𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑁄

𑁨𑁭𑁧. 𑀓𑀢𑀺 𑀆𑀧𑀢𑁆𑀢𑀺𑀬𑁄? 𑀓𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸? 𑀓𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺? 𑀓𑀢𑀺 𑀅𑀕𑀸𑀭𑀯𑀸? 𑀓𑀢𑀺 𑀕𑀸𑀭𑀯𑀸? 𑀓𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺? 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄? 𑀓𑀢𑀺 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸? 𑀓𑀢𑀺 𑀯𑀺𑀯𑀸𑀤𑀫𑀽𑀮𑀸𑀦𑀺? 𑀓𑀢𑀺 𑀅𑀦𑀼𑀯𑀸𑀤𑀫𑀽𑀮𑀸𑀦𑀺? 𑀓𑀢𑀺 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸? 𑀓𑀢𑀺 𑀪𑁂𑀤𑀓𑀭𑀯𑀢𑁆𑀣𑀽𑀦𑀺? 𑀓𑀢𑀺 𑀅𑀥𑀺𑀓𑀭𑀡𑀸𑀦𑀺? 𑀓𑀢𑀺 𑀲𑀫𑀣𑀸?

𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀧𑀜𑁆𑀘 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀲𑀢𑁆𑀢 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀙 𑀅𑀕𑀸𑀭𑀯𑀸. 𑀙 𑀕𑀸𑀭𑀯𑀸. 𑀙 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄. 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸. 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺. 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸. 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺. 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺. 𑀲𑀢𑁆𑀢 𑀲𑀫𑀣𑀸.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄? 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑁋 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄.

𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸? 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸.

𑀢𑀢𑁆𑀣 𑀓𑀢𑀫𑀸𑀦𑀺 𑀧𑀜𑁆𑀘 𑀯𑀺𑀦𑀻𑀢𑀯𑀢𑁆𑀣𑀽𑀦𑀺? 𑀧𑀜𑁆𑀘𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑁋 𑀇𑀫𑀸𑀦𑀺 𑀧𑀜𑁆𑀘 𑀯𑀺𑀦𑀻𑀢𑀯𑀢𑁆𑀣𑀽𑀦𑀺.

𑀢𑀢𑁆𑀣 𑀓𑀢𑀫𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄? 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺, 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺, 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑁋 𑀇𑀫𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄.

𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸? 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸.

𑀢𑀢𑁆𑀣 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀺𑀦𑀻𑀢𑀯𑀢𑁆𑀣𑀽𑀦𑀺? 𑀲𑀢𑁆𑀢𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑁋 𑀇𑀫𑀸𑀦𑀺 𑀲𑀢𑁆𑀢 𑀯𑀺𑀦𑀻𑀢𑀯𑀢𑁆𑀣𑀽𑀦𑀺.

𑀢𑀢𑁆𑀣 𑀓𑀢𑀫𑁂 𑀙 𑀅𑀕𑀸𑀭𑀯𑀸? 𑀩𑀼𑀤𑁆𑀥𑁂 𑀅𑀕𑀸𑀭𑀯𑁄, 𑀥𑀫𑁆𑀫𑁂 𑀅𑀕𑀸𑀭𑀯𑁄, 𑀲𑀗𑁆𑀖𑁂 𑀅𑀕𑀸𑀭𑀯𑁄, 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄, 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄, 𑀧𑀝𑀺𑀲𑀦𑁆𑀥𑀸𑀭𑁂 𑀅𑀕𑀸𑀭𑀯𑁄 𑁋 𑀇𑀫𑁂 𑀙 𑀅𑀕𑀸𑀭𑀯𑀸.

