𑀫𑀳𑀸𑀲𑀗𑁆𑀕𑀸𑀫𑁄

𑁧. 𑀯𑁄𑀳𑀭𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀸𑀤𑀺

𑁩𑁬𑁮. 𑀲𑀗𑁆𑀕𑀸𑀫𑀸𑀯𑀘𑀭𑁂 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑁂 𑀯𑁄𑀳𑀭𑀦𑁆𑀢𑁂𑀦 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀆𑀓𑀸𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀼𑀩𑁆𑀩𑀸𑀧𑀭𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀢𑀸𑀓𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁, 𑀅𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀲𑀫𑀣𑁄 𑀚𑀸𑀦𑀺𑀢𑀩𑁆𑀩𑁄, 𑀦 𑀙𑀦𑁆𑀤𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀤𑁄𑀲𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀫𑁄𑀳𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀪𑀬𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀩𑁆𑀩𑀁, 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀩𑁆𑀩𑀁, 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀺𑀢𑀩𑁆𑀩𑀁, 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀩𑁆𑀩𑀁, 𑀮𑀤𑁆𑀥𑀧𑀓𑁆𑀔𑁄𑀫𑁆𑀳𑀻𑀢𑀺 𑀧𑀭𑀧𑀓𑁆𑀔𑁄 𑀦𑀸𑀯𑀚𑀸𑀦𑀺𑀢𑀩𑁆𑀩𑁄, 𑀩𑀳𑀼𑀲𑁆𑀲𑀼𑀢𑁄𑀫𑁆𑀳𑀻𑀢𑀺 𑀅𑀧𑁆𑀧𑀲𑁆𑀲𑀼𑀢𑁄 𑀦𑀸𑀯𑀚𑀸𑀦𑀺𑀢𑀩𑁆𑀩𑁄, 𑀣𑁂𑀭𑀢𑀭𑁄𑀫𑁆𑀳𑀻𑀢𑀺 𑀦𑀯𑀓𑀢𑀭𑁄 𑀦𑀸𑀯𑀚𑀸𑀦𑀺𑀢𑀩𑁆𑀩𑁄, 𑀅𑀲𑀫𑁆𑀧𑀢𑁆𑀢𑀁 𑀦 𑀩𑁆𑀬𑀸𑀳𑀸𑀢𑀩𑁆𑀩𑀁, 𑀲𑀫𑁆𑀧𑀢𑁆𑀢𑀁 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀦 𑀧𑀭𑀺𑀳𑀸𑀧𑁂𑀢𑀩𑁆𑀩𑀁, 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁.

𑁩𑁬𑁯. 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀧𑀸𑀭𑀸𑀚𑀺𑀓𑀸𑀦𑀁 [𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 (𑀲𑀻. 𑀓.)] 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀢𑁂𑀯𑀻𑀲𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑁂𑀅𑀦𑀺𑀬𑀢𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑁂𑀘𑀢𑁆𑀢𑀸𑀭𑀻𑀲𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀅𑀝𑁆𑀞𑀸𑀲𑀻𑀢𑀺𑀲𑀢𑀧𑀸𑀘𑀺𑀢𑁆𑀢𑀺𑀬𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑀸𑀤𑀲𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀤𑀼𑀓𑁆𑀓𑀝𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁.

𑁩𑁭𑁦. 𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸.

𑁩𑁭𑁧. 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸.

𑁩𑁭𑁨. 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀧𑀸𑀭𑀸𑀚𑀺𑀓𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀢𑁂𑀯𑀻𑀲𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑁂𑀅𑀦𑀺𑀬𑀢𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑁂𑀘𑀢𑁆𑀢𑀸𑀭𑀻𑀲𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀅𑀝𑁆𑀞𑀸𑀲𑀻𑀢𑀺𑀲𑀢𑀧𑀸𑀘𑀺𑀢𑁆𑀢𑀺𑀬𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀤𑁆𑀯𑀸𑀤𑀲𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀤𑀼𑀓𑁆𑀓𑀝𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀦𑀺𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁.

𑁩𑁭𑁩. 𑀆𑀓𑀸𑀭𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀲𑀗𑁆𑀖𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀕𑀡𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀼𑀕𑁆𑀕𑀮𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀘𑁄𑀤𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀘𑀼𑀤𑀺𑀢𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀲𑀗𑁆𑀖𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀝𑀺𑀩𑀮𑁄 𑀦𑀼 𑀔𑁄 𑀅𑀬𑀁 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀲𑀗𑁆𑀖𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀕𑀡𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀝𑀺𑀩𑀮𑁄 𑀦𑀼 𑀔𑁄 𑀅𑀬𑀁 𑀕𑀡𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀕𑀡𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀧𑀼𑀕𑁆𑀕𑀮𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀝𑀺𑀩𑀮𑁄 𑀦𑀼 𑀔𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀧𑀼𑀕𑁆𑀕𑀮𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀘𑁄𑀤𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀭𑀁 𑀘𑁄𑀤𑁂𑀢𑀺 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀘𑁄𑀤𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀘𑀼𑀤𑀺𑀢𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀘𑀼𑀤𑀺𑀢𑀓𑁄 𑀆𑀓𑀸𑀭𑀢𑁄 𑀚𑀸𑀦𑀺𑀢𑀩𑁆𑀩𑁄.

𑁩𑁭𑁪. 𑀧𑀼𑀩𑁆𑀩𑀸𑀧𑀭𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀯𑀢𑁆𑀣𑀼𑀢𑁄 𑀯𑀸 𑀯𑀢𑁆𑀣𑀼𑀁 𑀲𑀗𑁆𑀓𑀫𑀢𑀺, 𑀯𑀺𑀧𑀢𑁆𑀢𑀺𑀢𑁄 𑀯𑀸 𑀯𑀺𑀧𑀢𑁆𑀢𑀺𑀁 𑀲𑀗𑁆𑀓𑀫𑀢𑀺, 𑀆𑀧𑀢𑁆𑀢𑀺𑀢𑁄 𑀯𑀸 𑀆𑀧𑀢𑁆𑀢𑀺𑀁 𑀲𑀗𑁆𑀓𑀫𑀢𑀺, 𑀅𑀯𑀚𑀸𑀦𑀺𑀢𑁆𑀯𑀸 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀉𑀤𑀸𑀳𑀼 𑀦𑁄𑀢𑀺, 𑀏𑀯𑀁 𑀧𑀼𑀩𑁆𑀩𑀸𑀧𑀭𑀁 𑀚𑀸𑀦𑀺𑀢𑀩𑁆𑀩𑀁.

𑁩𑁭𑁫. 𑀓𑀢𑀸𑀓𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑁄 𑀚𑀸𑀦𑀺𑀢𑀩𑁆𑀩𑁄, 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑀁 𑀚𑀸𑀦𑀺𑀢𑀩𑁆𑀩𑀁, 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀚𑀸𑀦𑀺𑀢𑀩𑁆𑀩𑁄. 𑀫𑁂𑀣𑀼𑀦𑀥𑀫𑁆𑀫𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀫𑀼𑀔𑁂𑀦 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀕𑀡𑁆𑀳𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀡𑁆𑀡𑀸𑀯𑀡𑁆𑀡𑁄 [𑀯𑀡𑁆𑀡𑁄 𑀅𑀯𑀡𑁆𑀡𑁄 (𑀲𑁆𑀬𑀸.)], 𑀓𑀸𑀬𑀲𑀁𑀲𑀕𑁆𑀕𑁄, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀯𑀘𑀦𑀫𑀦𑀼𑀧𑁆𑀧𑀤𑀸𑀦𑀁 [𑀥𑀦𑀫𑀦𑀼𑀧𑁆𑀧𑀤𑀸𑀦𑀁 (𑀓.)].

𑁩𑁭𑁬. 𑀓𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀲𑁄𑀴𑀲𑀓𑀫𑁆𑀫𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺 𑁋 𑀘𑀢𑁆𑀢𑀸𑀭𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀘𑀢𑁆𑀢𑀸𑀭𑀺 𑀜𑀢𑁆𑀢𑀺𑀓𑀫𑁆𑀫𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀘𑀢𑁆𑀢𑀸𑀭𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀘𑀢𑁆𑀢𑀸𑀭𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺.

𑁩𑁭𑁭. 𑀅𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁.

