𑀘𑁄𑀤𑀦𑀸𑀓𑀡𑁆𑀟𑀁

𑁧. 𑀅𑀦𑀼𑀯𑀺𑀚𑁆𑀚𑀓𑀅𑀦𑀼𑀬𑁄𑀕𑁄

𑁩𑁬𑁦. 𑀅𑀦𑀼𑀯𑀺𑀚𑁆𑀚𑀓𑁂 𑀘𑁄𑀤𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀲𑀺, 𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀺, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀲𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀲𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀚𑀸𑀦𑀸𑀲𑀺 𑀧𑀦𑀸𑀬𑀲𑁆𑀫𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀚𑀸𑀦𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀓𑀢𑀫𑀸 𑀧𑀦𑀸𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺? 𑀓𑀢𑀫𑀸 𑀆𑀘𑀸𑀭𑀯𑀺𑀧𑀢𑁆𑀢𑀺? 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀘𑀢𑁆𑀢𑀸𑀭𑀺 𑀘 𑀧𑀸𑀭𑀸𑀚𑀺𑀓𑀸𑀦𑀺, 𑀢𑁂𑀭𑀲 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑁋 𑀅𑀬𑀁 𑀲𑀻𑀮𑀯𑀺𑀧𑀢𑁆𑀢𑀺. 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀤𑀼𑀓𑁆𑀓𑀝𑀁, 𑀤𑀼𑀩𑁆𑀪𑀸𑀲𑀺𑀢𑀁, 𑀅𑀬𑀁 𑀆𑀘𑀸𑀭𑀯𑀺𑀧𑀢𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀲𑀺, 𑀤𑀺𑀝𑁆𑀞𑁂𑀦 𑀯𑀸 𑀘𑁄𑀤𑁂𑀲𑀺 𑀲𑀼𑀢𑁂𑀦 𑀯𑀸 𑀘𑁄𑀤𑁂𑀲𑀺 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀘𑁄𑀤𑁂𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀤𑀺𑀝𑁆𑀞𑁂𑀦 𑀯𑀸 𑀘𑁄𑀤𑁂𑀫𑀺 𑀲𑀼𑀢𑁂𑀦 𑀯𑀸 𑀘𑁄𑀤𑁂𑀫𑀺 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀘𑁄𑀤𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀤𑀺𑀝𑁆𑀞𑁂𑀦 𑀘𑁄𑀤𑁂𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞𑀁 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀓𑀤𑀸 𑀢𑁂 𑀤𑀺𑀝𑁆𑀞𑀁, 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀁 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀢𑁆𑀣 𑀘 𑀢𑁆𑀯𑀁 𑀅𑀳𑁄𑀲𑀺, 𑀓𑀢𑁆𑀣 𑀘𑀸𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀓𑀺𑀜𑁆𑀘 𑀢𑁆𑀯𑀁 𑀓𑀭𑁄𑀲𑀺, 𑀓𑀺𑀁 𑀘𑀸𑀬𑀁 𑀪𑀺𑀓𑁆𑀔𑀼 𑀓𑀭𑁄𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀤𑀺𑀝𑁆𑀞𑁂𑀦 𑀘𑁄𑀤𑁂𑀫𑀺, 𑀅𑀧𑀺 𑀘 𑀲𑀼𑀢𑁂𑀦 𑀘𑁄𑀤𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀲𑀼𑀢𑁂𑀦 𑀘𑁄𑀤𑁂𑀲𑀺, 𑀓𑀺𑀁 𑀢𑁂 𑀲𑀼𑀢𑀁, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁, 𑀓𑀤𑀸 𑀢𑁂 𑀲𑀼𑀢𑀁, 𑀓𑀢𑁆𑀣 𑀢𑁂 𑀲𑀼𑀢𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀁… 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑀁, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑀁, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑀁, 𑀉𑀧𑀸𑀲𑀓𑀲𑁆𑀲 𑀲𑀼𑀢𑀁, 𑀉𑀧𑀸𑀲𑀺𑀓𑀸𑀬 𑀲𑀼𑀢𑀁, 𑀭𑀸𑀚𑀽𑀦𑀁 𑀲𑀼𑀢𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀲𑀼𑀢𑁂𑀦 𑀘𑁄𑀤𑁂𑀫𑀺, 𑀅𑀧𑀺 𑀘 𑀧𑀭𑀺𑀲𑀗𑁆𑀓𑀸𑀬 𑀘𑁄𑀤𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀭𑀺𑀲𑀗𑁆𑀓𑀸𑀬 𑀘𑁄𑀤𑁂𑀲𑀺, 𑀓𑀺𑀁 𑀧𑀭𑀺𑀲𑀗𑁆𑀓𑀲𑀺, 𑀓𑀺𑀦𑁆𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀓𑀤𑀸 𑀧𑀭𑀺𑀲𑀗𑁆𑀓𑀲𑀺, 𑀓𑀢𑁆𑀣 𑀧𑀭𑀺𑀲𑀗𑁆𑀓𑀲𑀺, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀓𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀺𑀓𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀭𑀸𑀚𑀽𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀻’’𑀢𑀺?

