан̃н̃а̄вимутти ча. име кхо, бхиккхаве, две дхамма̄’’ти.

89. ‘‘двеме, бхиккхаве, дхамма̄. катаме две? пагга̄хо ча авиккхепо ча. име кхо, бхиккхаве, две дхамма̄’’ти.

90. ‘‘двеме, бхиккхаве, дхамма̄. катаме две? на̄ман̃ча рӯпан̃ча. име кхо, бхиккхаве, две дхамма̄’’ти.

91. ‘‘двеме, бхиккхаве, дхамма̄. катаме две? виджджа̄ ча вимутти ча. име кхо, бхиккхаве, две дхамма̄’’ти.

92. ‘‘двеме, бхиккхаве, дхамма̄. катаме две? бхавадит̣т̣хи ча вибхавадит̣т̣хи ча. име кхо, бхиккхаве, две дхамма̄’’ти.

93. ‘‘двеме, бхиккхаве, дхамма̄. катаме две? ахирикан̃ча аноттаппан̃ча. име кхо, бхиккхаве, две дхамма̄’’ти.

94. ‘‘двеме, бхиккхаве, дхамма̄. катаме две? хирӣ ча оттаппан̃ча. име кхо, бхиккхаве, две дхамма̄’’ти.

95. ‘‘двеме, бхиккхаве, дхамма̄. катаме две? довачассата̄ ча па̄памиттата̄ ча. име кхо, бхиккхаве, две дхамма̄’’ти.

96. ‘‘двеме, бхиккхаве, дхамма̄. катаме две? совачассата̄ ча калйа̄н̣амиттата̄ ча. име кхо, бхиккхаве, две дхамма̄’’ти.

97. ‘‘двеме, бхиккхаве, дхамма̄. катаме две? дха̄тукусалата̄ ча манасика̄ракусалата̄ ча. име кхо, бхиккхаве, две дхамма̄’’ти.

98. ‘‘двеме, бхиккхаве, дхамма̄. катаме две? а̄паттикусалата̄ ча а̄паттивут̣т̣ха̄накусалата̄ ча. име кхо, бхиккхаве, две дхамма̄’’ти.

дхаммавагго чатуттхо.

(10) 5. ба̄лавагго

99. ‘‘двеме, бхиккхаве, ба̄ла̄. катаме две? йо ча ана̄гатам̣ бха̄рам̣ вахати, йо ча а̄гатам̣ бха̄рам̣ на вахати. име кхо, бхиккхаве, две ба̄ла̄’’ти.

100. ‘‘двеме, бхиккхаве, пан̣д̣ита̄. катаме две? йо ча ана̄гатам̣ бха̄рам̣ на вахати, йо ча а̄гатам̣ бха̄рам̣ вахати. име кхо, бхиккхаве, две пан̣д̣ита̄’’ти.

101. ‘‘двеме, бхиккхаве, ба̄ла̄. катаме две? йо ча акаппийе каппийасан̃н̃ӣ, йо ча каппийе акаппийасан̃н̃ӣ. име кхо, бхиккхаве, две ба̄ла̄’’ти.

102. ‘‘двеме, бхиккхаве, пан̣д̣ита̄. катаме две? йо ча акаппийе акаппийасан̃н̃ӣ, йо ча каппийе каппийасан̃н̃ӣ. име кхо, бхиккхаве, две пан̣д̣ита̄’’ти.

103. ‘‘двеме, бхиккхаве, ба̄ла̄. катаме две? йо ча ана̄паттийа̄ а̄паттисан̃н̃ӣ, йо ча а̄паттийа̄ ана̄паттисан̃н̃ӣ. име кхо, бхиккхаве, две ба̄ла̄’’ти.

104. ‘‘двеме, бхиккхаве, пан̣д̣ита̄. катаме две? йо ча ана̄паттийа̄ ана̄паттисан̃н̃ӣ, йо ча а̄паттийа̄ а̄паттисан̃н̃ӣ. име кхо, бхиккхаве, две пан̣д̣ита̄’’ти.

105. ‘‘двеме, бхиккхаве, ба̄ла̄. катаме две? йо ча адхамме дхаммасан̃н̃ӣ, йо ча дхамме адхаммасан̃н̃ӣ. име кхо, бхиккхаве, две ба̄ла̄’’ти.

106. ‘‘двеме, бхиккхаве, пан̣д̣ита̄. катаме две? йо ча дхамме дхаммасан̃н̃ӣ, йо ча адхамме адхаммасан̃н̃ӣ. име кхо, бхиккхаве, две пан̣д̣ита̄’’ти.

