𑁧. 𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸

𑁩𑁫𑁯. 𑀘𑁄𑀤𑀦𑀸 𑀓𑀺𑀫𑀢𑁆𑀣𑀸𑀬, 𑀲𑀸𑀭𑀡𑀸 𑀓𑀺𑀲𑁆𑀲 𑀓𑀸𑀭𑀡𑀸;

𑀲𑀗𑁆𑀖𑁄 𑀓𑀺𑀫𑀢𑁆𑀣𑀸𑀬, 𑀫𑀢𑀺𑀓𑀫𑁆𑀫𑀁 𑀧𑀦 𑀓𑀺𑀲𑁆𑀲 𑀓𑀸𑀭𑀡𑀸.

𑀘𑁄𑀤𑀦𑀸 𑀲𑀸𑀭𑀡𑀢𑁆𑀣𑀸𑀬, 𑀦𑀺𑀕𑁆𑀕𑀳𑀢𑁆𑀣𑀸𑀬 𑀲𑀸𑀭𑀡𑀸;

𑀲𑀗𑁆𑀖𑁄 𑀧𑀭𑀺𑀕𑁆𑀕𑀳𑀢𑁆𑀣𑀸𑀬, 𑀫𑀢𑀺𑀓𑀫𑁆𑀫𑀁 𑀧𑀦 𑀧𑀸𑀝𑀺𑀬𑁂𑀓𑁆𑀓𑀁.

𑀫𑀸 𑀔𑁄 𑀢𑀼𑀭𑀺𑀢𑁄 𑀅𑀪𑀡𑀺, 𑀫𑀸 𑀔𑁄 𑀘𑀡𑁆𑀟𑀺𑀓𑀢𑁄 𑀪𑀡𑀺;

𑀫𑀸 𑀔𑁄 𑀧𑀝𑀺𑀖𑀁 𑀚𑀦𑀬𑀺, 𑀲𑀘𑁂 𑀅𑀦𑀼𑀯𑀺𑀚𑁆𑀚𑀓𑁄 𑀢𑀼𑀯𑀁.

𑀫𑀸 𑀔𑁄 𑀲𑀳𑀲𑀸 𑀅𑀪𑀡𑀺, 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀅𑀦𑀢𑁆𑀣𑀲𑀁𑀳𑀺𑀢𑀁;

𑀲𑀼𑀢𑁆𑀢𑁂 𑀯𑀺𑀦𑀬𑁂 𑀅𑀦𑀼𑀮𑁄𑀫𑁂, 𑀧𑀜𑁆𑀜𑀢𑁆𑀢𑁂 𑀅𑀦𑀼𑀮𑁄𑀫𑀺𑀓𑁂.

𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀺𑀲𑀸𑀫𑀬, 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸 𑀓𑀢𑀁;

𑀲𑀼𑀯𑀼𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀼𑀮𑁄𑀫𑀺𑀓𑀁, 𑀕𑀢𑀺𑀁 𑀦 𑀦𑀸𑀲𑁂𑀦𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑀁;

𑀳𑀺𑀢𑁂𑀲𑀻 𑀅𑀦𑀼𑀬𑀼𑀜𑁆𑀚𑀲𑁆𑀲𑀼, 𑀓𑀸𑀮𑁂𑀦𑀢𑁆𑀣𑀽𑀧𑀲𑀁𑀳𑀺𑀢𑀁.

𑀘𑀼𑀤𑀺𑀢𑀲𑁆𑀲 𑀘 𑀘𑁄𑀤𑀓𑀲𑁆𑀲 𑀘;

𑀲𑀳𑀲𑀸 𑀯𑁄𑀳𑀸𑀭𑀁 𑀫𑀸 𑀧𑀥𑀸𑀭𑁂𑀲𑀺;

𑀘𑁄𑀤𑀓𑁄 𑀆𑀳 𑀆𑀧𑀦𑁆𑀦𑁄𑀢𑀺;

𑀘𑀼𑀤𑀺𑀢𑀓𑁄 𑀆𑀳 𑀅𑀦𑀸𑀧𑀦𑁆𑀦𑁄𑀢𑀺.

𑀉𑀪𑁄 𑀅𑀦𑀼𑀓𑁆𑀔𑀺𑀧𑀦𑁆𑀢𑁄, 𑀧𑀝𑀺𑀜𑁆𑀜𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂;

𑀧𑀝𑀺𑀜𑁆𑀜𑀸 𑀮𑀚𑁆𑀚𑀻𑀲𑀼 𑀓𑀢𑀸, 𑀅𑀮𑀚𑁆𑀚𑀻𑀲𑀼 𑀏𑀯𑀁 𑀦 𑀯𑀺𑀚𑁆𑀚𑀢𑀺;

𑀩𑀳𑀼𑀫𑁆𑀧𑀺 𑀅𑀮𑀚𑁆𑀚𑀻 𑀪𑀸𑀲𑁂𑀬𑁆𑀬, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 [𑀯𑀼𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 (𑀲𑀻. 𑀲𑁆𑀬𑀸. 𑀓.)] 𑀓𑀸𑀭𑀬𑁂.

𑀅𑀮𑀚𑁆𑀚𑀻 𑀓𑀻𑀤𑀺𑀲𑁄 𑀳𑁄𑀢𑀺, 𑀧𑀝𑀺𑀜𑁆𑀜𑀸 𑀬𑀲𑁆𑀲 𑀦 𑀭𑀽𑀳𑀢𑀺;

𑀏𑀢𑀜𑁆𑀘 [𑀏𑀯𑀜𑁆𑀘 (𑀓.)] 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀻 𑀧𑀼𑀕𑁆𑀕𑀮𑁄.

𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀻𑀧𑀼𑀕𑁆𑀕𑀮𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀻𑀧𑀼𑀕𑁆𑀕𑀮𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁄.

𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀁 𑀦 𑀕𑀘𑁆𑀙𑀢𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀥𑀫𑁆𑀫𑀘𑁄𑀤𑀓𑁄.

𑀅𑀓𑀸𑀮𑁂 𑀘𑁄𑀤𑁂𑀢𑀺 𑀅𑀪𑀽𑀢𑁂𑀦;

𑀨𑀭𑀼𑀲𑁂𑀦 𑀅𑀦𑀢𑁆𑀣𑀲𑀁𑀳𑀺𑀢𑁂𑀦;

𑀤𑁄𑀲𑀦𑁆𑀢𑀭𑁄 𑀘𑁄𑀤𑁂𑀢𑀺 𑀦𑁄 𑀫𑁂𑀢𑁆𑀢𑀸𑀘𑀺𑀢𑁆𑀢𑁄;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀥𑀫𑁆𑀫𑀘𑁄𑀤𑀓𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀥𑀫𑁆𑀫𑀘𑁄𑀤𑀓𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀥𑀫𑁆𑀫𑀘𑁄𑀤𑀓𑁄.

𑀓𑀸𑀮𑁂𑀦 𑀘𑁄𑀤𑁂𑀢𑀺 𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀅𑀢𑁆𑀣𑀲𑀁𑀳𑀺𑀢𑁂𑀦;

𑀫𑁂𑀢𑁆𑀢𑀸𑀘𑀺𑀢𑁆𑀢𑁄 𑀘𑁄𑀤𑁂𑀢𑀺 𑀦𑁄 𑀤𑁄𑀲𑀦𑁆𑀢𑀭𑁄;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀥𑀫𑁆𑀫𑀘𑁄𑀤𑀓𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀥𑀫𑁆𑀫𑀘𑁄𑀤𑀓𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀩𑀸𑀮𑀘𑁄𑀤𑀓𑁄.

𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀸𑀧𑀭𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀦 𑀚𑀸𑀦𑀸𑀢𑀺;

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀲𑁆𑀲 𑀅𑀓𑁄𑀯𑀺𑀤𑁄;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀩𑀸𑀮𑀘𑁄𑀤𑀓𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀩𑀸𑀮𑀘𑁄𑀤𑀓𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑁄 𑀯𑀼𑀘𑁆𑀘𑀢𑀺 𑀧𑀡𑁆𑀟𑀺𑀢𑀘𑁄𑀤𑀓𑁄.

𑀧𑀼𑀩𑁆𑀩𑀸𑀧𑀭𑀫𑁆𑀧𑀺 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀸𑀧𑀭𑀲𑁆𑀲 𑀓𑁄𑀯𑀺𑀤𑁄;

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀲𑁆𑀲 𑀓𑁄𑀯𑀺𑀤𑁄;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀧𑀡𑁆𑀟𑀺𑀢𑀘𑁄𑀤𑀓𑁄.

𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀧𑀡𑁆𑀟𑀺𑀢𑀘𑁄𑀤𑀓𑁄;

𑀅𑀜𑁆𑀜𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀘𑁄𑀤𑀦𑀸 𑀓𑀺𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺, 𑀅𑀣𑁄 𑀆𑀘𑀸𑀭𑀤𑀺𑀝𑁆𑀞𑀺𑀬𑀸;

𑀆𑀚𑀻𑀯𑁂𑀦𑀧𑀺 𑀘𑁄𑀤𑁂𑀢𑀺, 𑀘𑁄𑀤𑀦𑀸 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺.

𑀅𑀧𑀭𑀁 𑀕𑀸𑀣𑀸𑀲𑀗𑁆𑀕𑀡𑀺𑀓𑀁 𑀦𑀺𑀝𑁆𑀞𑀺𑀢𑀁.