𑁩𑁬𑁧. 𑀤𑀺𑀝𑁆𑀞𑀁 𑀤𑀺𑀝𑁆𑀞𑁂𑀦 𑀲𑀫𑁂𑀢𑀺 𑀤𑀺𑀝𑁆𑀞𑁂𑀦 𑀲𑀁𑀲𑀦𑁆𑀤𑀢𑁂 𑀤𑀺𑀝𑁆𑀞𑀁;

𑀤𑀺𑀝𑁆𑀞𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑀲𑀼𑀢𑀁 𑀲𑀼𑀢𑁂𑀦 𑀲𑀫𑁂𑀢𑀺 𑀲𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀲𑀼𑀢𑀁;

𑀲𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑀫𑀼𑀢𑀁 𑀫𑀼𑀢𑁂𑀦 𑀲𑀫𑁂𑀢𑀺 𑀫𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀫𑀼𑀢𑀁;

𑀫𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑁩𑁬𑁨. 𑀘𑁄𑀤𑀦𑀸𑀬 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀘𑁄𑀤𑀦𑀸𑀬 𑀑𑀓𑀸𑀲𑀓𑀫𑁆𑀫𑀁 𑀆𑀤𑀺, 𑀓𑀺𑀭𑀺𑀬𑀸 𑀫𑀚𑁆𑀛𑁂, 𑀲𑀫𑀣𑁄 𑀧𑀭𑀺𑀬𑁄𑀲𑀸𑀦𑀁. 𑀘𑁄𑀤𑀦𑀸𑀬 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀯𑀢𑁆𑀣𑀽𑀦𑀺, 𑀓𑀢𑀺 𑀪𑀽𑀫𑀺𑀬𑁄, 𑀓𑀢𑀺𑀳𑀸𑀓𑀸𑀭𑁂𑀳𑀺 𑀘𑁄𑀤𑁂𑀢𑀺? 𑀘𑁄𑀤𑀦𑀸𑀬 𑀤𑁆𑀯𑁂 𑀫𑀽𑀮𑀸𑀦𑀺, 𑀢𑀻𑀡𑀺 𑀯𑀢𑁆𑀣𑀽𑀦𑀺, 𑀧𑀜𑁆𑀘 𑀪𑀽𑀫𑀺𑀬𑁄, 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑁄𑀤𑁂𑀢𑀺. 𑀘𑁄𑀤𑀦𑀸𑀬 𑀓𑀢𑀫𑀸𑀦𑀺 𑀤𑁆𑀯𑁂 𑀫𑀽𑀮𑀸𑀦𑀺? 𑀲𑀫𑀽𑀮𑀺𑀓𑀸 𑀯𑀸 𑀅𑀫𑀽𑀮𑀺𑀓𑀸 𑀯𑀸 𑁋 𑀘𑁄𑀤𑀦𑀸𑀬 𑀇𑀫𑀸𑀦𑀺 𑀤𑁆𑀯𑁂 𑀫𑀽𑀮𑀸𑀦𑀺. 𑀘𑁄𑀤𑀦𑀸𑀬 𑀓𑀢𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺? 𑀤𑀺𑀝𑁆𑀞𑁂𑀦 𑀲𑀼𑀢𑁂𑀦 𑀧𑀭𑀺𑀲𑀗𑁆𑀓𑀸𑀬 𑁋 𑀘𑁄𑀤𑀦𑀸𑀬 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺. 𑀘𑁄𑀤𑀦𑀸 𑀓𑀢𑀫𑀸 𑀧𑀜𑁆𑀘 𑀪𑀽𑀫𑀺𑀬𑁄? 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀸𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑁋 𑀘𑁄𑀤𑀦𑀸𑀬 𑀇𑀫𑀸 𑀧𑀜𑁆𑀘 𑀪𑀽𑀫𑀺𑀬𑁄.