𑁩𑁭𑁮. 𑀲𑀫𑀣𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀲𑀢𑁆𑀢 𑀲𑀫𑀣𑀸 𑀚𑀸𑀦𑀺𑀢𑀩𑁆𑀩𑀸 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄, 𑀲𑀢𑀺𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀬𑁂𑀪𑀼𑀬𑁆𑀬𑀲𑀺𑀓𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀺𑀡𑀯𑀢𑁆𑀣𑀸𑀭𑀓𑁄 𑀚𑀸𑀦𑀺𑀢𑀩𑁆𑀩𑁄.

𑁨. 𑀅𑀕𑀢𑀺𑀅𑀕𑀦𑁆𑀢𑀩𑁆𑀩𑁄

𑁩𑁭𑁯. 𑀦 𑀙𑀦𑁆𑀤𑀸𑀕𑀢𑀺 𑀕𑀦𑁆𑀢𑀩𑁆𑀩𑀸𑀢𑀺 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑀣𑀁 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀇𑀥𑁂𑀓𑀘𑁆𑀘𑁄 𑁋 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀯𑀸’’𑀢𑀺, 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀢𑀲𑁆𑀲𑀸𑀦𑀼𑀭𑀓𑁆𑀔𑀸𑀬 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀏𑀯𑀁 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁦. 𑀦 𑀤𑁄𑀲𑀸𑀕𑀢𑀺 𑀕𑀦𑁆𑀢𑀩𑁆𑀩𑀸𑀢𑀺 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑀣𑀁 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺… 𑀅𑀦𑀢𑁆𑀣𑀁 𑀘𑀭𑀢𑀺… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺… 𑀅𑀢𑁆𑀣𑀁 𑀘𑀭𑀢𑀺… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺. 𑀇𑀫𑁂𑀳𑀺 𑀦𑀯𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀺 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀓𑀼𑀤𑁆𑀥𑁄 𑀓𑁄𑀥𑀸𑀪𑀺𑀪𑀽𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀏𑀯𑀁 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁧. 𑀦 𑀫𑁄𑀳𑀸𑀕𑀢𑀺 𑀕𑀦𑁆𑀢𑀩𑁆𑀩𑀸𑀢𑀺 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑀣𑀁 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀫𑀽𑀴𑁆𑀳𑁄 𑀲𑀁𑀫𑀽𑀴𑁆𑀳𑁄 𑀫𑁄𑀳𑀸𑀪𑀺𑀪𑀽𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀏𑀯𑀁 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁨. 𑀦 𑀪𑀬𑀸𑀕𑀢𑀺 𑀕𑀦𑁆𑀢𑀩𑁆𑀩𑀸𑀢𑀺 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑀣𑀁 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀇𑀥𑁂𑀓𑀘𑁆𑀘𑁄 𑁋 ‘‘𑀅𑀬𑀁 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀯𑀸 𑀕𑀳𑀦𑀦𑀺𑀲𑁆𑀲𑀺𑀢𑁄 𑀯𑀸 𑀩𑀮𑀯𑀦𑀺𑀲𑁆𑀲𑀺𑀢𑁄 𑀯𑀸 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺, 𑀢𑀲𑁆𑀲 𑀪𑀬𑀸 𑀪𑀻𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀏𑀯𑀁 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸𑀢𑀺.

𑁩. 𑀅𑀕𑀢𑀺𑀅𑀕𑀫𑀦𑀁

𑁩𑁮𑁩. 𑀓𑀣𑀁 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁪. 𑀓𑀣𑀁 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁫. 𑀓𑀣𑀁 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺.

𑁩𑁮𑁬. 𑀓𑀣𑀁 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸𑀢𑀺.

𑁪. 𑀲𑀜𑁆𑀜𑀸𑀧𑀦𑀻𑀬𑀸𑀤𑀺

𑁩𑁮𑁭. 𑀓𑀣𑀁 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺. 𑀏𑀯𑀁 𑀲𑀜𑁆𑀜𑀸𑀧𑀦𑀻𑀬𑁂 𑀞𑀸𑀦𑁂 𑀲𑀜𑁆𑀜𑀸𑀧𑁂𑀢𑀺.