𑀢𑀢𑁆𑀣 𑀓𑀢𑀫𑁂 𑀙 𑀕𑀸𑀭𑀯𑀸? 𑀩𑀼𑀤𑁆𑀥𑁂 𑀕𑀸𑀭𑀯𑁄, 𑀥𑀫𑁆𑀫𑁂 𑀕𑀸𑀭𑀯𑁄, 𑀲𑀗𑁆𑀖𑁂 𑀕𑀸𑀭𑀯𑁄, 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄, 𑀅𑀧𑁆𑀧𑀫𑀸𑀤𑁂 𑀕𑀸𑀭𑀯𑁄, 𑀧𑀝𑀺𑀲𑀦𑁆𑀥𑀸𑀭𑁂 𑀕𑀸𑀭𑀯𑁄 𑁋 𑀇𑀫𑁂 𑀙 𑀕𑀸𑀭𑀯𑀸.

𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀯𑀺𑀦𑀻𑀢𑀯𑀢𑁆𑀣𑀽𑀦𑀺? 𑀙𑀳𑀺 𑀅𑀕𑀸𑀭𑀯𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑁋 𑀇𑀫𑀸𑀦𑀺 𑀙 𑀯𑀺𑀦𑀻𑀢𑀯𑀢𑁆𑀣𑀽𑀦𑀺.

𑀢𑀢𑁆𑀣 𑀓𑀢𑀫𑀸 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄? 𑀲𑀻𑀮𑀯𑀺𑀧𑀢𑁆𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺 𑁋 𑀇𑀫𑀸 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄.

𑀢𑀢𑁆𑀣 𑀓𑀢𑀫𑁂 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸? 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄 𑀦 𑀘𑀺𑀢𑁆𑀢𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄 𑀦 𑀘𑀺𑀢𑁆𑀢𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀘𑀺𑀢𑁆𑀢𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺 𑁋 𑀇𑀫𑁂 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸.

𑁨𑁭𑁨. 𑀢𑀢𑁆𑀣 [𑀘𑀽𑀴𑀯. 𑁨𑁧𑁬; 𑀅. 𑀦𑀺. 𑁬.𑁩𑁬; 𑀫. 𑀦𑀺. 𑁩.𑁪𑁪; 𑀤𑀻. 𑀦𑀺. 𑁩.𑁩𑁨𑁫] 𑀓𑀢𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺? 𑀇𑀥 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

[𑀘𑀽𑀴𑀯. 𑁨𑁧𑁬] 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀲𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺.

𑁨𑁭𑁩. [𑀘𑀽𑀴𑀯. 𑁨𑁧𑁭] 𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺? 𑀇𑀥 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂 …𑀧𑁂… 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀮𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣 𑀢𑀢𑁆𑀭 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺.

𑁨𑁭𑁪. [𑀤𑀻. 𑀦𑀺. 𑁩.𑁩𑁨𑁪; 𑀅. 𑀦𑀺. 𑁬.𑁧𑁧] 𑀢𑀢𑁆𑀣 𑀓𑀢𑀫𑁂 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸? 𑀇𑀥 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀬𑁂 𑀢𑁂 𑀮𑀸𑀪𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀺 𑀢𑀣𑀸𑀭𑀽𑀧𑁂𑀳𑀺 𑀮𑀸𑀪𑁂𑀳𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀳𑁄𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸.

𑁨𑁭𑁫. 𑀢𑀢𑁆𑀣 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺? 𑀇𑀥 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 ‘‘𑀅𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀢𑀺, 𑀅𑀯𑀺𑀦𑀬𑀁 ‘‘𑀯𑀺𑀦𑀬𑁄’’𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 ‘‘𑀅𑀯𑀺𑀦𑀬𑁄’’𑀢𑀺 𑀤𑀻𑀧𑁂𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ‘‘𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ‘‘𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 ‘‘𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 ‘‘𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 ‘‘𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 ‘‘𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸’’𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺𑀁 ‘‘𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 ‘‘𑀕𑀭𑀼𑀓𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 ‘‘𑀮𑀳𑀼𑀓𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 ‘‘𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 ‘‘𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 ‘‘𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀢𑀺. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺.

[𑀘𑀽𑀴𑀯. 𑁨𑁧𑁫; 𑀧𑀭𑀺. 𑁩𑁪𑁦] 𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺.

𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀲𑀫𑀣𑀸? 𑀲𑀫𑁆𑀫𑀼𑀔𑀸𑀯𑀺𑀦𑀬𑁄, 𑀲𑀢𑀺𑀯𑀺𑀦𑀬𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀢𑀺𑀡𑀯𑀢𑁆𑀣𑀸𑀭𑀓𑁄 𑁋 𑀇𑀫𑁂 𑀲𑀢𑁆𑀢 𑀲𑀫𑀣𑀸.

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀧𑀢𑁆𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸, 𑀯𑀺𑀦𑀻𑀢𑀸 𑀲𑀢𑁆𑀢𑀥𑀸 𑀧𑀼𑀦;

𑀯𑀺𑀦𑀻𑀢𑀸𑀕𑀸𑀭𑀯𑀸 𑀘𑁂𑀯, 𑀕𑀸𑀭𑀯𑀸 𑀫𑀽𑀮𑀫𑁂𑀯 𑀘.

𑀧𑀼𑀦 𑀯𑀺𑀦𑀻𑀢𑀸 𑀯𑀺𑀧𑀢𑁆𑀢𑀺, 𑀲𑀫𑀼𑀝𑁆𑀞𑀸𑀦𑀸 𑀯𑀺𑀯𑀸𑀤𑀦𑀸;

𑀅𑀦𑀼𑀯𑀸𑀤𑀸 𑀲𑀸𑀭𑀡𑀻𑀬𑀁, 𑀪𑁂𑀤𑀸𑀥𑀺𑀓𑀭𑀡𑁂𑀦 𑀘.

𑀲𑀢𑁆𑀢𑁂𑀯 𑀲𑀫𑀣𑀸 𑀯𑀼𑀢𑁆𑀢𑀸, 𑀧𑀤𑀸 𑀲𑀢𑁆𑀢𑀭𑀲𑀸 𑀇𑀫𑁂𑀢𑀺.

𑁧. 𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑁄

𑁨𑁭𑁬. 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀘𑀢𑀼𑀢𑁆𑀣𑁂 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀧𑀜𑁆𑀘𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀙𑀝𑁆𑀞𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁨. 𑀓𑀢𑀸𑀧𑀢𑁆𑀢𑀺𑀯𑀸𑀭𑁄

𑁨𑁭𑁭. 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲 𑁋 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀘𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄 𑀦 𑀘𑀺𑀢𑁆𑀢𑀢𑁄. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁭𑁮. 𑀤𑀼𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀤𑀼𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑁋 𑀤𑀼𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀘𑀢𑀽𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀯𑀸𑀘𑀢𑁄 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄 𑀦 𑀘𑀺𑀢𑁆𑀢𑀢𑁄. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁭𑁯. 𑀢𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀢𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀁𑀯𑀺𑀤𑀳𑀺𑀢𑁆𑀯𑀸 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀪𑀺𑀓𑁆𑀔𑀼𑀦𑀺𑀬𑀸 𑀯𑁄𑀲𑀸𑀲𑀦𑁆𑀢𑀺𑀬𑀸 𑀦 𑀦𑀺𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲 𑁋 𑀢𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀘𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀘𑀺𑀢𑁆𑀢𑀢𑁄. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁦. 𑀘𑀢𑀼𑀢𑁆𑀣𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀘𑀢𑀼𑀢𑁆𑀣𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲. 𑀘𑀢𑀼𑀢𑁆𑀣𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀙𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁧. 𑀧𑀜𑁆𑀘𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀧𑀜𑁆𑀘𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀦 𑀔𑀼𑀁𑀲𑁂𑀢𑀼𑀓𑀸𑀫𑁄 𑀦 𑀯𑀫𑁆𑀪𑁂𑀢𑀼𑀓𑀸𑀫𑁄 𑀦 𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄 𑀤𑀯𑀓𑀫𑁆𑀬𑀢𑀸 𑀳𑀻𑀦𑁂𑀦 𑀳𑀻𑀦𑀁 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑁋 𑀧𑀜𑁆𑀘𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀙𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁨. 𑀙𑀝𑁆𑀞𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀙𑀝𑁆𑀞𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀁𑀯𑀺𑀤𑀳𑀺𑀢𑁆𑀯𑀸 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀪𑀺𑀓𑁆𑀔𑀼𑀦𑀺𑀬𑀸 𑀯𑁄𑀲𑀸𑀲𑀦𑁆𑀢𑀺𑀬𑀸 𑀦 𑀦𑀺𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲 𑁋 𑀙𑀝𑁆𑀞𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀙𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘𑀸𑀢𑀺.

𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁

𑀓𑀢𑀸𑀧𑀢𑁆𑀢𑀺𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.

𑁩. 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀕𑀸𑀣𑀸

𑁨𑁮𑁩. 𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀧𑀜𑁆𑀘;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀯𑀸𑀘𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀯𑀸𑀘𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀘𑀢𑀲𑁆𑀲𑁄;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀧𑀜𑁆𑀘;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀙;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀯𑀸𑀘𑀲𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀯𑀸𑀘𑀲𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀙;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀓𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀫𑀸𑀦𑀲𑀺𑀓𑀸 𑀅𑀦𑀦𑁆𑀢𑀤𑀲𑁆𑀲𑀺𑀦𑀸;

𑀅𑀓𑁆𑀔𑀸𑀢𑀸 𑀮𑁄𑀓𑀳𑀺𑀢𑁂𑀦 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀙;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤𑀸𑀢𑀺.

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀕𑀸𑀣𑀸 𑀦𑀺𑀝𑁆𑀞𑀺𑀢𑀸 𑀢𑀢𑀺𑀬𑀸.

𑁪. 𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀯𑀸𑀭𑁄

𑁨𑁮𑁪. 𑀲𑀻𑀮𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀲𑀻𑀮𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀯𑁂𑀫𑀢𑀺𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀅𑀢𑁆𑀢𑀦𑁄 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀲𑀻𑀮𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀘𑀢𑀽𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁫. 𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀆𑀘𑀸𑀭𑀯𑀺𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀇𑀫𑀁 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀲𑀸 𑀆𑀧𑀢𑁆𑀢𑀺 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀢𑀺 …𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺? 𑀲𑀸 𑀆𑀧𑀢𑁆𑀢𑀺 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀏𑀓𑀁 𑀯𑀺𑀧𑀢𑁆𑀢𑀺𑀁 𑀪𑀚𑀢𑀺 𑁋 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀏𑀓𑁂𑀦 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸 𑁋 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁬. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 [𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸 (𑀲𑁆𑀬𑀸. 𑀓.)]; 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑁋 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀏𑀓𑀁 𑀯𑀺𑀧𑀢𑁆𑀢𑀺𑀁 𑀪𑀚𑀦𑁆𑀢𑀺 𑁋 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁭. 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺 𑀪𑀡𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲; 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺. 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀙𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀙𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀲𑀺𑀬𑀸 𑀓𑀸𑀬𑀢𑁄 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄 𑀦 𑀘𑀺𑀢𑁆𑀢𑀢𑁄; 𑀲𑀺𑀬𑀸 𑀯𑀸𑀘𑀢𑁄 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄 𑀦 𑀘𑀺𑀢𑁆𑀢𑀢𑁄; 𑀲𑀺𑀬𑀸 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀘𑀺𑀢𑁆𑀢𑀢𑁄; 𑀲𑀺𑀬𑀸 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄; 𑀲𑀺𑀬𑀸 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄; 𑀲𑀺𑀬𑀸 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄.

