𑀲𑀫𑀼𑀝𑁆𑀞𑀸𑀦𑀲𑀻𑀲𑀲𑀗𑁆𑀔𑁂𑀧𑁄

𑀲𑀫𑀼𑀝𑁆𑀞𑀸𑀦𑀲𑁆𑀲𑀼𑀤𑁆𑀤𑀸𑀦𑀁

𑁨𑁫𑁭. 𑀅𑀦𑀺𑀘𑁆𑀘𑀸 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸, 𑀤𑀼𑀓𑁆𑀔𑀸𑀦𑀢𑁆𑀢𑀸 𑀘 𑀲𑀗𑁆𑀔𑀢𑀸;

𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀧𑀜𑁆𑀜𑀢𑁆𑀢𑀺, 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸.

𑀩𑀼𑀤𑁆𑀥𑀘𑀦𑁆𑀤𑁂 𑀅𑀦𑀼𑀧𑁆𑀧𑀦𑁆𑀦𑁂, 𑀩𑀼𑀤𑁆𑀥𑀸𑀤𑀺𑀘𑁆𑀘𑁂 𑀅𑀦𑀼𑀕𑁆𑀕𑀢𑁂;

𑀢𑁂𑀲𑀁 𑀲𑀪𑀸𑀕𑀥𑀫𑁆𑀫𑀸𑀦𑀁, 𑀦𑀸𑀫𑀫𑀢𑁆𑀢𑀁 𑀦 𑀦𑀸𑀬𑀢𑀺.

𑀤𑀼𑀓𑁆𑀓𑀭𑀁 𑀯𑀺𑀯𑀺𑀥𑀁 𑀓𑀢𑁆𑀯𑀸, 𑀧𑀽𑀭𑀬𑀺𑀢𑁆𑀯𑀸𑀦 𑀧𑀸𑀭𑀫𑀻;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑀳𑀸𑀯𑀻𑀭𑀸, 𑀘𑀓𑁆𑀔𑀼𑀪𑀽𑀢𑀸 𑀲𑀩𑁆𑀭𑀳𑁆𑀫𑀓𑁂.

𑀢𑁂 𑀤𑁂𑀲𑀬𑀦𑁆𑀢𑀺 𑀲𑀤𑁆𑀥𑀫𑁆𑀫𑀁, 𑀤𑀼𑀓𑁆𑀔𑀳𑀸𑀦𑀺𑀁 𑀲𑀼𑀔𑀸𑀯𑀳𑀁;

𑀅𑀗𑁆𑀕𑀻𑀭𑀲𑁄 𑀲𑀓𑁆𑀬𑀫𑀼𑀦𑀺, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄.

𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀲𑀻𑀳𑁄, 𑀧𑀺𑀝𑀓𑁂 𑀢𑀻𑀡𑀺 𑀤𑁂𑀲𑀬𑀺;

𑀲𑀼𑀢𑁆𑀢𑀦𑁆𑀢𑀫𑀪𑀺𑀥𑀫𑁆𑀫𑀜𑁆𑀘, 𑀯𑀺𑀦𑀬𑀜𑁆𑀘 𑀫𑀳𑀸𑀕𑀼𑀡𑀁.

𑀏𑀯𑀁 𑀦𑀻𑀬𑀢𑀺 𑀲𑀤𑁆𑀥𑀫𑁆𑀫𑁄, 𑀯𑀺𑀦𑀬𑁄 𑀬𑀤𑀺 𑀢𑀺𑀝𑁆𑀞𑀢𑀺;

𑀉𑀪𑀢𑁄 𑀘 𑀯𑀺𑀪𑀗𑁆𑀕𑀸𑀦𑀺, 𑀔𑀦𑁆𑀥𑀓𑀸 𑀬𑀸 𑀘 𑀫𑀸𑀢𑀺𑀓𑀸.

𑀫𑀸𑀮𑀸 𑀲𑀼𑀢𑁆𑀢𑀕𑀼𑀡𑁂𑀦𑁂𑀯, 𑀧𑀭𑀺𑀯𑀸𑀭𑁂𑀦 𑀕𑀦𑁆𑀣𑀺𑀢𑀸;

𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀲𑁆𑀲, 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄 𑀓𑀢𑀁.

𑀲𑀫𑁆𑀪𑁂𑀤𑀁 𑀦𑀺𑀤𑀸𑀦𑀁 𑀘𑀜𑁆𑀜𑀁, 𑀲𑀼𑀢𑁆𑀢𑁂 𑀤𑀺𑀲𑁆𑀲𑀦𑁆𑀢𑀺 𑀉𑀧𑀭𑀺;

𑀢𑀲𑁆𑀫𑀸 𑀲𑀺𑀓𑁆𑀔𑁂 𑀧𑀭𑀺𑀯𑀸𑀭𑀁, 𑀥𑀫𑁆𑀫𑀓𑀸𑀫𑁄 𑀲𑀼𑀧𑁂𑀲𑀮𑁄𑀢𑀺.

