8. паббаджитаабхин̣хасуттам̣

48. ‘‘дасайиме, бхиккхаве, дхамма̄ паббаджитена абхин̣хам̣ паччавеккхитабба̄. катаме даса? ‘веван̣н̣ийамхи аджджхупагато’ти паббаджитена абхин̣хам̣ паччавеккхитаббам̣; ‘парапат̣ибаддха̄ ме джӣвика̄’ти паббаджитена абхин̣хам̣ паччавеккхитаббам̣; ‘ан̃н̃о ме а̄каппо каран̣ӣйо’ти паббаджитена абхин̣хам̣ паччавеккхитаббам̣; ‘каччи ну кхо ме атта̄ сӣлато на упавадатӣ’ти паббаджитена абхин̣хам̣ паччавеккхитаббам̣; ‘каччи ну кхо мам̣ анувичча вин̃н̃ӯ сабрахмача̄рӣ сӣлато на упавадантӣ’ти паббаджитена абхин̣хам̣ паччавеккхитаббам̣; ‘саббехи ме пийехи мана̄пехи на̄на̄бха̄во вина̄бха̄во’ти паббаджитена абхин̣хам̣ паччавеккхитаббам̣; ‘каммассакомхи каммада̄йа̄до каммайони каммабандху каммапат̣исаран̣о, йам̣ каммам̣ карисса̄ми калйа̄н̣ам̣ ва̄ па̄пакам̣ ва̄ тасса да̄йа̄до бхависса̄мӣ’ти паббаджитена абхин̣хам̣ паччавеккхитаббам̣; ‘катхам̣бхӯтасса ме раттиндива̄ вӣтиваттантӣ’ти паббаджитена абхин̣хам̣ паччавеккхитаббам̣; ‘каччи ну кхо ахам̣ сун̃н̃а̄га̄ре абхирама̄мӣ’ти паббаджитена абхин̣хам̣ паччавеккхитаббам̣; ‘аттхи ну кхо ме уттари мануссадхаммо аламарийан̃а̄н̣адассанависесо адхигато, йена̄хам̣ [йохам̣ (сӣ. пӣ. ка.), сохам̣ (сйа̄.)] паччхиме ка̄ле сабрахмача̄рӣхи пут̣т̣хо на ман̇ку бхависса̄мӣ’ти паббаджитена абхин̣хам̣ паччавеккхитаббам̣. име кхо, бхиккхаве, даса дхамма̄ паббаджитена абхин̣хам̣ паччавеккхитабба̄’’ти. ат̣т̣хамам̣.