107. ‘‘двеме, бхиккхаве, ба̄ла̄. катаме две? йо ча авинайе винайасан̃н̃ӣ, йо ча винайе авинайасан̃н̃ӣ. име кхо, бхиккхаве, две ба̄ла̄’’ти.

108. ‘‘двеме, бхиккхаве, пан̣д̣ита̄. катаме две? йо ча авинайе авинайасан̃н̃ӣ, йо ча винайе винайасан̃н̃ӣ. име кхо, бхиккхаве, две пан̣д̣ита̄’’ти.

109. ‘‘двиннам̣, бхиккхаве, а̄сава̄ вад̣д̣ханти. катамесам̣ двиннам̣? йо ча на куккучча̄йитаббам̣ куккучча̄йати, йо ча куккучча̄йитаббам̣ на куккучча̄йати. имесам̣ кхо, бхиккхаве, двиннам̣ а̄сава̄ вад̣д̣хантӣ’’ти.

110. ‘‘двиннам̣, бхиккхаве, а̄сава̄ на вад̣д̣ханти. катамесам̣ двиннам̣? йо ча на куккучча̄йитаббам̣ на куккучча̄йати, йо ча куккучча̄йитаббам̣ куккучча̄йати. имесам̣ кхо, бхиккхаве, двиннам̣ а̄сава̄ на вад̣д̣хантӣ’’ти.

111. ‘‘двиннам̣, бхиккхаве, а̄сава̄ вад̣д̣ханти. катамесам̣ двиннам̣? йо ча акаппийе каппийасан̃н̃ӣ, йо ча каппийе акаппийасан̃н̃ӣ. имесам̣ кхо, бхиккхаве, двиннам̣ а̄сава̄ вад̣д̣хантӣ’’ти.

112. ‘‘двиннам̣, бхиккхаве, а̄сава̄ на вад̣д̣ханти. катамесам̣ двиннам̣? йо ча акаппийе акаппийасан̃н̃ӣ, йо ча каппийе каппийасан̃н̃ӣ. имесам̣ кхо, бхиккхаве, двиннам̣ а̄сава̄ на вад̣д̣хантӣ’’ти.

113. ‘‘двиннам̣, бхиккхаве, а̄сава̄ вад̣д̣ханти. катамесам̣ двиннам̣? йо ча а̄паттийа̄ ана̄паттисан̃н̃ӣ, йо ча ана̄паттийа̄ а̄паттисан̃н̃ӣ. имесам̣ кхо, бхиккхаве, двиннам̣ а̄сава̄ вад̣д̣хантӣ’’ти.

114. ‘‘двиннам̣, бхиккхаве, а̄сава̄ на вад̣д̣ханти. катамесам̣ двиннам̣? йо ча а̄паттийа̄ а̄паттисан̃н̃ӣ, йо ча ана̄паттийа̄ ана̄паттисан̃н̃ӣ. имесам̣ кхо, бхиккхаве, двиннам̣ а̄сава̄ на вад̣д̣хантӣ’’ти.

115. ‘‘двиннам̣, бхиккхаве, а̄сава̄ вад̣д̣ханти. катамесам̣ двиннам̣? йо ча адхамме дхаммасан̃н̃ӣ, йо ча дхамме адхаммасан̃н̃ӣ. имесам̣ кхо, бхиккхаве, двиннам̣ а̄сава̄ вад̣д̣хантӣ’’ти.

116. ‘‘двиннам̣, бхиккхаве, а̄сава̄ на вад̣д̣ханти. катамесам̣ двиннам̣? йо ча дхамме дхаммасан̃н̃ӣ, йо ча адхамме адхаммасан̃н̃ӣ. имесам̣ кхо, бхиккхаве, двиннам̣ а̄сава̄ на вад̣д̣хантӣ’’ти.

117. ‘‘двиннам̣, бхиккхаве, а̄сава̄ вад̣д̣ханти. катамесам̣ двиннам̣? йо ча авинайе винайасан̃н̃ӣ, йо ча винайе авинайасан̃н̃ӣ. имесам̣ кхо, бхиккхаве, двиннам̣ а̄сава̄ вад̣д̣хантӣ’’ти.

118. ‘‘двиннам̣, бхиккхаве, а̄сава̄ на вад̣д̣ханти. катамесам̣ двиннам̣? йо ча авинайе авинайасан̃н̃ӣ, йо ча винайе винайасан̃н̃ӣ. имесам̣ кхо, бхиккхаве, двиннам̣ а̄сава̄ на вад̣д̣хантӣ’’ти.

ба̄лавагго пан̃чамо.

дутийо пан̣н̣а̄сако саматто.