𑀢𑁂𑀭𑀲𑀲𑀫𑀼𑀝𑁆𑀞𑀸𑀦𑀁

𑀯𑀺𑀪𑀗𑁆𑀕𑁂 𑀤𑁆𑀯𑀻𑀲𑀼 𑀧𑀜𑁆𑀜𑀢𑁆𑀢𑀁, 𑀉𑀤𑁆𑀤𑀺𑀲𑀦𑁆𑀢𑀺 𑀉𑀧𑁄𑀲𑀣𑁂;

𑀧𑀯𑀓𑁆𑀔𑀸𑀫𑀺 𑀲𑀫𑀼𑀝𑁆𑀞𑀸𑀦𑀁, 𑀬𑀣𑀸𑀜𑀸𑀬𑀁 𑀲𑀼𑀡𑀸𑀣 𑀫𑁂.

𑀧𑀸𑀭𑀸𑀚𑀺𑀓𑀁 𑀬𑀁 𑀧𑀞𑀫𑀁, 𑀤𑀼𑀢𑀺𑀬𑀜𑁆𑀘 𑀢𑀢𑁄 𑀧𑀭𑀁;

𑀲𑀜𑁆𑀘𑀭𑀺𑀢𑁆𑀢𑀸𑀦𑀼𑀪𑀸𑀲𑀦𑀜𑁆𑀘, 𑀅𑀢𑀺𑀭𑁂𑀓𑀜𑁆𑀘 𑀘𑀻𑀯𑀭𑀁.

𑀮𑁄𑀫𑀸𑀦𑀺 𑀧𑀤𑀲𑁄𑀥𑀫𑁆𑀫𑁄, 𑀪𑀽𑀢𑀁 𑀲𑀁𑀯𑀺𑀥𑀸𑀦𑁂𑀦 𑀘;

𑀣𑁂𑀬𑁆𑀬𑀤𑁂𑀲𑀦𑀘𑁄𑀭𑀻 𑀘, 𑀅𑀦𑀦𑀼𑀜𑁆𑀜𑀸𑀢𑀸𑀬 𑀢𑁂𑀭𑀲.

𑀢𑁂𑀭𑀲𑁂𑀢𑁂 𑀲𑀫𑀼𑀝𑁆𑀞𑀸𑀦 𑀦𑀬𑀸, 𑀯𑀺𑀜𑁆𑀜𑀽𑀳𑀺 𑀘𑀺𑀦𑁆𑀢𑀺𑀢𑀸.

𑀏𑀓𑁂𑀓𑀲𑁆𑀫𑀺𑀁 𑀲𑀫𑀼𑀝𑁆𑀞𑀸𑀦𑁂, 𑀲𑀤𑀺𑀲𑀸 𑀇𑀥 𑀤𑀺𑀲𑁆𑀲𑀭𑁂.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁

𑁨𑁫𑁮. 𑀫𑁂𑀣𑀼𑀦𑀁 𑀲𑀼𑀓𑁆𑀓𑀲𑀁𑀲𑀕𑁆𑀕𑁄, 𑀅𑀦𑀺𑀬𑀢𑀸 𑀧𑀞𑀫𑀺𑀓𑀸;

𑀧𑀼𑀩𑁆𑀩𑀽𑀧𑀧𑀭𑀺𑀧𑀸𑀘𑀺𑀢𑀸, 𑀭𑀳𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀳.

𑀲𑀪𑁄𑀚𑀦𑁂 𑀭𑀳𑁄 𑀤𑁆𑀯𑁂 𑀘, 𑀅𑀗𑁆𑀕𑀼𑀮𑀺 𑀉𑀤𑀓𑁂 𑀳𑀲𑀁;

𑀧𑀳𑀸𑀭𑁂 𑀉𑀕𑁆𑀕𑀺𑀭𑁂 𑀘𑁂𑀯, 𑀢𑁂𑀧𑀜𑁆𑀜𑀸𑀲𑀸 𑀘 𑀲𑁂𑀔𑀺𑀬𑀸.

𑀅𑀥𑀓𑁆𑀔𑀕𑀸𑀫𑀸𑀯𑀲𑁆𑀲𑀼𑀢𑀸, 𑀢𑀮𑀫𑀝𑁆𑀞𑀜𑁆𑀘 𑀲𑀼𑀤𑁆𑀥𑀺𑀓𑀸;

𑀯𑀲𑁆𑀲𑀁𑀯𑀼𑀝𑁆𑀞𑀸 𑀘 𑀑𑀯𑀸𑀤𑀁, 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀁.

𑀙𑀲𑀢𑁆𑀢𑀢𑀺 𑀇𑀫𑁂 𑀲𑀺𑀓𑁆𑀔𑀸, 𑀓𑀸𑀬𑀫𑀸𑀦𑀲𑀺𑀓𑀸 𑀓𑀢𑀸;

𑀲𑀩𑁆𑀩𑁂 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀬𑀣𑀸.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁

𑁨𑁫𑁯. 𑀅𑀤𑀺𑀦𑁆𑀦𑀁 𑀯𑀺𑀕𑁆𑀕𑀳𑀼𑀢𑁆𑀢𑀭𑀺, 𑀤𑀼𑀝𑁆𑀞𑀼𑀮𑁆𑀮𑀸 𑀅𑀢𑁆𑀢𑀓𑀸𑀫𑀺𑀦𑀁;

𑀅𑀫𑀽𑀮𑀸 𑀅𑀜𑁆𑀜𑀪𑀸𑀕𑀺𑀬𑀸, 𑀅𑀦𑀺𑀬𑀢𑀸 𑀤𑀼𑀢𑀺𑀬𑀺𑀓𑀸.