𑁩𑁮𑁮. 𑀓𑀣𑀁 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺. 𑀏𑀯𑀁 𑀦𑀺𑀚𑁆𑀛𑀸𑀧𑀦𑀻𑀬𑁂 𑀞𑀸𑀦𑁂 𑀦𑀺𑀚𑁆𑀛𑀸𑀧𑁂𑀢𑀺.

𑁩𑁮𑁯. 𑀓𑀣𑀁 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺. 𑀏𑀯𑀁 𑀧𑁂𑀓𑁆𑀔𑀦𑀻𑀬𑁂 𑀞𑀸𑀦𑁂 𑀧𑁂𑀓𑁆𑀔𑀢𑀺.

𑁩𑁯𑁦. 𑀓𑀣𑀁 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺? 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑁄 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺. 𑀏𑀯𑀁 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑁂𑀢𑀺.

𑁫. 𑀧𑀭𑀧𑀓𑁆𑀔𑀸𑀤𑀺𑀅𑀯𑀚𑀸𑀦𑀦𑀁

𑁩𑁯𑁧. 𑀓𑀣𑀁 𑀮𑀤𑁆𑀥𑀧𑀓𑁆𑀔𑁄𑀫𑁆𑀳𑀻𑀢𑀺 𑀧𑀭𑀧𑀓𑁆𑀔𑀁 𑀅𑀯𑀚𑀸𑀦𑀸𑀢𑀺? 𑀇𑀥𑁂𑀓𑀘𑁆𑀘𑁄 𑀮𑀤𑁆𑀥𑀧𑀓𑁆𑀔𑁄 𑀳𑁄𑀢𑀺 𑀮𑀤𑁆𑀥𑀧𑀭𑀺𑀯𑀸𑀭𑁄 𑀧𑀓𑁆𑀔𑀯𑀸 𑀜𑀸𑀢𑀺𑀫𑀸. ‘‘𑀅𑀬𑀁 𑀅𑀮𑀤𑁆𑀥𑀧𑀓𑁆𑀔𑁄 𑀅𑀮𑀤𑁆𑀥𑀧𑀭𑀺𑀯𑀸𑀭𑁄 𑀦 𑀧𑀓𑁆𑀔𑀯𑀸 𑀦 𑀜𑀸𑀢𑀺𑀫𑀸’’𑀢𑀺 𑀢𑀲𑁆𑀲 𑀅𑀯𑀚𑀸𑀦𑀦𑁆𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀮𑀤𑁆𑀥𑀧𑀓𑁆𑀔𑁄𑀫𑁆𑀳𑀻𑀢𑀺 𑀧𑀭𑀧𑀓𑁆𑀔𑀁 𑀅𑀯𑀚𑀸𑀦𑀸𑀢𑀺.

𑁩𑁯𑁨. 𑀓𑀣𑀁 𑀩𑀳𑀼𑀲𑁆𑀲𑀼𑀢𑁄𑀫𑁆𑀳𑀻𑀢𑀺 𑀅𑀧𑁆𑀧𑀲𑁆𑀲𑀼𑀢𑀁 𑀅𑀯𑀚𑀸𑀦𑀸𑀢𑀺? 𑀇𑀥𑁂𑀓𑀘𑁆𑀘𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄. ‘‘𑀅𑀬𑀁 𑀅𑀧𑁆𑀧𑀲𑁆𑀲𑀼𑀢𑁄 𑀅𑀧𑁆𑀧𑀸𑀕𑀫𑁄 𑀅𑀧𑁆𑀧𑀥𑀭𑁄’’𑀢𑀺 𑀢𑀲𑁆𑀲 𑀅𑀯𑀚𑀸𑀦𑀦𑁆𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀩𑀳𑀼𑀲𑁆𑀲𑀼𑀢𑁄𑀫𑁆𑀳𑀻𑀢𑀺 𑀅𑀧𑁆𑀧𑀲𑁆𑀲𑀼𑀢𑀁 𑀅𑀯𑀚𑀸𑀦𑀸𑀢𑀺.

