6. ка̄л̣ӣсуттам̣

26. екам̣ самайам̣ а̄йасма̄ маха̄качча̄но авантӣсу вихарати курарагхаре [гулагхаре (ка.) курурагхаре маха̄ва. 257] паватте паббате. атха кхо ка̄л̣ӣ упа̄сика̄ курарагхарика̄ йена̄йасма̄ маха̄качча̄но тенупасан̇ками; упасан̇камитва̄ а̄йасмантам̣ маха̄качча̄нам̣ абхива̄детва̄ екамантам̣ нисӣди. екамантам̣ нисинна̄ кхо ка̄л̣ӣ упа̄сика̄ курарагхарика̄ а̄йасмантам̣ маха̄качча̄нам̣ етадавоча – ‘‘вуттамидам̣, бханте, бхагавата̄ кума̄рипан̃хесу –

‘аттхасса паттим̣ хадайасса сантим̣,

джетва̄на сенам̣ пийаса̄тарӯпам̣;

екохам̣ [ека̄хам̣ (ка.)] джха̄йам̣ сукхаманубодхим̣,

тасма̄ джанена на кароми саккхим̣ [сакхим̣ (ка.) сам̣. ни. 1.161 пасситаббам̣];

саккхӣ [сакхӣ (ка.)] на сампаджджати кеначи ме’ти.

‘‘имасса кхо, бханте, бхагавата̄ сам̣кхиттена бха̄ситасса катхам̣ виттха̄рена аттхо дат̣т̣хаббо’’ти?

‘‘патхавӣкасин̣асама̄паттипарама̄ кхо, бхагини, еке саман̣абра̄хман̣а̄ ‘аттхо’ти абхиниббаттесум̣ [аттха̄бхиниббаттесум̣ (сӣ. сйа̄.)]. йа̄вата̄ кхо, бхагини, патхавӣкасин̣асама̄паттипарамата̄, тадабхин̃н̃а̄си бхагава̄. тадабхин̃н̃а̄йа бхагава̄ асса̄дамаддаса [а̄димаддаса (сӣ. сйа̄.)] а̄дӣнавамаддаса ниссаран̣амаддаса магга̄магган̃а̄н̣адассанамаддаса. тасса асса̄дадассанахету а̄дӣнавадассанахету ниссаран̣адассанахету магга̄магган̃а̄н̣адассанахету аттхасса патти хадайасса санти видита̄ хоти.

‘‘а̄покасин̣асама̄паттипарама̄ кхо, бхагини…пе… теджокасин̣асама̄паттипарама̄ кхо, бхагини… ва̄йокасин̣асама̄паттипарама̄ кхо, бхагини… нӣлакасин̣асама̄паттипарама̄ кхо, бхагини… пӣтакасин̣асама̄паттипарама̄ кхо, бхагини… лохитакасин̣асама̄паттипарама̄ кхо, бхагини… ода̄такасин̣асама̄паттипарама̄ кхо, бхагини… а̄ка̄сакасин̣асама̄паттипарама̄ кхо, бхагини… вин̃н̃а̄н̣акасин̣асама̄паттипарама̄ кхо, бхагини, еке саман̣абра̄хман̣а̄ ‘аттхо’ти абхиниббаттесум̣. йа̄вата̄ кхо, бхагини, вин̃н̃а̄н̣акасин̣асама̄паттипарамата̄, тадабхин̃н̃а̄си бхагава̄. тадабхин̃н̃а̄йа бхагава̄ асса̄дамаддаса а̄дӣнавамаддаса ниссаран̣амаддаса магга̄магган̃а̄н̣адассанамаддаса. тасса асса̄дадассанахету а̄дӣнавадассанахету ниссаран̣адассанахету магга̄магган̃а̄н̣адассанахету аттхасса патти хадайасса санти видита̄ хоти. ити кхо, бхагини, йам̣ там̣ вуттам̣ бхагавата̄ кума̄рипан̃хесу –

‘аттхасса паттим̣ хадайасса сантим̣,

джетва̄на сенам̣ пийаса̄тарӯпам̣;

екохам̣ джха̄йам̣ сукхаманубодхим̣,

тасма̄ джанена на кароми саккхим̣;

саккхӣ на сампаджджати кеначи ме’ти.

‘‘имасса кхо, бхагини, бхагавата̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти. чхат̣т̣хам̣.