𑀅𑀘𑁆𑀙𑀺𑀦𑁆𑀤𑁂 𑀧𑀭𑀺𑀡𑀸𑀫𑀦𑁂, 𑀫𑀼𑀲𑀸 𑀑𑀫𑀲𑀧𑁂𑀲𑀼𑀡𑀸;

𑀤𑀼𑀝𑁆𑀞𑀼𑀮𑁆𑀮𑀸 𑀧𑀣𑀯𑀻𑀔𑀡𑁂, 𑀪𑀽𑀢𑀁 𑀅𑀜𑁆𑀜𑀸𑀬 𑀉𑀚𑁆𑀛𑀸𑀧𑁂.

𑀦𑀺𑀓𑁆𑀓𑀟𑁆𑀠𑀦𑀁 𑀲𑀺𑀜𑁆𑀘𑀦𑀜𑁆𑀘, 𑀆𑀫𑀺𑀲𑀳𑁂𑀢𑀼 𑀪𑀼𑀢𑁆𑀢𑀸𑀯𑀻;

𑀏𑀳𑀺 𑀅𑀦𑀸𑀤𑀭𑀺 𑀪𑀺𑀁𑀲𑀸, 𑀅𑀧𑀦𑀺𑀥𑁂 𑀘 𑀚𑀻𑀯𑀺𑀢𑀁.

𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀓𑀫𑁆𑀫𑀁, 𑀊𑀦𑀲𑀁𑀯𑀸𑀲𑀦𑀸𑀲𑀦𑀸;

𑀲𑀳𑀥𑀫𑁆𑀫𑀺𑀓𑀯𑀺𑀮𑁂𑀔𑀸, 𑀫𑁄𑀳𑁄 𑀅𑀫𑀽𑀮𑀓𑁂𑀦 𑀘.

𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀺𑀓𑀁 𑀘𑀻𑀯𑀭𑀁, 𑀤𑀢𑁆𑀯𑀸 [𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀺𑀓𑀁 𑀘𑀻𑀯𑀭𑀁 (𑀲𑀻.), 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀺𑀓𑀁 𑀤𑀢𑁆𑀯𑀸 (𑀲𑁆𑀬𑀸.)] 𑀧𑀭𑀺𑀡𑀸𑀫𑁂𑀬𑁆𑀬 𑀧𑀼𑀕𑁆𑀕𑀮𑁂;

𑀓𑀺𑀁 𑀢𑁂 𑀅𑀓𑀸𑀮𑀁 𑀅𑀘𑁆𑀙𑀺𑀦𑁆𑀤𑁂, 𑀤𑀼𑀕𑁆𑀕𑀳𑀻 𑀦𑀺𑀭𑀬𑁂𑀦 𑀘.

𑀕𑀡𑀁 𑀯𑀺𑀪𑀗𑁆𑀕𑀁 𑀤𑀼𑀩𑁆𑀩𑀮𑀁, 𑀓𑀣𑀺𑀦𑀸𑀨𑀸𑀲𑀼𑀧𑀲𑁆𑀲𑀬𑀁;

𑀅𑀓𑁆𑀓𑁄𑀲𑀘𑀡𑁆𑀟𑀻 𑀫𑀘𑁆𑀙𑀭𑀻, 𑀕𑀩𑁆𑀪𑀺𑀦𑀻 𑀘 𑀧𑀸𑀬𑀦𑁆𑀢𑀺𑀬𑀸.

𑀤𑁆𑀯𑁂𑀯𑀲𑁆𑀲𑀁 𑀲𑀺𑀓𑁆𑀔𑀸 𑀲𑀗𑁆𑀖𑁂𑀦, 𑀢𑀬𑁄 𑀘𑁂𑀯 𑀕𑀺𑀳𑀻𑀕𑀢𑀸;

𑀓𑀼𑀫𑀸𑀭𑀺𑀪𑀽𑀢𑀸 𑀢𑀺𑀲𑁆𑀲𑁄 𑀘, 𑀊𑀦𑀤𑁆𑀯𑀸𑀤𑀲𑀲𑀫𑁆𑀫𑀢𑀸.

𑀅𑀮𑀁 𑀢𑀸𑀯 𑀲𑁄𑀓𑀸𑀯𑀸𑀲𑀁, 𑀙𑀦𑁆𑀤𑀸 𑀅𑀦𑀼𑀯𑀲𑁆𑀲𑀸 𑀘 𑀤𑁆𑀯𑁂;

𑀲𑀺𑀓𑁆𑀔𑀸𑀧𑀤𑀸 𑀲𑀢𑁆𑀢𑀢𑀺𑀫𑁂, 𑀲𑀫𑀼𑀝𑁆𑀞𑀸𑀦𑀸 𑀢𑀺𑀓𑀸 𑀓𑀢𑀸.