𑁩𑁯𑁩. 𑀓𑀣𑀁 𑀣𑁂𑀭𑀢𑀭𑁄𑀫𑁆𑀳𑀻𑀢𑀺 𑀦𑀯𑀓𑀢𑀭𑀁 𑀅𑀯𑀚𑀸𑀦𑀸𑀢𑀺? 𑀇𑀥𑁂𑀓𑀘𑁆𑀘𑁄 𑀣𑁂𑀭𑁄 𑀳𑁄𑀢𑀺 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀬𑀁 𑀦𑀯𑀓𑁄 𑀅𑀧𑁆𑀧𑀜𑁆𑀜𑀸𑀢𑁄 𑀅𑀧𑁆𑀧𑀓𑀢𑀜𑁆𑀜𑀽 𑀇𑀫𑀲𑁆𑀲 𑀯𑀘𑀦𑀁 𑀅𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀯𑀚𑀸𑀦𑀦𑁆𑀢𑁄 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺 …𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀣𑁂𑀭𑀢𑀭𑁄𑀫𑁆𑀳𑀻𑀢𑀺 𑀦𑀯𑀓𑀢𑀭𑀁 𑀅𑀯𑀚𑀸𑀦𑀸𑀢𑀺.

𑁩𑁯𑁪. 𑀅𑀲𑀫𑁆𑀧𑀢𑁆𑀢𑀁 𑀦 𑀩𑁆𑀬𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀦𑁄𑀢𑀺𑀡𑁆𑀡𑀁 𑀪𑀸𑀭𑀁 [𑀪𑀸𑀲𑀁 (𑀲𑁆𑀬𑀸.)] 𑀦 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀫𑁆𑀧𑀢𑁆𑀢𑀁 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀦 𑀧𑀭𑀺𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀁𑀅𑀢𑁆𑀣𑀸𑀬 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺 𑀢𑀁 𑀅𑀢𑁆𑀣𑀁 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀦 𑀧𑀭𑀺𑀳𑀸𑀧𑁂𑀢𑀩𑁆𑀩𑀁.

𑁩𑁯𑁫. 𑀬𑁂𑀦 𑀥𑀫𑁆𑀫𑁂𑀦𑀸𑀢𑀺 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸. 𑀬𑁂𑀦 𑀯𑀺𑀦𑀬𑁂𑀦𑀸𑀢𑀺 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸. 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸𑀬, 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺.