𑀓𑀢𑀫𑁂𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑁄𑀤𑁂𑀢𑀺? 𑀓𑀸𑀬𑁂𑀦 𑀯𑀸 𑀘𑁄𑀤𑁂𑀢𑀺 𑀯𑀸𑀘𑀸𑀬 𑀯𑀸 𑀘𑁄𑀤𑁂𑀢𑀺 𑁋 𑀇𑀫𑁂𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑁄𑀤𑁂𑀢𑀺.

𑁨. 𑀘𑁄𑀤𑀓𑀸𑀤𑀺𑀧𑀝𑀺𑀧𑀢𑁆𑀢𑀺

𑁩𑁬𑁩. 𑀘𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀘𑀼𑀤𑀺𑀢𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀘𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀘𑁄𑀤𑀓𑁂𑀦 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀸𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑁋 𑀘𑁄𑀤𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀘𑀼𑀤𑀺𑀢𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀘𑀼𑀤𑀺𑀢𑀓𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘 𑁋 𑀘𑀼𑀤𑀺𑀢𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀲𑀗𑁆𑀖𑁂𑀦 𑀑𑀢𑀺𑀡𑁆𑀡𑀸𑀦𑁄𑀢𑀺𑀡𑁆𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀅𑀦𑀼𑀯𑀺𑀚𑁆𑀚𑀓𑁂𑀦 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀅𑀦𑀼𑀯𑀺𑀚𑁆𑀚𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁩𑁬𑁪. 𑀉𑀧𑁄𑀲𑀣𑁄 𑀓𑀺𑀫𑀢𑁆𑀣𑀸𑀬, 𑀧𑀯𑀸𑀭𑀡𑀸 𑀓𑀺𑀲𑁆𑀲 𑀓𑀸𑀭𑀡𑀸;

𑀧𑀭𑀺𑀯𑀸𑀲𑁄 𑀓𑀺𑀫𑀢𑁆𑀣𑀸𑀬, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀓𑀺𑀲𑁆𑀲 𑀓𑀸𑀭𑀡𑀸;

𑀫𑀸𑀦𑀢𑁆𑀢𑀁 𑀓𑀺𑀫𑀢𑁆𑀣𑀸𑀬, 𑀅𑀩𑁆𑀪𑀸𑀦𑀁 𑀓𑀺𑀲𑁆𑀲 𑀓𑀸𑀭𑀡𑀸.

𑀉𑀧𑁄𑀲𑀣𑁄 𑀲𑀸𑀫𑀕𑁆𑀕𑀢𑁆𑀣𑀸𑀬, 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀧𑀯𑀸𑀭𑀡𑀸;

𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀢𑁆𑀣𑀸𑀬, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀦𑀺𑀕𑁆𑀕𑀳𑀢𑁆𑀣𑀸𑀬;

𑀫𑀸𑀦𑀢𑁆𑀢𑀁 𑀅𑀩𑁆𑀪𑀸𑀦𑀢𑁆𑀣𑀸𑀬, 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀅𑀩𑁆𑀪𑀸𑀦𑀁.

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀣𑁂𑀭𑁂 𑀘 𑀧𑀭𑀺𑀪𑀸𑀲𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀔𑀢𑁄 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄;

𑀦𑀺𑀭𑀬𑀁 𑀕𑀘𑁆𑀙𑀢𑀺 𑀤𑀼𑀫𑁆𑀫𑁂𑀥𑁄, 𑀦 𑀘 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄.