𑀓𑀸𑀬𑀘𑀺𑀢𑁆𑀢𑁂𑀦 𑀦 𑀯𑀸𑀘𑀸, 𑀯𑀸𑀘𑀸𑀘𑀺𑀢𑁆𑀢𑀁 𑀦 𑀓𑀸𑀬𑀺𑀓𑀁;

𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀚𑀸𑀬𑀦𑁆𑀢𑀺, 𑀧𑀸𑀭𑀸𑀚𑀺𑀓𑀁 𑀤𑀼𑀢𑀺𑀬𑀁 𑀬𑀣𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁩. 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁

𑁨𑁬𑁦. 𑀲𑀜𑁆𑀘𑀭𑀻 𑀓𑀼𑀝𑀺 𑀯𑀺𑀳𑀸𑀭𑁄, 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄;

𑀯𑀺𑀜𑁆𑀜𑀢𑁆𑀢𑀼𑀢𑁆𑀢𑀭𑀺 𑀅𑀪𑀺𑀳𑀝𑁆𑀞𑀼𑀁, 𑀉𑀪𑀺𑀦𑁆𑀦𑀁 𑀤𑀽𑀢𑀓𑁂𑀦 𑀘.

𑀓𑁄𑀲𑀺𑀬𑀸 𑀲𑀼𑀤𑁆𑀥𑀤𑁆𑀯𑁂𑀪𑀸𑀕𑀸, 𑀙𑀩𑁆𑀩𑀲𑁆𑀲𑀸𑀦𑀺 𑀦𑀺𑀲𑀻𑀤𑀦𑀁;

𑀭𑀺𑀜𑁆𑀘𑀦𑁆𑀢𑀺 𑀭𑀽𑀧𑀺𑀓𑀸 𑀘𑁂𑀯, 𑀉𑀪𑁄 𑀦𑀸𑀦𑀧𑁆𑀧𑀓𑀸𑀭𑀓𑀸.

𑀊𑀦𑀩𑀦𑁆𑀥𑀦𑀯𑀲𑁆𑀲𑀺𑀓𑀸, 𑀲𑀼𑀢𑁆𑀢𑀁 𑀯𑀺𑀓𑀧𑁆𑀧𑀦𑁂𑀦 𑀘;

𑀤𑁆𑀯𑀸𑀭𑀤𑀸𑀦𑀲𑀺𑀩𑁆𑀩𑀸𑀦𑀺 [𑀤𑁆𑀯𑀸𑀭𑀤𑀸𑀦𑀲𑀺𑀩𑁆𑀩𑀺𑀦𑀻 (𑀲𑀻. 𑀲𑁆𑀬𑀸.)] 𑀘, 𑀧𑀽𑀯𑀧𑀘𑁆𑀘𑀬𑀚𑁄𑀢𑀺 𑀘.

𑀭𑀢𑀦𑀁 𑀲𑀽𑀘𑀺 𑀫𑀜𑁆𑀘𑁄 𑀘, 𑀢𑀽𑀮𑀁 𑀦𑀺𑀲𑀻𑀤𑀦𑀓𑀡𑁆𑀟𑀼 𑀘;

𑀯𑀲𑁆𑀲𑀺𑀓𑀸 𑀘 𑀲𑀼𑀕𑀢𑁂𑀦, 𑀯𑀺𑀜𑁆𑀜𑀢𑁆𑀢𑀺 𑀅𑀜𑁆𑀜𑀁 𑀘𑁂𑀢𑀸𑀧𑀦𑀸.

𑀤𑁆𑀯𑁂 𑀲𑀗𑁆𑀖𑀺𑀓𑀸 𑀫𑀳𑀸𑀚𑀦𑀺𑀓𑀸, 𑀤𑁆𑀯𑁂 𑀧𑀼𑀕𑁆𑀕𑀮𑀮𑀳𑀼𑀓𑀸 𑀕𑀭𑀼;

𑀤𑁆𑀯𑁂 𑀯𑀺𑀖𑀸𑀲𑀸 𑀲𑀸𑀝𑀺𑀓𑀸 𑀘, 𑀲𑀫𑀡𑀘𑀻𑀯𑀭𑁂𑀦 𑀘.

𑀲𑀫𑀧𑀜𑁆𑀜𑀸𑀲𑀺𑀫𑁂 𑀥𑀫𑁆𑀫𑀸, 𑀙𑀳𑀺 𑀞𑀸𑀦𑁂𑀳𑀺 𑀚𑀸𑀬𑀭𑁂;

𑀓𑀸𑀬𑀢𑁄 𑀦 𑀯𑀸𑀘𑀸𑀘𑀺𑀢𑁆𑀢𑀸, 𑀯𑀸𑀘𑀢𑁄 𑀦 𑀓𑀸𑀬𑀫𑀦𑀸.

𑀓𑀸𑀬𑀯𑀸𑀘𑀸 𑀦 𑀘 𑀘𑀺𑀢𑁆𑀢𑀸 [𑀦 𑀘𑀺𑀢𑁆𑀢𑀢𑁄 (𑀲𑀻. 𑀲𑁆𑀬𑀸.)], 𑀓𑀸𑀬𑀘𑀺𑀢𑁆𑀢𑀸 𑀦 𑀯𑀸𑀘𑀺𑀓𑀸 [𑀦 𑀯𑀸𑀘𑀢𑁄 (𑀲𑀻. 𑀲𑁆𑀬𑀸.)];

𑀯𑀸𑀘𑀸𑀘𑀺𑀢𑁆𑀢𑀸 𑀦 𑀓𑀸𑀬𑁂𑀦, 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 [𑀢𑀻𑀳𑀺 𑀞𑀸𑀦𑁂𑀳𑀺 (𑀲𑁆𑀬𑀸.)] 𑀚𑀸𑀬𑀭𑁂.

𑀙𑀲𑀫𑀼𑀝𑁆𑀞𑀸𑀦𑀺𑀓𑀸 𑀏𑀢𑁂, 𑀲𑀜𑁆𑀘𑀭𑀺𑀢𑁆𑀢𑁂𑀦 𑀲𑀸𑀤𑀺𑀲𑀸.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁪. 𑀲𑀫𑀦𑀼𑀪𑀸𑀲𑀦𑀸𑀲𑀫𑀼𑀝𑁆𑀞𑀸𑀦𑀁

𑁨𑁬𑁧. 𑀪𑁂𑀤𑀸𑀦𑀼𑀯𑀢𑁆𑀢𑀤𑀼𑀩𑁆𑀩𑀘, 𑀤𑀽𑀲𑀤𑀼𑀝𑁆𑀞𑀼𑀮𑁆𑀮𑀤𑀺𑀝𑁆𑀞𑀺 𑀘;

𑀙𑀦𑁆𑀤𑀁 𑀉𑀚𑁆𑀚𑀕𑁆𑀖𑀺𑀓𑀸 𑀤𑁆𑀯𑁂 𑀘, 𑀤𑁆𑀯𑁂 𑀘 𑀲𑀤𑁆𑀤𑀸 𑀦 𑀩𑁆𑀬𑀸𑀳𑀭𑁂.

𑀙𑀫𑀸 𑀦𑀻𑀘𑀸𑀲𑀦𑁂 𑀞𑀸𑀦𑀁, 𑀧𑀘𑁆𑀙𑀢𑁄 𑀉𑀧𑁆𑀧𑀣𑁂𑀦 𑀘;

𑀯𑀚𑁆𑀚𑀸𑀦𑀼𑀯𑀢𑁆𑀢𑀺𑀕𑀳𑀡𑀸, 𑀑𑀲𑀸𑀭𑁂 𑀧𑀘𑁆𑀘𑀸𑀘𑀺𑀓𑁆𑀔𑀦𑀸.

𑀓𑀺𑀲𑁆𑀫𑀺𑀁 𑀲𑀁𑀲𑀝𑁆𑀞𑀸 𑀤𑁆𑀯𑁂 𑀯𑀥𑀺, 𑀯𑀺𑀲𑀺𑀩𑁆𑀩𑁂 𑀤𑀼𑀓𑁆𑀔𑀺𑀢𑀸𑀬 𑀘;

𑀧𑀼𑀦 𑀲𑀁𑀲𑀝𑁆𑀞𑀸 𑀦 𑀯𑀽𑀧𑀲𑀫𑁂, 𑀆𑀭𑀸𑀫𑀜𑁆𑀘 𑀧𑀯𑀸𑀭𑀡𑀸.

𑀅𑀦𑁆𑀯𑀤𑁆𑀥𑀁 [𑀅𑀦𑁆𑀯𑀤𑁆𑀥𑀫𑀸𑀲𑀁 (𑀲𑀻. 𑀲𑁆𑀬𑀸.)] 𑀲𑀳 𑀚𑀻𑀯𑀺𑀦𑀺𑀁, 𑀤𑁆𑀯𑁂 𑀘𑀻𑀯𑀭𑀁 𑀅𑀦𑀼𑀩𑀦𑁆𑀥𑀦𑀸;

𑀲𑀢𑁆𑀢𑀢𑀺𑀁𑀲 𑀇𑀫𑁂 𑀥𑀫𑁆𑀫𑀸, 𑀓𑀸𑀬𑀯𑀸𑀘𑀸𑀬 𑀘𑀺𑀢𑁆𑀢𑀢𑁄.

𑀲𑀩𑁆𑀩𑁂 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀲𑀫𑀦𑀼𑀪𑀸𑀲𑀦𑀸 𑀬𑀣𑀸.