𑁬. 𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀅𑀦𑀼𑀬𑁄𑀕𑀁

𑁩𑁯𑁬. 𑀅𑀦𑀼𑀯𑀺𑀚𑁆𑀚𑀓𑁂𑀦 𑀘𑁄𑀤𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀫𑁆𑀳𑀺 𑀦𑀁 𑀞𑀧𑁂𑀲𑀺, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀲𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀲𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀚𑀸𑀦𑀸𑀢𑀺 𑀧𑀦𑀸𑀬𑀲𑁆𑀫𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀚𑀸𑀦𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀓𑀢𑀫𑀸 𑀧𑀦𑀸𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺 𑀓𑀢𑀫𑀸 𑀆𑀘𑀸𑀭𑀯𑀺𑀧𑀢𑁆𑀢𑀺 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑁋 𑀅𑀬𑀁 𑀲𑀻𑀮𑀯𑀺𑀧𑀢𑁆𑀢𑀺. 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁 𑁋 𑀅𑀬𑀁 𑀆𑀘𑀸𑀭𑀯𑀺𑀧𑀢𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀤𑀺𑀝𑁆𑀞𑁂𑀦 𑀯𑀸 𑀞𑀧𑁂𑀲𑀺, 𑀲𑀼𑀢𑁂𑀦 𑀯𑀸 𑀞𑀧𑁂𑀲𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀞𑀧𑁂𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀤𑀺𑀝𑁆𑀞𑁂𑀦 𑀯𑀸 𑀞𑀧𑁂𑀫𑀺, 𑀲𑀼𑀢𑁂𑀦 𑀯𑀸 𑀞𑀧𑁂𑀫𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀝𑁆𑀞𑁂𑀦 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀓𑀤𑀸 𑀢𑁂 𑀤𑀺𑀝𑁆𑀞𑀁, 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀢𑁆𑀣 𑀘 𑀢𑁆𑀯𑀁 𑀅𑀳𑁄𑀲𑀺, 𑀓𑀢𑁆𑀣 𑀘𑀸𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀓𑀺𑀜𑁆𑀘 𑀢𑁆𑀯𑀁 𑀓𑀭𑁄𑀲𑀺, 𑀓𑀺𑀁 𑀘𑀸𑀬𑀁 𑀪𑀺𑀓𑁆𑀔𑀼 𑀓𑀭𑁄𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀝𑁆𑀞𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀺, 𑀅𑀧𑀺 𑀘 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀲𑀺 𑀓𑀺𑀁 𑀢𑁂 𑀲𑀼𑀢𑀁, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁, 𑀓𑀤𑀸 𑀢𑁂 𑀲𑀼𑀢𑀁, 𑀓𑀢𑁆𑀣 𑀢𑁂 𑀲𑀼𑀢𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑀁, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑀁, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑀁, 𑀉𑀧𑀸𑀲𑀓𑀲𑁆𑀲 𑀲𑀼𑀢𑀁, 𑀉𑀧𑀸𑀲𑀺𑀓𑀸𑀬 𑀲𑀼𑀢𑀁, 𑀭𑀸𑀚𑀽𑀦𑀁 𑀲𑀼𑀢𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀺, 𑀅𑀧𑀺 𑀘 𑀧𑀭𑀺𑀲𑀗𑁆𑀓𑀸𑀬 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀗𑁆𑀓𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀁 𑀧𑀭𑀺𑀲𑀗𑁆𑀓𑀲𑀺, 𑀓𑀺𑀦𑁆𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀓𑀤𑀸 𑀧𑀭𑀺𑀲𑀗𑁆𑀓𑀲𑀺, 𑀓𑀢𑁆𑀣 𑀧𑀭𑀺𑀲𑀗𑁆𑀓𑀲𑀺, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀓𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀺𑀓𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀭𑀸𑀚𑀽𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀻’’𑀢𑀺?

𑁩𑁯𑁭. 𑀤𑀺𑀝𑁆𑀞𑀁 𑀤𑀺𑀝𑁆𑀞𑁂𑀦 𑀲𑀫𑁂𑀢𑀺, 𑀤𑀺𑀝𑁆𑀞𑁂𑀦 𑀲𑀁𑀲𑀦𑁆𑀤𑀢𑁂 𑀤𑀺𑀝𑁆𑀞𑀁;

𑀤𑀺𑀝𑁆𑀞𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑀸 𑀢𑁂𑀦 𑀧𑀯𑀸𑀭𑀡𑀸.

𑀲𑀼𑀢𑀁 𑀲𑀼𑀢𑁂𑀦 𑀲𑀫𑁂𑀢𑀺, 𑀲𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀲𑀼𑀢𑀁;

𑀲𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑀸 𑀢𑁂𑀦 𑀧𑀯𑀸𑀭𑀡𑀸.

𑀫𑀼𑀢𑀁 𑀫𑀼𑀢𑁂𑀦 𑀲𑀫𑁂𑀢𑀺, 𑀫𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀫𑀼𑀢𑀁;

𑀫𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑀸 𑀢𑁂𑀦 𑀧𑀯𑀸𑀭𑀡𑀸𑀢𑀺.

𑁭. 𑀧𑀼𑀘𑁆𑀙𑀸𑀯𑀺𑀪𑀸𑀕𑁄

𑁩𑁯𑁮. 𑀓𑀺𑀁 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀓𑀢𑀫𑀸 𑀧𑀼𑀘𑁆𑀙𑀸? 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀓𑀢𑀫𑀸 𑀧𑀼𑀘𑁆𑀙𑀸? 𑀓𑀤𑀸 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀓𑀢𑀫𑀸 𑀧𑀼𑀘𑁆𑀙𑀸? 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀓𑀢𑀫𑀸 𑀧𑀼𑀘𑁆𑀙𑀸?

