𑁨. 𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸

𑁪𑁮𑁦. 𑀇𑀢𑁆𑀣𑀻 𑀘 𑀅𑀩𑁆𑀪𑀦𑁆𑀢𑀭𑁂 𑀲𑀺𑀬𑀸,

𑀪𑀺𑀓𑁆𑀔𑀼 𑀘 𑀩𑀳𑀺𑀤𑁆𑀥𑀸 𑀲𑀺𑀬𑀸;

𑀙𑀺𑀤𑁆𑀤𑀁 𑀢𑀲𑁆𑀫𑀺𑀁 𑀖𑀭𑁂 𑀦𑀢𑁆𑀣𑀺;

𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸;

𑀓𑀣𑀁 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀢𑁂𑀮𑀁 𑀫𑀥𑀼𑀁 𑀨𑀸𑀡𑀺𑀢𑀜𑁆𑀘𑀸𑀧𑀺 𑀲𑀧𑁆𑀧𑀺𑀁;

𑀲𑀸𑀫𑀁 𑀕𑀳𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂𑀬𑁆𑀬;

𑀅𑀯𑀻𑀢𑀺𑀯𑀢𑁆𑀢𑁂 𑀲𑀢𑁆𑀢𑀸𑀳𑁂;

𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀆𑀧𑀢𑁆𑀢𑀺;

𑀲𑀼𑀤𑁆𑀥𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁;

𑀆𑀧𑀚𑁆𑀚𑀦𑁆𑀢𑀲𑁆𑀲 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀪𑀺𑀓𑁆𑀔𑀽 𑀲𑀺𑀬𑀸 𑀯𑀻𑀲𑀢𑀺𑀬𑀸 𑀲𑀫𑀸𑀕𑀢𑀸;

𑀓𑀫𑁆𑀫𑀁 𑀓𑀭𑁂𑀬𑁆𑀬𑀼𑀁 𑀲𑀫𑀕𑁆𑀕𑀲𑀜𑁆𑀜𑀺𑀦𑁄;

𑀪𑀺𑀓𑁆𑀔𑀼 𑀲𑀺𑀬𑀸 𑀤𑁆𑀯𑀸𑀤𑀲𑀬𑁄𑀚𑀦𑁂 𑀞𑀺𑀢𑁄;

𑀓𑀫𑁆𑀫𑀜𑁆𑀘 𑀢𑀁 𑀓𑀼𑀧𑁆𑀧𑁂𑀬𑁆𑀬 𑀯𑀕𑁆𑀕𑀧𑀘𑁆𑀘𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦 𑀯𑀸𑀘𑀸𑀬 𑀪𑀡𑀺𑀢𑁂𑀦 𑀘;

𑀲𑀩𑁆𑀩𑀸𑀦𑀺 𑀕𑀭𑀼𑀓𑀸𑀦𑀺 𑀲𑀧𑁆𑀧𑀝𑀺𑀓𑀫𑁆𑀫𑀸𑀦𑀺;

𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦𑀺𑀯𑀢𑁆𑀣𑁄 𑀅𑀦𑁆𑀢𑀭𑀯𑀸𑀲𑀓𑁂𑀦;

𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀢𑁄;

𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀘𑀸𑀧𑀺 𑀜𑀢𑁆𑀢𑀺 𑀦 𑀘 𑀧𑀦 𑀓𑀫𑁆𑀫𑀯𑀸𑀘𑀸;

𑀦 𑀘𑁂𑀳𑀺 𑀪𑀺𑀓𑁆𑀔𑀽𑀢𑀺 𑀚𑀺𑀦𑁄 𑀅𑀯𑁄𑀘;

𑀲𑀭𑀡𑀕𑀫𑀦𑀫𑁆𑀧𑀺 𑀦 𑀢𑀲𑁆𑀲 𑀅𑀢𑁆𑀣𑀺;

𑀉𑀧𑀲𑀫𑁆𑀧𑀤𑀸 𑀘𑀲𑁆𑀲 𑀅𑀓𑀼𑀧𑁆𑀧𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀇𑀢𑁆𑀣𑀺𑀁 𑀳𑀦𑁂 𑀦 𑀫𑀸𑀢𑀭𑀁, 𑀧𑀼𑀭𑀺𑀲𑀜𑁆𑀘 𑀦 𑀧𑀺𑀢𑀭𑀁 𑀳𑀦𑁂;

𑀳𑀦𑁂𑀬𑁆𑀬 𑀅𑀦𑀭𑀺𑀬𑀁 𑀫𑀦𑁆𑀤𑁄, 𑀢𑁂𑀦 𑀘𑀸𑀦𑀦𑁆𑀢𑀭𑀁 𑀨𑀼𑀲𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀇𑀢𑁆𑀣𑀺𑀁 𑀳𑀦𑁂 𑀘 𑀫𑀸𑀢𑀭𑀁, 𑀧𑀼𑀭𑀺𑀲𑀜𑁆𑀘 𑀧𑀺𑀢𑀭𑀁 𑀳𑀦𑁂;

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀦 𑀢𑁂𑀦𑀸𑀦𑀦𑁆𑀢𑀭𑀁 𑀨𑀼𑀲𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀅𑀘𑁄𑀤𑀬𑀺𑀢𑁆𑀯𑀸 𑀅𑀲𑁆𑀲𑀸𑀭𑀬𑀺𑀢𑁆𑀯𑀸;

𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀓𑀭𑁂𑀬𑁆𑀬 𑀓𑀫𑁆𑀫𑀁;

𑀓𑀢𑀜𑁆𑀘 𑀓𑀫𑁆𑀫𑀁 𑀲𑀼𑀓𑀢𑀁 𑀪𑀯𑁂𑀬𑁆𑀬;

𑀓𑀸𑀭𑀓𑁄 𑀘 𑀲𑀗𑁆𑀖𑁄 𑀅𑀦𑀸𑀧𑀢𑁆𑀢𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀘𑁄𑀤𑀬𑀺𑀢𑁆𑀯𑀸 𑀲𑀸𑀭𑀬𑀺𑀢𑁆𑀯𑀸;

𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀓𑀭𑁂𑀬𑁆𑀬 𑀓𑀫𑁆𑀫𑀁;

𑀓𑀢𑀜𑁆𑀘 𑀓𑀫𑁆𑀫𑀁 𑀅𑀓𑀢𑀁 𑀪𑀯𑁂𑀬𑁆𑀬;

𑀓𑀸𑀭𑀓𑁄 𑀘 𑀲𑀗𑁆𑀖𑁄 𑀲𑀸𑀧𑀢𑁆𑀢𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀙𑀺𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀙𑀸𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀙𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁, 𑀫𑀼𑀲𑀸 𑀘 𑀮𑀳𑀼 𑀪𑀸𑀲𑀢𑁄;

𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁, 𑀲𑀘𑁆𑀘𑀜𑁆𑀘 𑀮𑀳𑀼 𑀪𑀸𑀲𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.