𑀲𑀫𑀦𑀼𑀪𑀸𑀲𑀦𑀸𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁫. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁

𑁨𑁬𑁨. 𑀉𑀩𑁆𑀪𑀢𑀁 𑀓𑀣𑀺𑀦𑀁 𑀢𑀻𑀡𑀺, 𑀧𑀞𑀫𑀁 𑀧𑀢𑁆𑀢𑀪𑁂𑀲𑀚𑁆𑀚𑀁;

𑀅𑀘𑁆𑀘𑁂𑀓𑀁 𑀘𑀸𑀧𑀺 𑀲𑀸𑀲𑀗𑁆𑀓𑀁, 𑀧𑀓𑁆𑀓𑀫𑀦𑁆𑀢𑁂𑀦 𑀯𑀸 𑀤𑀼𑀯𑁂.

𑀉𑀧𑀲𑁆𑀲𑀬𑀁 𑀧𑀭𑀫𑁆𑀧𑀭𑀸, 𑀅𑀦𑀢𑀺𑀭𑀺𑀢𑁆𑀢𑀁 𑀦𑀺𑀫𑀦𑁆𑀢𑀦𑀸;

𑀯𑀺𑀓𑀧𑁆𑀧𑀁 𑀭𑀜𑁆𑀜𑁄 𑀯𑀺𑀓𑀸𑀮𑁂, 𑀯𑁄𑀲𑀸𑀲𑀸𑀭𑀜𑁆𑀜𑀓𑁂𑀦 𑀘.

𑀉𑀲𑁆𑀲𑀬𑀸𑀲𑀦𑁆𑀦𑀺𑀘𑀬𑀜𑁆𑀘, 𑀧𑀼𑀭𑁂 𑀧𑀘𑁆𑀙𑀸 𑀯𑀺𑀓𑀸𑀮𑁂 𑀘;

𑀧𑀜𑁆𑀘𑀸𑀳𑀺𑀓𑀸 𑀲𑀗𑁆𑀓𑀫𑀦𑀻, 𑀤𑁆𑀯𑁂𑀧𑀺 𑀆𑀯𑀲𑀣𑁂𑀦 𑀘.

𑀧𑀲𑀸𑀔𑁂 𑀆𑀲𑀦𑁂 𑀘𑁂𑀯, 𑀢𑀺𑀁𑀲 𑀏𑀓𑀽𑀦𑀓𑀸 𑀇𑀫𑁂;

𑀓𑀸𑀬𑀯𑀸𑀘𑀸 𑀦 𑀘 𑀘𑀺𑀢𑁆𑀢𑀸 [𑀦 𑀘𑀺𑀢𑁆𑀢𑀢𑁄 (𑀲𑁆𑀬𑀸.)], 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀚𑀸𑀬𑀭𑁂.

𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀳𑀸𑀲𑀫𑀸.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁬. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁

𑁨𑁬𑁩. 𑀏𑀴𑀓𑀮𑁄𑀫𑀸 𑀤𑁆𑀯𑁂 𑀲𑁂𑀬𑁆𑀬𑀸, 𑀆𑀳𑀘𑁆𑀘 𑀧𑀺𑀡𑁆𑀟𑀪𑁄𑀚𑀦𑀁;

𑀕𑀡𑀯𑀺𑀓𑀸𑀮𑀲𑀦𑁆𑀦𑀺𑀥𑀺, 𑀤𑀦𑁆𑀢𑀧𑁄𑀦𑁂𑀦 𑀘𑁂𑀮𑀓𑀸.

𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 [𑀉𑀬𑁆𑀬𑀼𑀢𑁆𑀢𑀁 𑀯𑀲𑁂 (𑀲𑁆𑀬𑀸.)] 𑀉𑀬𑁆𑀬𑁄𑀥𑀺, 𑀲𑀼𑀭𑀸 𑀑𑀭𑁂𑀦 𑀦𑁆𑀳𑀸𑀬𑀦𑀸;

𑀤𑀼𑀩𑁆𑀩𑀡𑁆𑀡𑁂 𑀤𑁆𑀯𑁂 𑀤𑁂𑀲𑀦𑀺𑀓𑀸, 𑀮𑀲𑀼𑀡𑀼𑀧𑀢𑀺𑀝𑁆𑀞𑁂 𑀦𑀘𑁆𑀘𑀦𑀸.

𑀦𑁆𑀳𑀸𑀦𑀫𑀢𑁆𑀣𑀭𑀡𑀁 𑀲𑁂𑀬𑁆𑀬𑀸, 𑀅𑀦𑁆𑀢𑁄𑀭𑀝𑁆𑀞𑁂 𑀢𑀣𑀸 𑀩𑀳𑀺;

𑀅𑀦𑁆𑀢𑁄𑀯𑀲𑁆𑀲𑀁 𑀘𑀺𑀢𑁆𑀢𑀸𑀕𑀸𑀭𑀁, 𑀆𑀲𑀦𑁆𑀤𑀺 𑀲𑀼𑀢𑁆𑀢𑀓𑀦𑁆𑀢𑀦𑀸.

𑀯𑁂𑀬𑁆𑀬𑀸𑀯𑀘𑁆𑀘𑀁 𑀲𑀳𑀢𑁆𑀣𑀸 𑀘, 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂𑀦 𑀘;

𑀙𑀢𑁆𑀢𑀁 𑀬𑀸𑀦𑀜𑁆𑀘 𑀲𑀗𑁆𑀖𑀸𑀡𑀺𑀁, 𑀅𑀮𑀗𑁆𑀓𑀸𑀭𑀁 𑀕𑀦𑁆𑀥𑀯𑀸𑀲𑀺𑀢𑀁.

𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀸 𑀘, 𑀲𑀸𑀫𑀡𑁂𑀭𑀻 𑀕𑀺𑀳𑀺𑀦𑀺𑀬𑀸;

𑀅𑀲𑀁𑀓𑀘𑁆𑀘𑀺𑀓𑀸 𑀆𑀧𑀢𑁆𑀢𑀺, 𑀘𑀢𑁆𑀢𑀸𑀭𑀻𑀲𑀸 𑀘𑀢𑀼𑀢𑁆𑀢𑀭𑀺.

𑀓𑀸𑀬𑁂𑀦 𑀦 𑀯𑀸𑀘𑀸𑀘𑀺𑀢𑁆𑀢𑁂𑀦, 𑀓𑀸𑀬𑀘𑀺𑀢𑁆𑀢𑁂𑀦 𑀦 𑀯𑀸𑀘𑀢𑁄;

𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑁂, 𑀲𑀫𑀸 𑀏𑀴𑀓𑀮𑁄𑀫𑀺𑀓𑀸𑀢𑀺.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁭. 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁

𑁨𑁬𑁪. 𑀧𑀤𑀜𑁆𑀜𑀢𑁆𑀭 𑀅𑀲𑀫𑁆𑀫𑀢𑀸, 𑀢𑀣𑀸 𑀅𑀢𑁆𑀣𑀗𑁆𑀕𑀢𑁂𑀦 𑀘;

𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀤𑁆𑀯𑁂 𑀯𑀼𑀢𑁆𑀢𑀸, 𑀅𑀦𑁄𑀓𑀸𑀲𑁄 [𑀅𑀦𑁄𑀓𑀸𑀲𑁂 (𑀲𑀻. 𑀲𑁆𑀬𑀸.)] 𑀘 𑀧𑀼𑀘𑁆𑀙𑀦𑀸.

𑀲𑀢𑁆𑀢 𑀲𑀺𑀓𑁆𑀔𑀸𑀧𑀤𑀸 𑀏𑀢𑁂, 𑀯𑀸𑀘𑀸 𑀦 𑀓𑀸𑀬𑀘𑀺𑀢𑁆𑀢𑀢𑁄 [𑀓𑀸𑀬𑀘𑀺𑀢𑁆𑀢𑀓𑀸 (𑀓.)];

𑀯𑀸𑀘𑀸𑀘𑀺𑀢𑁆𑀢𑁂𑀦 𑀚𑀸𑀬𑀦𑁆𑀢𑀺, 𑀦 𑀢𑀼 𑀓𑀸𑀬𑁂𑀦 𑀚𑀸𑀬𑀭𑁂.

𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑁂, 𑀧𑀤𑀲𑁄𑀥𑀫𑁆𑀫𑀲𑀤𑀺𑀲𑀸.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁮. 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁

𑁨𑁬𑁫. 𑀅𑀤𑁆𑀥𑀸𑀦𑀦𑀸𑀯𑀁 𑀧𑀡𑀻𑀢𑀁, 𑀫𑀸𑀢𑀼𑀕𑀸𑀫𑁂𑀦 𑀲𑀁𑀳𑀭𑁂;

𑀥𑀜𑁆𑀜𑀁 𑀦𑀺𑀫𑀦𑁆𑀢𑀺𑀢𑀸 𑀘𑁂𑀯, 𑀅𑀝𑁆𑀞 𑀘 𑀧𑀸𑀝𑀺𑀤𑁂𑀲𑀦𑀻.

𑀲𑀺𑀓𑁆𑀔𑀸 𑀧𑀦𑁆𑀦𑀭𑀲 𑀏𑀢𑁂, 𑀓𑀸𑀬𑀸 𑀦 𑀯𑀸𑀘𑀸 𑀦 𑀫𑀦𑀸;

𑀓𑀸𑀬𑀯𑀸𑀘𑀸𑀳𑀺 𑀚𑀸𑀬𑀦𑁆𑀢𑀺, 𑀦 𑀢𑁂 𑀘𑀺𑀢𑁆𑀢𑁂𑀦 𑀚𑀸𑀬𑀭𑁂.

𑀓𑀸𑀬𑀘𑀺𑀢𑁆𑀢𑁂𑀦 𑀚𑀸𑀬𑀦𑁆𑀢𑀺, 𑀦 𑀢𑁂 𑀚𑀸𑀬𑀦𑁆𑀢𑀺 𑀯𑀸𑀘𑀢𑁄;

𑀓𑀸𑀬𑀯𑀸𑀘𑀸𑀳𑀺 𑀘𑀺𑀢𑁆𑀢𑁂𑀦, 𑀲𑀫𑀼𑀝𑁆𑀞𑀸𑀦𑀸 𑀘𑀢𑀼𑀩𑁆𑀩𑀺𑀥𑀸.