𑁫. 𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑁄

𑁨𑁮𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀉𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀏𑀓𑀁 𑀯𑀺𑀧𑀢𑁆𑀢𑀺𑀁 𑀪𑀚𑀦𑁆𑀢𑀺 𑁋 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀲𑀺𑀬𑀸 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄; 𑀲𑀺𑀬𑀸 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄; 𑀲𑀺𑀬𑀸 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁮𑁯. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀢𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀲𑀺𑀬𑀸 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄; 𑀲𑀺𑀬𑀸 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀓𑀸𑀬𑀢𑁄; 𑀲𑀺𑀬𑀸 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁯𑁦. 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀯𑁂𑀫𑀢𑀺𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺; 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀆𑀘𑀸𑀭𑀯𑀺𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀘𑀢𑀽𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁯𑁧. 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀪𑀺𑀓𑁆𑀔𑀼𑀦𑀻 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁; 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸; 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺…𑀧𑁂… 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀘𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑀞𑀧𑁂𑀢𑁆𑀯𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂, 𑀅𑀯𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺? 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀅𑀯𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀦 𑀓𑀢𑀫𑀁 𑀯𑀺𑀧𑀢𑁆𑀢𑀺𑀁 𑀪𑀚𑀦𑁆𑀢𑀺? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀦 𑀓𑀢𑀫𑁂𑀦 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀦 𑀓𑀢𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀦 𑀓𑀢𑀫𑀁 𑀅𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀦 𑀓𑀢𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂, 𑀦𑀢𑁆𑀣𑀜𑁆𑀜𑀸 𑀆𑀧𑀢𑁆𑀢𑀺𑀬𑁄𑀢𑀺.

𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.

𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁 [𑀅𑀦𑀦𑁆𑀢𑀭𑀧𑁂𑀬𑁆𑀬𑀸𑀮𑀁 (𑀲𑀻. 𑀲𑁆𑀬𑀸.)] 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀢𑀺𑀧𑀼𑀘𑁆𑀙𑀸 𑀲𑀫𑀼𑀝𑁆𑀞𑀸𑀦𑀸, 𑀓𑀢𑀸𑀧𑀢𑁆𑀢𑀺 𑀢𑀣𑁂𑀯 𑀘;

𑀲𑀫𑀼𑀝𑁆𑀞𑀸𑀦𑀸 𑀯𑀺𑀧𑀢𑁆𑀢𑀺 𑀘, 𑀢𑀣𑀸𑀥𑀺𑀓𑀭𑀡𑁂𑀦 𑀘𑀸𑀢𑀺.

𑀲𑀫𑀣𑀪𑁂𑀤𑁄

𑁬. 𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑀯𑀸𑀭𑁄

𑁨𑁯𑁨. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑁋 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀁? 𑀓𑀢𑀺 𑀞𑀸𑀦𑀸𑀦𑀺? 𑀓𑀢𑀺 𑀯𑀢𑁆𑀣𑀽𑀦𑀺? 𑀓𑀢𑀺 𑀪𑀽𑀫𑀺𑀬𑁄? 𑀓𑀢𑀺 𑀳𑁂𑀢𑀽? 𑀓𑀢𑀺 𑀫𑀽𑀮𑀸𑀦𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀯𑀤𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺?

𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑁋 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀁? 𑀓𑀢𑀺 𑀞𑀸𑀦𑀸𑀦𑀺? 𑀓𑀢𑀺 𑀯𑀢𑁆𑀣𑀽𑀦𑀺? 𑀓𑀢𑀺 𑀪𑀽𑀫𑀺𑀬𑁄? 𑀓𑀢𑀺 𑀳𑁂𑀢𑀽? 𑀓𑀢𑀺 𑀫𑀽𑀮𑀸𑀦𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀦𑀼𑀯𑀤𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺?

𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑁋 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀁? 𑀓𑀢𑀺 𑀞𑀸𑀦𑀸𑀦𑀺? 𑀓𑀢𑀺 𑀯𑀢𑁆𑀣𑀽𑀦𑀺? 𑀓𑀢𑀺 𑀪𑀽𑀫𑀺𑀬𑁄? 𑀓𑀢𑀺 𑀳𑁂𑀢𑀽? 𑀓𑀢𑀺 𑀫𑀽𑀮𑀸𑀦𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺?

𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑁋 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀁? 𑀓𑀢𑀺 𑀞𑀸𑀦𑀸𑀦𑀺? 𑀓𑀢𑀺 𑀯𑀢𑁆𑀣𑀽𑀦𑀺? 𑀓𑀢𑀺 𑀪𑀽𑀫𑀺𑀬𑁄? 𑀓𑀢𑀺 𑀳𑁂𑀢𑀽? 𑀓𑀢𑀺 𑀫𑀽𑀮𑀸𑀦𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀓𑀺𑀘𑁆𑀘𑀁 𑀚𑀸𑀬𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺?