𑀦 𑀘 𑀆𑀫𑀺𑀲𑀁 𑀦𑀺𑀲𑁆𑀲𑀸𑀬;

𑀦 𑀘 𑀦𑀺𑀲𑁆𑀲𑀸𑀬 𑀧𑀼𑀕𑁆𑀕𑀮𑀁;

𑀉𑀪𑁄 𑀏𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸;

𑀬𑀣𑀸𑀥𑀫𑁆𑀫𑁄 𑀢𑀣𑀸 𑀓𑀭𑁂.

𑁩. 𑀘𑁄𑀤𑀓𑀲𑁆𑀲𑀅𑀢𑁆𑀢𑀛𑀸𑀧𑀦𑀁

𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘;

𑀘𑀡𑁆𑀟𑁄 𑀘 𑀧𑀭𑀺𑀪𑀸𑀲𑀓𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀉𑀧𑀓𑀡𑁆𑀡𑀓𑀁 𑀚𑀧𑁆𑀧𑀢𑀺 𑀚𑀺𑀫𑁆𑀳𑀁 𑀧𑁂𑀓𑁆𑀔𑀢𑀺;

𑀯𑀻𑀢𑀺𑀳𑀭𑀢𑀺 𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀲𑁂𑀯𑀢𑀺;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀅𑀓𑀸𑀮𑁂𑀦 𑀘𑁄𑀤𑁂𑀢𑀺 𑀅𑀪𑀽𑀢𑁂𑀦;

𑀨𑀭𑀼𑀲𑁂𑀦 𑀅𑀦𑀢𑁆𑀣𑀲𑀁𑀳𑀺𑀢𑁂𑀦;

𑀤𑁄𑀲𑀦𑁆𑀢𑀭𑁄 𑀘𑁄𑀤𑁂𑀢𑀺 𑀦𑁄 𑀫𑁂𑀢𑁆𑀢𑀸𑀘𑀺𑀢𑁆𑀢𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀥𑀫𑁆𑀫𑀸𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺;

𑀥𑀫𑁆𑀫𑀸𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀯𑀺𑀦𑀬𑀸𑀯𑀺𑀦𑀬𑀁 𑀦 𑀚𑀸𑀦𑀸𑀢𑀺;

𑀯𑀺𑀦𑀬𑀸𑀯𑀺𑀦𑀬𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀪𑀸𑀲𑀺𑀢𑀸𑀪𑀸𑀲𑀺𑀢𑀁 𑀦 𑀚𑀸𑀦𑀸𑀢𑀺;

𑀪𑀸𑀲𑀺𑀢𑀸𑀪𑀸𑀲𑀺𑀢𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀆𑀘𑀺𑀡𑁆𑀡𑀸𑀦𑀸𑀘𑀺𑀡𑁆𑀡𑀁 𑀦 𑀚𑀸𑀦𑀸𑀢𑀺;

𑀆𑀘𑀺𑀡𑁆𑀡𑀸𑀦𑀸𑀘𑀺𑀡𑁆𑀡𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀁 𑀦 𑀚𑀸𑀦𑀸𑀢𑀺;

𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺;

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀬𑀸 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀮𑀳𑀼𑀓𑀕𑀭𑀼𑀓𑀁 𑀦 𑀚𑀸𑀦𑀸𑀢𑀺;

𑀮𑀳𑀼𑀓𑀕𑀭𑀼𑀓𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀦 𑀚𑀸𑀦𑀸𑀢𑀺;

𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀦 𑀚𑀸𑀦𑀸𑀢𑀺;

𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀺;

𑀧𑀼𑀩𑁆𑀩𑀸𑀧𑀭𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀁.

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀦 𑀚𑀸𑀦𑀸𑀢𑀺;

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀲𑁆𑀲 𑀅𑀓𑁄𑀯𑀺𑀤𑁄;

𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀭𑁄𑀧𑁂𑀢𑀺;

𑀢𑀸𑀤𑀺𑀲𑁄 𑀘𑁄𑀤𑀓𑁄 𑀛𑀸𑀧𑁂𑀢𑀺 𑀅𑀢𑁆𑀢𑀸𑀦𑀦𑁆𑀢𑀺.

𑀘𑁄𑀤𑀦𑀸𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.