3. сан̇га̄равасуттам̣

169. [а. ни. 10.117] атха кхо сан̇га̄раво бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо сан̇га̄раво бра̄хман̣о бхагавантам̣ етадавоча –

‘‘ким̣ ну кхо, бхо готама, оримам̣ тӣрам̣, ким̣ па̄римам̣ тӣра’’нти? ‘‘па̄н̣а̄типа̄то кхо, бра̄хман̣а, оримам̣ тӣрам̣, па̄н̣а̄типа̄та̄ вераман̣ӣ па̄римам̣ тӣрам̣. адинна̄да̄нам̣ кхо, бра̄хман̣а, оримам̣ тӣрам̣, адинна̄да̄на̄ вераман̣ӣ па̄римам̣ тӣрам̣. ка̄месумиччха̄ча̄ро оримам̣ тӣрам̣, ка̄месумиччха̄ча̄ра̄ вераман̣ӣ па̄римам̣ тӣрам̣. муса̄ва̄до оримам̣ тӣрам̣, муса̄ва̄да̄ вераман̣ӣ па̄римам̣ тӣрам̣. писун̣а̄ ва̄ча̄ оримам̣ тӣрам̣, писун̣а̄йа ва̄ча̄йа вераман̣ӣ па̄римам̣ тӣрам̣. пхаруса̄ ва̄ча̄ оримам̣ тӣрам̣, пхаруса̄йа ва̄ча̄йа вераман̣ӣ па̄римам̣ тӣрам̣. сампхаппала̄по оримам̣ тӣрам̣, сампхаппала̄па̄ вераман̣ӣ па̄римам̣ тӣрам̣. абхиджджха̄ оримам̣ тӣрам̣, анабхиджджха̄ па̄римам̣ тӣрам̣. бйа̄па̄до оримам̣ тӣрам̣, абйа̄па̄до па̄римам̣ тӣрам̣. миччха̄дит̣т̣хи оримам̣ тӣрам̣, самма̄дит̣т̣хи па̄римам̣ тӣрам̣. идам̣ кхо, бра̄хман̣а, оримам̣ тӣрам̣, идам̣ па̄римам̣ тӣранти.

‘‘аппака̄ те мануссесу, йе джана̄ па̄рага̄мино;

атха̄йам̣ итара̄ паджа̄, тӣрамева̄нудха̄вати.

‘‘йе ча кхо саммадаккха̄те, дхамме дхамма̄нуваттино;

те джана̄ па̄рамессанти, маччудхеййам̣ судуттарам̣.

‘‘кан̣хам̣ дхаммам̣ виппаха̄йа, суккам̣ бха̄ветха пан̣д̣ито;

ока̄ анокама̄гамма, вивеке йаттха дӯрамам̣.

‘‘татра̄бхиратимиччхеййа, хитва̄ ка̄ме акин̃чано;

парийодапеййа атта̄нам̣, читтаклесехи пан̣д̣ито.

‘‘йесам̣ самбодхийан̇гесу, самма̄ читтам̣ субха̄витам̣;

а̄да̄напат̣иниссагге, анупа̄да̄йа йе рата̄;

кхӣн̣а̄сава̄ джутиманто, те локе париниббута̄’’ти. татийам̣;