𑁨𑁯𑁩. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺? 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄. 𑀓𑀢𑀺 𑀞𑀸𑀦𑀸𑀦𑀻𑀢𑀺? 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀞𑀸𑀦𑀸𑀦𑀺. 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀪𑀽𑀫𑀺𑀬𑁄. 𑀓𑀢𑀺 𑀳𑁂𑀢𑀽𑀢𑀺? 𑀦𑀯 𑀳𑁂𑀢𑀽 𑁋 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀓𑀢𑀺 𑀫𑀽𑀮𑀸𑀦𑀻𑀢𑀺? 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀯𑀤𑀢𑀻𑀢𑀺? 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀺𑀯𑀤𑀢𑀺 𑁋 𑀥𑀫𑁆𑀫𑀤𑀺𑀝𑁆𑀞𑀺 𑀯𑀸 𑀅𑀥𑀫𑁆𑀫𑀤𑀺𑀝𑁆𑀞𑀺 𑀯𑀸. [𑀘𑀽𑀴𑀯. 𑁨𑁨𑁮] 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘.

𑁨𑁯𑁪. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺? 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄. 𑀓𑀢𑀺 𑀞𑀸𑀦𑀸𑀦𑀻𑀢𑀺? 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀞𑀸𑀦𑀸𑀦𑀺. 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀯𑀢𑁆𑀣𑀽𑀦𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀪𑀽𑀫𑀺𑀬𑁄. 𑀓𑀢𑀺 𑀳𑁂𑀢𑀽𑀢𑀺? 𑀦𑀯 𑀳𑁂𑀢𑀽 𑁋 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀓𑀢𑀺 𑀫𑀽𑀮𑀸𑀦𑀻𑀢𑀺? 𑀘𑀼𑀤𑁆𑀤𑀲 𑀫𑀽𑀮𑀸𑀦𑀺. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀦𑀼𑀯𑀤𑀢𑀻𑀢𑀺? 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀦𑀼𑀯𑀤𑀢𑀺 𑁋 𑀯𑀢𑁆𑀣𑀼𑀢𑁄 𑀯𑀸 𑀆𑀧𑀢𑁆𑀢𑀺𑀢𑁄 𑀯𑀸. [𑀘𑀽𑀴𑀯. 𑁨𑁩𑁬] 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘.

𑁨𑁯𑁫. 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺? 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄. 𑀓𑀢𑀺 𑀞𑀸𑀦𑀸𑀦𑀻𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀞𑀸𑀦𑀸𑀦𑀺. 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀯𑀢𑁆𑀣𑀽𑀦𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀪𑀽𑀫𑀺𑀬𑁄. 𑀓𑀢𑀺 𑀳𑁂𑀢𑀽𑀢𑀺? 𑀙 𑀳𑁂𑀢𑀽 [𑀓𑀢𑀺 𑀳𑁂𑀢𑀽𑀢𑀺 𑀦𑀯 𑀳𑁂𑀢𑀽, 𑀢𑀬𑁄 𑀓𑀼𑀲𑀮𑀳𑁂𑀢𑀽 (𑀲𑀻. 𑀲𑁆𑀬𑀸.)] 𑁋 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀓𑀢𑀺 𑀫𑀽𑀮𑀸𑀦𑀻𑀢𑀺? 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺 𑀫𑀽𑀮𑀸𑀦𑀺. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺? 𑀙𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀅𑀮𑀚𑁆𑀚𑀺𑀢𑀸, 𑀅𑀜𑁆𑀜𑀸𑀡𑀢𑀸, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀲𑀢𑀺𑀲𑀫𑁆𑀫𑁄𑀲𑀸. [𑀘𑀽𑀴𑀯. 𑁨𑁩𑁯] 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁯𑁬. 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺? 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀤𑁄𑀲𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄. 𑀓𑀢𑀺 𑀞𑀸𑀦𑀸𑀦𑀻𑀢𑀺? 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀞𑀸𑀦𑀸𑀦𑀺. 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀯𑀢𑁆𑀣𑀽𑀦𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀪𑀽𑀫𑀺𑀬𑁄. 𑀓𑀢𑀺 𑀳𑁂𑀢𑀽𑀢𑀺? 𑀦𑀯 𑀳𑁂𑀢𑀽 𑁋 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀓𑀢𑀺 𑀫𑀽𑀮𑀸𑀦𑀻𑀢𑀺? 𑀏𑀓𑀁 𑀫𑀽𑀮𑀁 𑁋 𑀲𑀗𑁆𑀖𑁄. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀓𑀺𑀘𑁆𑀘𑀁 𑀚𑀸𑀬𑀢𑀻𑀢𑀺? 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀓𑀺𑀘𑁆𑀘𑀁 𑀚𑀸𑀬𑀢𑀺 𑁋 𑀜𑀢𑁆𑀢𑀺𑀢𑁄 𑀯𑀸 𑀅𑀧𑀮𑁄𑀓𑀦𑀢𑁄 𑀯𑀸. [𑀘𑀽𑀴𑀯. 𑁨𑁪𑁨] 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

