𑁧. 𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺

𑁪𑁭𑁪. 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀓𑀸𑀬𑀺𑀓𑀸, 𑀓𑀢𑀺 𑀯𑀸𑀘𑀲𑀺𑀓𑀸 𑀓𑀢𑀸.

𑀙𑀸𑀤𑁂𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀲𑀁𑀲𑀕𑁆𑀕𑀧𑀘𑁆𑀘𑀬𑀸.

𑀙𑀸𑀧𑀢𑁆𑀢𑀺𑀬𑁄 𑀓𑀸𑀬𑀺𑀓𑀸, 𑀙 𑀯𑀸𑀘𑀲𑀺𑀓𑀸 𑀓𑀢𑀸;

𑀙𑀸𑀤𑁂𑀦𑁆𑀢𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀲𑀁𑀲𑀕𑁆𑀕𑀧𑀘𑁆𑀘𑀬𑀸.

𑀅𑀭𑀼𑀡𑀼𑀕𑁆𑀕𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀬𑀸𑀯𑀢𑀢𑀺𑀬𑀓𑀸;

𑀓𑀢𑁂𑀢𑁆𑀣 𑀅𑀝𑁆𑀞 𑀯𑀢𑁆𑀣𑀼𑀓𑀸, 𑀓𑀢𑀺𑀳𑀺 𑀲𑀩𑁆𑀩𑀲𑀗𑁆𑀕𑀳𑁄.

𑀅𑀭𑀼𑀡𑀼𑀕𑁆𑀕𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀤𑁆𑀯𑁂 𑀬𑀸𑀯𑀢𑀢𑀺𑀬𑀓𑀸;

𑀏𑀓𑁂𑀢𑁆𑀣 𑀅𑀝𑁆𑀞 𑀯𑀢𑁆𑀣𑀼𑀓𑀸, 𑀏𑀓𑁂𑀦 𑀲𑀩𑁆𑀩𑀲𑀗𑁆𑀕𑀳𑁄.

𑀯𑀺𑀦𑀬𑀲𑁆𑀲 𑀓𑀢𑀺 𑀫𑀽𑀮𑀸𑀦𑀺, 𑀬𑀸𑀦𑀺 𑀩𑀼𑀤𑁆𑀥𑁂𑀦 𑀧𑀜𑁆𑀜𑀢𑁆𑀢𑀸;

𑀯𑀺𑀦𑀬𑀕𑀭𑀼𑀓𑀸 𑀓𑀢𑀺 𑀯𑀼𑀢𑁆𑀢𑀸, 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀸 𑀓𑀢𑀺.

𑀯𑀺𑀦𑀬𑀲𑁆𑀲 𑀤𑁆𑀯𑁂 𑀫𑀽𑀮𑀸𑀦𑀺, 𑀬𑀸𑀦𑀺 𑀩𑀼𑀤𑁆𑀥𑁂𑀦 𑀧𑀜𑁆𑀜𑀢𑁆𑀢𑀸;

𑀯𑀺𑀦𑀬𑀕𑀭𑀼𑀓𑀸 𑀤𑁆𑀯𑁂 𑀯𑀼𑀢𑁆𑀢𑀸, 𑀤𑁆𑀯𑁂 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀸.

𑀕𑀸𑀫𑀦𑁆𑀢𑀭𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀦𑀤𑀺𑀧𑀸𑀭𑀧𑀘𑁆𑀘𑀬𑀸;

𑀓𑀢𑀺𑀫𑀁𑀲𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀢𑀺𑀫𑀁𑀲𑁂𑀲𑀼 𑀤𑀼𑀓𑁆𑀓𑀝𑀁.

𑀕𑀸𑀫𑀦𑁆𑀢𑀭𑁂 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀘𑀢𑀲𑁆𑀲𑁄 𑀦𑀤𑀺𑀧𑀸𑀭𑀧𑀘𑁆𑀘𑀬𑀸;

𑀏𑀓𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀯𑀫𑀁𑀲𑁂𑀲𑀼 𑀤𑀼𑀓𑁆𑀓𑀝𑀁.

𑀓𑀢𑀺 𑀯𑀸𑀘𑀲𑀺𑀓𑀸 𑀭𑀢𑁆𑀢𑀺𑀁, 𑀓𑀢𑀺 𑀯𑀸𑀘𑀲𑀺𑀓𑀸 𑀤𑀺𑀯𑀸;

𑀤𑀤𑀫𑀸𑀦𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀓𑀺𑀢𑁆𑀢𑀓𑀸.

𑀤𑁆𑀯𑁂 𑀯𑀸𑀘𑀲𑀺𑀓𑀸 𑀭𑀢𑁆𑀢𑀺𑀁, 𑀤𑁆𑀯𑁂 𑀯𑀸𑀘𑀲𑀺𑀓𑀸 𑀤𑀺𑀯𑀸;

𑀤𑀤𑀫𑀸𑀦𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀕𑁆𑀕𑀳𑁂.