9. паббаджджа̄суттам̣

59. ‘‘тасма̄тиха, бхиккхаве, евам̣ сиккхитаббам̣ – ‘йатха̄паббаджджа̄паричитан̃ча но читтам̣ бхависсати, на чуппанна̄ па̄пака̄ акусала̄ дхамма̄ читтам̣ парийа̄да̄йа т̣хассанти; аниччасан̃н̃а̄паричитан̃ча но читтам̣ бхависсати, анаттасан̃н̃а̄паричитан̃ча но читтам̣ бхависсати, асубхасан̃н̃а̄паричитан̃ча но читтам̣ бхависсати, а̄дӣнавасан̃н̃а̄паричитан̃ча но читтам̣ бхависсати, локасса саман̃ча висаман̃ча н̃атва̄ там̣сан̃н̃а̄паричитан̃ча но читтам̣ бхависсати, локасса бхаван̃ча [самбхаван̃ча (сӣ. сйа̄.)] вибхаван̃ча н̃атва̄ там̣сан̃н̃а̄паричитан̃ча но читтам̣ бхависсати, локасса самудайан̃ча аттхан̇гаман̃ча н̃атва̄ там̣сан̃н̃а̄паричитан̃ча но читтам̣ бхависсати, паха̄насан̃н̃а̄паричитан̃ча но читтам̣ бхависсати, вира̄гасан̃н̃а̄паричитан̃ча но читтам̣ бхависсати, ниродхасан̃н̃а̄паричитан̃ча но читтам̣ бхависсатӣ’ти – еван̃хи во, бхиккхаве, сиккхитаббам̣.

‘‘йато кхо, бхиккхаве, бхиккхуно йатха̄паббаджджа̄паричитан̃ча читтам̣ хоти на чуппанна̄ па̄пака̄ акусала̄ дхамма̄ читтам̣ парийа̄да̄йа тит̣т̣ханти, аниччасан̃н̃а̄паричитан̃ча читтам̣ хоти, анаттасан̃н̃а̄паричитан̃ча читтам̣ хоти, асубхасан̃н̃а̄паричитан̃ча читтам̣ хоти, а̄дӣнавасан̃н̃а̄паричитан̃ча читтам̣ хоти, локасса саман̃ча висаман̃ча н̃атва̄ там̣сан̃н̃а̄паричитан̃ча читтам̣ хоти, локасса бхаван̃ча вибхаван̃ча н̃атва̄ там̣сан̃н̃а̄паричитан̃ча читтам̣ хоти, локасса самудайан̃ча аттхан̇гаман̃ча н̃атва̄ там̣сан̃н̃а̄паричитан̃ча читтам̣ хоти, паха̄насан̃н̃а̄паричитан̃ча читтам̣ хоти, вира̄гасан̃н̃а̄паричитан̃ча читтам̣ хоти, ниродхасан̃н̃а̄паричитан̃ча читтам̣ хоти, тасса двиннам̣ пхала̄нам̣ ан̃н̃атарам̣ пхалам̣ па̄т̣икан̇кхам̣ – дит̣т̣хева дхамме ан̃н̃а̄, сати ва̄ упа̄дисесе ана̄га̄мита̄’’ти. навамам̣.