𑀓𑀢𑀺 𑀲𑀫𑀣𑀸? 𑀲𑀢𑁆𑀢 𑀲𑀫𑀣𑀸. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄, 𑀲𑀢𑀺𑀯𑀺𑀦𑀬𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀢𑀺𑀡𑀯𑀢𑁆𑀣𑀸𑀭𑀓𑁄 𑁋 𑀇𑀫𑁂 𑀲𑀢𑁆𑀢 𑀲𑀫𑀣𑀸.

𑀲𑀺𑀬𑀸 𑀇𑀫𑁂 𑀲𑀢𑁆𑀢 𑀲𑀫𑀣𑀸 𑀤𑀲 𑀲𑀫𑀣𑀸 𑀳𑁄𑀦𑁆𑀢𑀺, 𑀤𑀲 𑀲𑀫𑀣𑀸 𑀲𑀢𑁆𑀢 𑀲𑀫𑀣𑀸 𑀳𑁄𑀦𑁆𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺.

𑀓𑀣𑀜𑁆𑀘 𑀲𑀺𑀬𑀸? 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑁂 𑀲𑀫𑀣𑀸, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑀣𑀸, 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀬𑁄 𑀲𑀫𑀣𑀸, 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑁄 𑀲𑀫𑀣𑁄. 𑀏𑀯𑀁 𑀇𑀫𑁂 𑀲𑀢𑁆𑀢 𑀲𑀫𑀣𑀸 𑀤𑀲 𑀲𑀫𑀣𑀸 𑀳𑁄𑀦𑁆𑀢𑀺, 𑀤𑀲 𑀲𑀫𑀣𑀸 𑀲𑀢𑁆𑀢 𑀲𑀫𑀣𑀸 𑀳𑁄𑀦𑁆𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀧𑀭𑀺𑀬𑀸𑀬𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀙𑀝𑁆𑀞𑁄.

𑁭. 𑀲𑀸𑀥𑀸𑀭𑀡𑀯𑀸𑀭𑁄

𑁨𑁯𑁭. 𑀓𑀢𑀺 𑀲𑀫𑀣𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸? 𑀓𑀢𑀺 𑀲𑀫𑀣𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀅𑀲𑀸𑀥𑀸𑀭𑀡𑀸?

𑀤𑁆𑀯𑁂 𑀲𑀫𑀣𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁄, 𑀬𑁂𑀪𑀼𑀬𑁆𑀬𑀲𑀺𑀓𑀸. 𑀧𑀜𑁆𑀘 𑀲𑀫𑀣𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀲𑀸𑀥𑀸𑀭𑀡𑀸 𑁋 𑀲𑀢𑀺𑀯𑀺𑀦𑀬𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀢𑀺𑀡𑀯𑀢𑁆𑀣𑀸𑀭𑀓𑁄.