𑁩𑁯𑁯. 𑀓𑀺𑀁 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸, 𑀆𑀧𑀢𑁆𑀢𑀺𑀧𑀼𑀘𑁆𑀙𑀸, 𑀅𑀚𑁆𑀛𑀸𑀘𑀸𑀭𑀧𑀼𑀘𑁆𑀙𑀸. 𑀯𑀢𑁆𑀣𑀼𑀧𑀼𑀘𑁆𑀙𑀸𑀢𑀺 𑁋 𑀅𑀝𑁆𑀞𑀧𑀸𑀭𑀸𑀚𑀺𑀓𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀢𑁂𑀯𑀻𑀲𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀤𑁆𑀯𑁂𑀅𑀦𑀺𑀬𑀢𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀤𑁆𑀯𑁂𑀘𑀢𑁆𑀢𑀸𑀭𑀻𑀲𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀅𑀝𑁆𑀞𑀸𑀲𑀻𑀢𑀺𑀲𑀢𑀧𑀸𑀘𑀺𑀢𑁆𑀢𑀺𑀬𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀤𑁆𑀯𑀸𑀤𑀲𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀤𑀼𑀓𑁆𑀓𑀝𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸, 𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀯𑀢𑁆𑀣𑀼𑀧𑀼𑀘𑁆𑀙𑀸. 𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀼𑀘𑁆𑀙𑀸. 𑀆𑀧𑀢𑁆𑀢𑀺𑀧𑀼𑀘𑁆𑀙𑀸𑀢𑀺 𑁋 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀧𑀼𑀘𑁆𑀙𑀸, 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀧𑀼𑀘𑁆𑀙𑀸. 𑀅𑀚𑁆𑀛𑀸𑀘𑀸𑀭𑀧𑀼𑀘𑁆𑀙𑀸𑀢𑀺 𑁋 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀧𑀼𑀘𑁆𑀙𑀸.

𑁪𑁦𑁦. 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀮𑀺𑀗𑁆𑀕𑀧𑀼𑀘𑁆𑀙𑀸, 𑀇𑀭𑀺𑀬𑀸𑀧𑀣𑀧𑀼𑀘𑁆𑀙𑀸, 𑀆𑀓𑀸𑀭𑀧𑀼𑀘𑁆𑀙𑀸, 𑀯𑀺𑀧𑁆𑀧𑀓𑀸𑀭𑀧𑀼𑀘𑁆𑀙𑀸. 𑀮𑀺𑀗𑁆𑀕𑀧𑀼𑀘𑁆𑀙𑀸𑀢𑀺 𑁋 𑀤𑀻𑀖𑀁 𑀯𑀸 𑀭𑀲𑁆𑀲𑀁 𑀯𑀸 𑀓𑀡𑁆𑀳𑀁 𑀯𑀸 𑀑𑀤𑀸𑀢𑀁 𑀯𑀸. 𑀇𑀭𑀺𑀬𑀸𑀧𑀣𑀧𑀼𑀘𑁆𑀙𑀸𑀢𑀺 𑀕𑀘𑁆𑀙𑀦𑁆𑀢𑀁 𑀯𑀸 𑀞𑀺𑀢𑀁 𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀦𑀺𑀧𑀦𑁆𑀦𑀁 𑀯𑀸. 𑀆𑀓𑀸𑀭𑀧𑀼𑀘𑁆𑀙𑀸𑀢𑀺 𑀕𑀺𑀳𑀺𑀮𑀺𑀗𑁆𑀕𑁂 𑀯𑀸 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑁂 𑀯𑀸 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑁂 𑀯𑀸. 𑀯𑀺𑀧𑁆𑀧𑀓𑀸𑀭𑀧𑀼𑀘𑁆𑀙𑀸𑀢𑀺 𑀕𑀘𑁆𑀙𑀦𑁆𑀢𑀁 𑀯𑀸 𑀞𑀺𑀢𑀁 𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀦𑀺𑀧𑀦𑁆𑀦𑀁 𑀯𑀸.

