𑀓𑀣𑀺𑀦𑀪𑁂𑀤𑁄

𑁧. 𑀓𑀣𑀺𑀦𑀅𑀢𑁆𑀣𑀢𑀸𑀤𑀺

𑁪𑁦𑁩. 𑀓𑀲𑁆𑀲 𑀓𑀣𑀺𑀦𑀁 [𑀓𑀞𑀺𑀦𑀁 (𑀲𑀻. 𑀲𑁆𑀬𑀸.)] 𑀅𑀦𑀢𑁆𑀣𑀢𑀁? 𑀓𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀁? 𑀓𑀺𑀦𑁆𑀢𑀺 𑀓𑀣𑀺𑀦𑀁 𑀅𑀦𑀢𑁆𑀣𑀢𑀁? 𑀓𑀺𑀦𑁆𑀢𑀺 𑀓𑀣𑀺𑀦𑀁 𑀅𑀢𑁆𑀣𑀢𑀁?

𑀓𑀲𑁆𑀲 𑀓𑀣𑀺𑀦𑀁 𑀅𑀦𑀢𑁆𑀣𑀢𑀦𑁆𑀢𑀺? 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑁋 𑀅𑀦𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀦𑀼𑀫𑁄𑀤𑀓𑀲𑁆𑀲 𑀘. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑀓𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀦𑁆𑀢𑀺? 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑁋 𑀅𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀼𑀫𑁄𑀤𑀓𑀲𑁆𑀲 𑀘. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑀓𑀺𑀦𑁆𑀢𑀺 𑀓𑀣𑀺𑀦𑀁 𑀅𑀦𑀢𑁆𑀣𑀢𑀦𑁆𑀢𑀺? 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀥𑁄𑀯𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀘𑀻𑀯𑀭𑀯𑀺𑀘𑀸𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀙𑁂𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀩𑀦𑁆𑀥𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀝𑁆𑀝𑀺𑀬𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀡𑁆𑀟𑀼𑀲𑀓𑀭𑀡𑀫𑀢𑁆𑀢𑁂𑀦 [𑀦 𑀕𑀡𑁆𑀟𑀼𑀲𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀤𑀴𑁆𑀳𑀻𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀦𑀼𑀯𑀸𑀢𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀤𑁆𑀥𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 [𑀦 𑀑𑀯𑀝𑁆𑀝𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀲𑀻. 𑀲𑁆𑀬𑀸.), 𑀦 𑀑𑀯𑀤𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀫𑁆𑀩𑀮𑀫𑀤𑁆𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀫𑁆𑀫𑀸 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑀢𑀁 𑀘𑁂 𑀦𑀺𑀲𑁆𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺. 𑀏𑀯𑀫𑁆𑀧𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑁋 ‘‘𑀇𑀫𑀺𑀦𑀸 𑀤𑀼𑀲𑁆𑀲𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀲𑁆𑀲𑀸𑀫𑀻’’𑀢𑀺. 𑀧𑀭𑀺𑀓𑀣𑀸 𑀦𑀸𑀫 𑀧𑀭𑀺𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀫𑀸𑀬 𑀧𑀭𑀺𑀓𑀣𑀸𑀬 𑀓𑀣𑀺𑀦𑀤𑀼𑀲𑁆𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺. 𑀓𑀼𑀓𑁆𑀓𑀼𑀓𑀢𑀁 𑀦𑀸𑀫 𑀅𑀦𑀸𑀤𑀺𑀬𑀤𑀸𑀦𑀁 𑀯𑀼𑀘𑁆𑀘𑀢𑀺. 𑀲𑀦𑁆𑀦𑀺𑀥𑀺 𑀦𑀸𑀫 𑀤𑁆𑀯𑁂 𑀲𑀦𑁆𑀦𑀺𑀥𑀺𑀬𑁄 𑁋 𑀓𑀭𑀡𑀲𑀦𑁆𑀦𑀺𑀥𑀺 𑀯𑀸 𑀦𑀺𑀘𑀬𑀲𑀦𑁆𑀦𑀺𑀥𑀺 𑀯𑀸. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦𑀸𑀫 𑀓𑀬𑀺𑀭𑀫𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀳𑀢𑀺 [𑀉𑀤𑁆𑀭𑀺𑀬𑀢𑀺 (𑀲𑀻. 𑀲𑁆𑀬𑀸.)]. 𑀇𑀫𑁂𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑀓𑀺𑀦𑁆𑀢𑀺 𑀓𑀣𑀺𑀦𑀁 𑀅𑀢𑁆𑀣𑀢𑀦𑁆𑀢𑀺? 𑀲𑀢𑁆𑀢𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀅𑀳𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀳𑀢𑀓𑀧𑁆𑀧𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀺𑀮𑁄𑀢𑀺𑀓𑀸𑀬 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀁𑀲𑀼𑀓𑀽𑀮𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀸𑀧𑀡𑀺𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀫𑁆𑀫𑀸 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀢𑀁 𑀘𑁂 𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀇𑀫𑁂𑀳𑀺 𑀲𑀢𑁆𑀢𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑀲𑀳 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀸 𑀓𑀢𑀺 𑀥𑀫𑁆𑀫𑀸 𑀚𑀸𑀬𑀦𑁆𑀢𑀺? 𑀲𑀳 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀸 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀚𑀸𑀬𑀦𑁆𑀢𑀺 𑁋 𑀅𑀝𑁆𑀞 𑀫𑀸𑀢𑀺𑀓𑀸, 𑀤𑁆𑀯𑁂 𑀧𑀮𑀺𑀩𑁄𑀥𑀸, 𑀧𑀜𑁆𑀘𑀸𑀦𑀺𑀲𑀁𑀲𑀸. 𑀲𑀳 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀸 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀚𑀸𑀬𑀦𑁆𑀢𑀺.

𑁨. 𑀓𑀣𑀺𑀦𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺

𑁪𑁦𑁪. 𑀧𑀬𑁄𑀕𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄? 𑀧𑀼𑀩𑁆𑀩𑀓𑀭𑀡𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸… 𑀅𑀥𑀺𑀝𑁆𑀞𑀸𑀦𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸… 𑀅𑀢𑁆𑀣𑀸𑀭𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸… 𑀫𑀸𑀢𑀺𑀓𑀸𑀦𑀜𑁆𑀘 𑀧𑀮𑀺𑀩𑁄𑀥𑀸𑀦𑀜𑁆𑀘 𑀓𑀢𑀫𑁂 𑀥𑀫𑁆𑀫𑀸… 𑀯𑀢𑁆𑀣𑀼𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄?

𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀬𑁄𑀕𑁄 𑀧𑀼𑀩𑁆𑀩𑀓𑀭𑀡𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀧𑀼𑀩𑁆𑀩𑀓𑀭𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀼𑀩𑁆𑀩𑀓𑀭𑀡𑀁 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀧𑀼𑀩𑁆𑀩𑀓𑀭𑀡𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀅𑀥𑀺𑀝𑁆𑀞𑀸𑀦𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀢𑁆𑀣𑀸𑀭𑁄 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀥𑀺𑀝𑁆𑀞𑀸𑀦𑀁 𑀅𑀢𑁆𑀣𑀸𑀭𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀢𑁆𑀣𑀸𑀭𑁄 𑀅𑀥𑀺𑀝𑁆𑀞𑀸𑀦𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘 𑀅𑀢𑁆𑀣𑀸𑀭𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀢𑁆𑀣𑀸𑀭𑁄 𑀫𑀸𑀢𑀺𑀓𑀸𑀦𑀜𑁆𑀘 𑀧𑀮𑀺𑀩𑁄𑀥𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘 𑀅𑀢𑁆𑀣𑀸𑀭𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀲𑀸 𑀘 𑀅𑀦𑀸𑀲𑀸 𑀘 𑀯𑀢𑁆𑀣𑀼𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀆𑀲𑀸𑀦𑀜𑁆𑀘 𑀅𑀦𑀸𑀲𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀲𑀸 𑀘 𑀅𑀦𑀸𑀲𑀸 𑀘 𑀯𑀢𑁆𑀣𑀼𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.

𑁩. 𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀺𑀪𑀸𑀕𑁄

𑁪𑁦𑁫. 𑀧𑀼𑀩𑁆𑀩𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀧𑀘𑁆𑀘𑀼𑀤𑁆𑀥𑀸𑀭𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀅𑀥𑀺𑀝𑁆𑀞𑀸𑀦𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀅𑀢𑁆𑀣𑀸𑀭𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸 𑀓𑀺𑀁𑀲𑀫𑀼𑀝𑁆𑀞𑀸𑀦𑀸? 𑀆𑀲𑀸 𑀘 𑀅𑀦𑀸𑀲𑀸 𑀘 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸, 𑀓𑀺𑀁𑀲𑀫𑀼𑀝𑁆𑀞𑀸𑀦𑀸?

𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀦𑀺𑀤𑀸𑀦𑀁, 𑀧𑀬𑁄𑀕𑀲𑀫𑀼𑀤𑀬𑀁, 𑀧𑀬𑁄𑀕𑀚𑀸𑀢𑀺𑀓𑀁, 𑀧𑀬𑁄𑀕𑀧𑀪𑀯𑀁, 𑀧𑀬𑁄𑀕𑀲𑀫𑁆𑀪𑀸𑀭𑀁, 𑀧𑀬𑁄𑀕𑀲𑀫𑀼𑀝𑁆𑀞𑀸𑀦𑀁. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑁄, 𑀧𑀼𑀩𑁆𑀩𑀓𑀭𑀡𑀲𑀫𑀼𑀤𑀬𑁄, 𑀧𑀼𑀩𑁆𑀩𑀓𑀭𑀡𑀚𑀸𑀢𑀺𑀓𑁄, 𑀧𑀼𑀩𑁆𑀩𑀓𑀭𑀡𑀧𑀪𑀯𑁄, 𑀧𑀼𑀩𑁆𑀩𑀓𑀭𑀡𑀲𑀫𑁆𑀪𑀸𑀭𑁄, 𑀧𑀼𑀩𑁆𑀩𑀓𑀭𑀡𑀲𑀫𑀼𑀝𑁆𑀞𑀸𑀦𑁄. 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀸𑀭𑀦𑀺𑀤𑀸𑀦𑀁, 𑀧𑀘𑁆𑀘𑀼𑀤𑁆𑀥𑀸𑀭𑀲𑀫𑀼𑀤𑀬𑀁, 𑀧𑀘𑁆𑀘𑀼𑀤𑁆𑀥𑀸𑀭𑀚𑀸𑀢𑀺𑀓𑀁, 𑀧𑀘𑁆𑀘𑀼𑀤𑁆𑀥𑀸𑀭𑀧𑀪𑀯𑀁, 𑀧𑀘𑁆𑀘𑀼𑀤𑁆𑀥𑀸𑀭𑀲𑀫𑁆𑀪𑀸𑀭𑀁, 𑀧𑀘𑁆𑀘𑀼𑀤𑁆𑀥𑀸𑀭𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀸𑀭𑁄 𑀅𑀥𑀺𑀝𑁆𑀞𑀸𑀦𑀦𑀺𑀤𑀸𑀦𑁄, 𑀅𑀥𑀺𑀝𑁆𑀞𑀸𑀦𑀲𑀫𑀼𑀤𑀬𑁄, 𑀅𑀥𑀺𑀝𑁆𑀞𑀸𑀦𑀚𑀸𑀢𑀺𑀓𑁄, 𑀅𑀥𑀺𑀝𑁆𑀞𑀸𑀦𑀧𑀪𑀯𑁄, 𑀅𑀥𑀺𑀝𑁆𑀞𑀸𑀦𑀲𑀫𑁆𑀪𑀸𑀭𑁄, 𑀅𑀥𑀺𑀝𑁆𑀞𑀸𑀦𑀲𑀫𑀼𑀝𑁆𑀞𑀸𑀦𑁄. 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘 𑀅𑀢𑁆𑀣𑀸𑀭𑀦𑀺𑀤𑀸𑀦𑀸, 𑀅𑀢𑁆𑀣𑀸𑀭𑀲𑀫𑀼𑀤𑀬𑀸, 𑀅𑀢𑁆𑀣𑀸𑀭𑀚𑀸𑀢𑀺𑀓𑀸, 𑀅𑀢𑁆𑀣𑀸𑀭𑀧𑀪𑀯𑀸, 𑀅𑀢𑁆𑀣𑀸𑀭𑀲𑀫𑁆𑀪𑀸𑀭𑀸, 𑀅𑀢𑁆𑀣𑀸𑀭𑀲𑀫𑀼𑀝𑁆𑀞𑀸𑀦𑀸. 𑀆𑀲𑀸 𑀘 𑀅𑀦𑀸𑀲𑀸 𑀘 𑀯𑀢𑁆𑀣𑀼𑀦𑀺𑀤𑀸𑀦𑀸, 𑀯𑀢𑁆𑀣𑀼𑀲𑀫𑀼𑀤𑀬𑀸, 𑀯𑀢𑁆𑀣𑀼𑀚𑀸𑀢𑀺𑀓𑀸, 𑀯𑀢𑁆𑀣𑀼𑀧𑀪𑀯𑀸, 𑀯𑀢𑁆𑀣𑀼𑀲𑀫𑁆𑀪𑀸𑀭𑀸, 𑀯𑀢𑁆𑀣𑀼𑀲𑀫𑀼𑀝𑁆𑀞𑀸𑀦𑀸.

𑁪𑁦𑁬. 𑀧𑀬𑁄𑀕𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄, 𑀧𑀼𑀩𑁆𑀩𑀓𑀭𑀡𑀁…𑀧𑁂… 𑀧𑀘𑁆𑀘𑀼𑀤𑁆𑀥𑀸𑀭𑁄… 𑀅𑀥𑀺𑀝𑁆𑀞𑀸𑀦𑀁… 𑀅𑀢𑁆𑀣𑀸𑀭𑁄… 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘… 𑀯𑀢𑁆𑀣𑀼… 𑀆𑀲𑀸 𑀘 𑀅𑀦𑀸𑀲𑀸 𑀘 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸, 𑀓𑀺𑀁𑀲𑀫𑀼𑀝𑁆𑀞𑀸𑀦𑀸?

𑀧𑀬𑁄𑀕𑁄 𑀳𑁂𑀢𑀼𑀦𑀺𑀤𑀸𑀦𑁄, 𑀳𑁂𑀢𑀼𑀲𑀫𑀼𑀤𑀬𑁄, 𑀳𑁂𑀢𑀼𑀚𑀸𑀢𑀺𑀓𑁄, 𑀳𑁂𑀢𑀼𑀧𑀪𑀯𑁄, 𑀳𑁂𑀢𑀼𑀲𑀫𑁆𑀪𑀸𑀭𑁄, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑁄. 𑀧𑀼𑀩𑁆𑀩𑀓𑀭𑀡𑀁…𑀧𑁂… 𑀧𑀘𑁆𑀘𑀼𑀤𑁆𑀥𑀸𑀭𑁄… 𑀅𑀥𑀺𑀝𑁆𑀞𑀸𑀦𑀁… 𑀅𑀢𑁆𑀣𑀸𑀭𑁄 … 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘… 𑀯𑀢𑁆𑀣𑀼… 𑀆𑀲𑀸 𑀘 𑀅𑀦𑀸𑀲𑀸 𑀘 𑀳𑁂𑀢𑀼𑀦𑀺𑀤𑀸𑀦𑀸, 𑀳𑁂𑀢𑀼𑀲𑀫𑀼𑀤𑀬𑀸, 𑀳𑁂𑀢𑀼𑀚𑀸𑀢𑀺𑀓𑀸, 𑀳𑁂𑀢𑀼𑀧𑀪𑀯𑀸, 𑀳𑁂𑀢𑀼𑀲𑀫𑁆𑀪𑀸𑀭𑀸, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸.

𑁪𑁦𑁭. 𑀧𑀬𑁄𑀕𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀧𑀼𑀩𑁆𑀩𑀓𑀭𑀡𑀁…𑀧𑁂… 𑀧𑀘𑁆𑀘𑀼𑀤𑁆𑀥𑀸𑀭𑁄… 𑀅𑀥𑀺𑀝𑁆𑀞𑀸𑀦𑀁… 𑀅𑀢𑁆𑀣𑀸𑀭𑁄… 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘… 𑀯𑀢𑁆𑀣𑀼… 𑀆𑀲𑀸 𑀘 𑀅𑀦𑀸𑀲𑀸 𑀘 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸, 𑀓𑀺𑀁𑀲𑀫𑀼𑀝𑁆𑀞𑀸𑀦𑀸?

𑀧𑀬𑁄𑀕𑁄 𑀧𑀘𑁆𑀘𑀬𑀦𑀺𑀤𑀸𑀦𑁄, 𑀧𑀘𑁆𑀘𑀬𑀲𑀫𑀼𑀤𑀬𑁄, 𑀧𑀘𑁆𑀘𑀬𑀚𑀸𑀢𑀺𑀓𑁄, 𑀧𑀘𑁆𑀘𑀬𑀧𑀪𑀯𑁄, 𑀧𑀘𑁆𑀘𑀬𑀲𑀫𑁆𑀪𑀸𑀭𑁄, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄. 𑀧𑀼𑀩𑁆𑀩𑀓𑀭𑀡𑀁…𑀧𑁂… 𑀧𑀘𑁆𑀘𑀼𑀤𑁆𑀥𑀸𑀭𑁄… 𑀅𑀥𑀺𑀝𑁆𑀞𑀸𑀦𑀁… 𑀅𑀢𑁆𑀣𑀸𑀭𑁄… 𑀫𑀸𑀢𑀺𑀓𑀸 𑀘 𑀧𑀮𑀺𑀩𑁄𑀥𑀸 𑀘… 𑀯𑀢𑁆𑀣𑀼… 𑀆𑀲𑀸 𑀘 𑀅𑀦𑀸𑀲𑀸 𑀘 𑀧𑀘𑁆𑀘𑀬𑀦𑀺𑀤𑀸𑀦𑀸, 𑀧𑀘𑁆𑀘𑀬𑀲𑀫𑀼𑀤𑀬𑀸, 𑀧𑀘𑁆𑀘𑀬𑀚𑀸𑀢𑀺𑀓𑀸, 𑀧𑀘𑁆𑀘𑀬𑀧𑀪𑀯𑀸, 𑀧𑀘𑁆𑀘𑀬𑀲𑀫𑁆𑀪𑀸𑀭𑀸, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸.

𑁪𑁦𑁮. 𑀧𑀼𑀩𑁆𑀩𑀓𑀭𑀡𑀁 𑀓𑀢𑀺𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁? 𑀧𑀼𑀩𑁆𑀩𑀓𑀭𑀡𑀁 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀥𑁄𑀯𑀦𑁂𑀦, 𑀯𑀺𑀘𑀸𑀭𑀡𑁂𑀦, 𑀙𑁂𑀤𑀦𑁂𑀦, 𑀩𑀦𑁆𑀥𑀦𑁂𑀦, 𑀲𑀺𑀩𑁆𑀩𑀦𑁂𑀦, 𑀭𑀚𑀦𑁂𑀦, 𑀓𑀧𑁆𑀧𑀓𑀭𑀡𑁂𑀦 𑁋 𑀧𑀼𑀩𑁆𑀩𑀓𑀭𑀡𑀁 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁.

𑀧𑀘𑁆𑀘𑀼𑀤𑁆𑀥𑀸𑀭𑁄 𑀓𑀢𑀺𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄? 𑀧𑀘𑁆𑀘𑀼𑀤𑁆𑀥𑀸𑀭𑁄 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄 𑁋 𑀲𑀗𑁆𑀖𑀸𑀝𑀺𑀬𑀸, 𑀉𑀢𑁆𑀢𑀭𑀸𑀲𑀗𑁆𑀕𑁂𑀦, 𑀅𑀦𑁆𑀢𑀭𑀯𑀸𑀲𑀓𑁂𑀦.

𑀅𑀥𑀺𑀝𑁆𑀞𑀸𑀦𑀁 𑀓𑀢𑀺𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁? 𑀅𑀥𑀺𑀝𑁆𑀞𑀸𑀦𑀁 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁 𑁋 𑀲𑀗𑁆𑀖𑀸𑀝𑀺𑀬𑀸, 𑀉𑀢𑁆𑀢𑀭𑀸𑀲𑀗𑁆𑀕𑁂𑀦, 𑀅𑀦𑁆𑀢𑀭𑀯𑀸𑀲𑀓𑁂𑀦.

𑀅𑀢𑁆𑀣𑀸𑀭𑁄 𑀓𑀢𑀺𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄? 𑀅𑀢𑁆𑀣𑀸𑀭𑁄 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑁄 𑁋 𑀯𑀘𑀻𑀪𑁂𑀤𑁂𑀦.

𑀓𑀣𑀺𑀦𑀲𑁆𑀲 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀯𑀢𑁆𑀣𑀽𑀦𑀺, 𑀓𑀢𑀺 𑀪𑀽𑀫𑀺𑀬𑁄? 𑀓𑀣𑀺𑀦𑀲𑁆𑀲 𑀏𑀓𑀁 𑀫𑀽𑀮𑀁 𑁋 𑀲𑀗𑁆𑀖𑁄; 𑀢𑀻𑀡𑀺 𑀯𑀢𑁆𑀣𑀽𑀦𑀺 𑁋 𑀲𑀗𑁆𑀖𑀸𑀝𑀺, 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀅𑀦𑁆𑀢𑀭𑀯𑀸𑀲𑀓𑁄, 𑀙 𑀪𑀽𑀫𑀺𑀬𑁄 𑁋 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀁.

𑀓𑀣𑀺𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀓𑀣𑀺𑀦𑀲𑁆𑀲 𑀧𑀼𑀩𑁆𑀩𑀓𑀭𑀡𑀁 𑀆𑀤𑀺, 𑀓𑁆𑀭𑀺𑀬𑀸 𑀫𑀚𑁆𑀛𑁂, 𑀅𑀢𑁆𑀣𑀸𑀭𑁄 𑀧𑀭𑀺𑀬𑁄𑀲𑀸𑀦𑀁.

𑁪𑁦𑁯. 𑀓𑀢𑀺𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁? 𑀓𑀢𑀺𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁? 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁? 𑀧𑀼𑀩𑁆𑀩𑀓𑀭𑀡𑀁 𑀦 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀺, 𑀅𑀢𑁆𑀣𑀸𑀭𑀁 𑀦 𑀚𑀸𑀦𑀸𑀢𑀺, 𑀫𑀸𑀢𑀺𑀓𑀁 𑀦 𑀚𑀸𑀦𑀸𑀢𑀺, 𑀧𑀮𑀺𑀩𑁄𑀥𑀁 𑀦 𑀚𑀸𑀦𑀸𑀢𑀺, 𑀉𑀤𑁆𑀥𑀸𑀭𑀁 𑀦 𑀚𑀸𑀦𑀸𑀢𑀺, 𑀆𑀦𑀺𑀲𑀁𑀲𑀁 𑀦 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁? 𑀧𑀼𑀩𑁆𑀩𑀓𑀭𑀡𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀅𