2. пан̃чан̇гасуттам̣

12. ‘‘пан̃чан̇гавиппахӣно, бхиккхаве, бхиккху пан̃чан̇гасаманна̄гато имасмим̣ дхаммавинайе ‘кевалӣ вуситава̄ уттамапурисо’ти вуччати. катхан̃ча, бхиккхаве, бхиккху пан̃чан̇гавиппахӣно хоти? идха, бхиккхаве, бхиккхуно ка̄маччхандо пахӣно хоти, бйа̄па̄до пахӣно хоти, тхинамиддхам̣ [тхӣнамиддхам̣ (сӣ. сйа̄. пӣ.)] пахӣнам̣ хоти, уддхаччакуккуччам̣ пахӣнам̣ хоти, вичикиччха̄ пахӣна̄ хоти. евам̣ кхо, бхиккхаве, бхиккху пан̃чан̇гавиппахӣно хоти.

‘‘катхан̃ча, бхиккхаве, бхиккху пан̃чан̇гасаманна̄гато хоти? идха, бхиккхаве, бхиккху асекхена сӣлаккхандхена саманна̄гато хоти, асекхена сама̄дхиккхандхена саманна̄гато хоти, асекхена пан̃н̃а̄ккхандхена саманна̄гато хоти, асекхена вимуттиккхандхена саманна̄гато хоти, асекхена вимуттин̃а̄н̣адассанаккхандхена саманна̄гато хоти. евам̣ кхо, бхиккхаве, бхиккху пан̃чан̇гасаманна̄гато хоти.

‘‘пан̃чан̇гавиппахӣно кхо, бхиккхаве, бхиккху пан̃чан̇гасаманна̄гато имасмим̣ дхаммавинайе ‘кевалӣ вуситава̄ уттамапурисо’ти вуччати.

‘‘ка̄маччхандо ча бйа̄па̄до, тхинамиддхан̃ча бхиккхуно;

уддхаччам̣ вичикиччха̄ ча, саббасова на виджджати.

‘‘асекхена ча сӣлена, асекхена сама̄дхина̄;

вимуттийа̄ ча сампанно, н̃а̄н̣ена ча татха̄видхо.

‘‘са ве пан̃чан̇гасампанно, пан̃ча ан̇ге [пан̃чан̇га̄ни (сйа̄.)] виваджджайам̣ [виваджджийа (ка.)];

имасмим̣ дхаммавинайе, кевалӣ ити вуччатӣ’’ти. дутийам̣;