𑁪𑁦𑁧. 𑀓𑀤𑀸 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀓𑀸𑀮𑀧𑀼𑀘𑁆𑀙𑀸, 𑀲𑀫𑀬𑀧𑀼𑀘𑁆𑀙𑀸, 𑀤𑀺𑀯𑀲𑀧𑀼𑀘𑁆𑀙𑀸, 𑀉𑀢𑀼𑀧𑀼𑀘𑁆𑀙𑀸. 𑀓𑀸𑀮𑀧𑀼𑀘𑁆𑀙𑀸𑀢𑀺 𑀧𑀼𑀩𑁆𑀩𑀡𑁆𑀳𑀓𑀸𑀮𑁂 𑀯𑀸 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂 𑀯𑀸 𑀲𑀸𑀬𑀦𑁆𑀳𑀓𑀸𑀮𑁂 𑀯𑀸. 𑀲𑀫𑀬𑀧𑀼𑀘𑁆𑀙𑀸𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀯𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀸. 𑀤𑀺𑀯𑀲𑀧𑀼𑀘𑁆𑀙𑀸𑀢𑀺 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀓𑀸𑀴𑁂 𑀯𑀸 𑀚𑀼𑀡𑁆𑀳𑁂 𑀯𑀸. 𑀉𑀢𑀼𑀧𑀼𑀘𑁆𑀙𑀸𑀢𑀺 𑀳𑁂𑀫𑀦𑁆𑀢𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀯𑀲𑁆𑀲𑁂 𑀯𑀸 [𑀯𑀲𑁆𑀲𑀸𑀦𑁂 𑀯𑀸 (𑀲𑀻.)].

𑁪𑁦𑁨. 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀞𑀸𑀦𑀧𑀼𑀘𑁆𑀙𑀸, 𑀪𑀽𑀫𑀺𑀧𑀼𑀘𑁆𑀙𑀸, 𑀑𑀓𑀸𑀲𑀧𑀼𑀘𑁆𑀙𑀸, 𑀧𑀤𑁂𑀲𑀧𑀼𑀘𑁆𑀙𑀸. 𑀞𑀸𑀦𑀧𑀼𑀘𑁆𑀙𑀸𑀢𑀺 𑀪𑀽𑀫𑀺𑀬𑀸 𑀯𑀸 𑀧𑀣𑀯𑀺𑀬𑀸 𑀯𑀸 𑀥𑀭𑀡𑀺𑀬𑀸 𑀯𑀸 𑀚𑀕𑀢𑀺𑀬𑀸 𑀯𑀸. 𑀪𑀽𑀫𑀺𑀧𑀼𑀘𑁆𑀙𑀸𑀢𑀺 𑀪𑀽𑀫𑀺𑀬𑀸 𑀯𑀸 𑀧𑀣𑀯𑀺𑀬𑀸 𑀯𑀸 𑀧𑀩𑁆𑀩𑀢𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀧𑀸𑀲𑀸𑀤𑁂 𑀯𑀸. 𑀑𑀓𑀸𑀲𑀧𑀼𑀘𑁆𑀙𑀸𑀢𑀺 𑀧𑀼𑀭𑀢𑁆𑀣𑀺𑀫𑁂 𑀯𑀸 𑀑𑀓𑀸𑀲𑁂 𑀧𑀘𑁆𑀙𑀺𑀫𑁂 𑀯𑀸 𑀑𑀓𑀸𑀲𑁂 𑀉𑀢𑁆𑀢𑀭𑁂 𑀯𑀸 𑀑𑀓𑀸𑀲𑁂 𑀤𑀓𑁆𑀔𑀺𑀡𑁂 𑀯𑀸 𑀑𑀓𑀸𑀲𑁂. 𑀧𑀤𑁂𑀲𑀧𑀼𑀘𑁆𑀙𑀸𑀢𑀺 𑀧𑀼𑀭𑀢𑁆𑀣𑀺𑀫𑁂 𑀯𑀸 𑀧𑀤𑁂𑀲𑁂 𑀧𑀘𑁆𑀙𑀺𑀫𑁂 𑀯𑀸 𑀧𑀤𑁂𑀲𑁂 𑀉𑀢𑁆𑀢𑀭𑁂 𑀯𑀸 𑀧𑀤𑁂𑀲𑁂 𑀤𑀓𑁆𑀔𑀺𑀡𑁂 𑀯𑀸 𑀧𑀤𑁂𑀲𑁂𑀢𑀺.

𑀫𑀳𑀸𑀲𑀗𑁆𑀕𑀸𑀫𑁄 𑀦𑀺𑀝𑁆𑀞𑀺𑀢𑁄.