𑀧𑀜𑁆𑀜𑀢𑁆𑀢𑀸 𑀩𑀼𑀤𑁆𑀥𑀜𑀸𑀡𑁂𑀦, 𑀅𑀤𑁆𑀥𑀸𑀦𑁂𑀦 𑀲𑀳𑀸 𑀲𑀫𑀸 [𑀲𑀫𑀸𑀦𑀬𑀸 (𑀲𑁆𑀬𑀸.)].

𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁯. 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁

𑁨𑁬𑁬. 𑀣𑁂𑀬𑁆𑀬𑀲𑀢𑁆𑀣𑀁 𑀉𑀧𑀲𑁆𑀲𑀼𑀢𑀺, 𑀲𑀽𑀧𑀯𑀺𑀜𑁆𑀜𑀸𑀧𑀦𑁂𑀦 𑀘;

𑀭𑀢𑁆𑀢𑀺𑀙𑀦𑁆𑀦𑀜𑁆𑀘 𑀑𑀓𑀸𑀲𑀁, 𑀏𑀢𑁂 𑀩𑁆𑀬𑀽𑀳𑁂𑀦 𑀲𑀢𑁆𑀢𑀫𑀸.

𑀓𑀸𑀬𑀘𑀺𑀢𑁆𑀢𑁂𑀦 𑀚𑀸𑀬𑀦𑁆𑀢𑀺, 𑀦 𑀢𑁂 𑀚𑀸𑀬𑀦𑁆𑀢𑀺 𑀯𑀸𑀘𑀢𑁄;

𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀚𑀸𑀬𑀦𑁆𑀢𑀺, 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀇𑀫𑁂.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀸, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁦. 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁

𑁨𑁬𑁭. 𑀙𑀢𑁆𑀢𑀧𑀸𑀡𑀺𑀲𑁆𑀲 𑀲𑀤𑁆𑀥𑀫𑁆𑀫𑀁, 𑀦 𑀤𑁂𑀲𑁂𑀦𑁆𑀢𑀺 𑀢𑀣𑀸𑀕𑀢𑀸;

𑀏𑀯𑀫𑁂𑀯 [𑀢𑀣𑁂𑀯 (𑀲𑀻. 𑀲𑁆𑀬𑀸.)] 𑀤𑀡𑁆𑀟𑀧𑀸𑀡𑀺𑀲𑁆𑀲, 𑀲𑀢𑁆𑀣𑀆𑀯𑀼𑀥𑀧𑀸𑀡𑀺𑀦𑀁.

𑀧𑀸𑀤𑀼𑀓𑀼𑀧𑀸𑀳𑀦𑀸 𑀬𑀸𑀦𑀁, 𑀲𑁂𑀬𑁆𑀬𑀧𑀮𑁆𑀮𑀢𑁆𑀣𑀺𑀓𑀸𑀬 𑀘;

𑀯𑁂𑀞𑀺𑀢𑁄𑀕𑀼𑀡𑁆𑀞𑀺𑀢𑁄 𑀘𑁂𑀯, 𑀏𑀓𑀸𑀤𑀲𑀫𑀦𑀽𑀦𑀓𑀸.

𑀯𑀸𑀘𑀸𑀘𑀺𑀢𑁆𑀢𑁂𑀦 𑀚𑀸𑀬𑀦𑁆𑀢𑀺, 𑀦 𑀢𑁂 𑀚𑀸𑀬𑀦𑁆𑀢𑀺 𑀓𑀸𑀬𑀢𑁄;

𑀲𑀩𑁆𑀩𑁂 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀲𑀫𑀓𑀸 𑀥𑀫𑁆𑀫𑀤𑁂𑀲𑀦𑁂.

𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁧. 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀁

𑁨𑁬𑁮. 𑀪𑀽𑀢𑀁 𑀓𑀸𑀬𑁂𑀦 𑀚𑀸𑀬𑀢𑀺, 𑀦 𑀯𑀸𑀘𑀸 𑀦 𑀘 𑀘𑀺𑀢𑁆𑀢𑀢𑁄;

𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀸 𑀦 𑀘 𑀘𑀺𑀢𑁆𑀢𑀢𑁄.

𑀓𑀸𑀬𑀯𑀸𑀘𑀸𑀬 𑀚𑀸𑀬𑀢𑀺, 𑀦 𑀢𑀼 𑀚𑀸𑀬𑀢𑀺 𑀘𑀺𑀢𑁆𑀢𑀢𑁄;

𑀪𑀽𑀢𑀸𑀭𑁄𑀘𑀦𑀓𑀸 𑀦𑀸𑀫, 𑀢𑀻𑀳𑀺 𑀞𑀸𑀦𑁂𑀳𑀺 𑀚𑀸𑀬𑀢𑀺.

𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁨. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁

𑁨𑁬𑁯. 𑀘𑁄𑀭𑀻 𑀯𑀸𑀘𑀸𑀬 𑀘𑀺𑀢𑁆𑀢𑁂𑀦, 𑀦 𑀢𑀁 𑀚𑀸𑀬𑀢𑀺 𑀓𑀸𑀬𑀢𑁄;

𑀚𑀸𑀬𑀢𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺, 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀇𑀤𑀁;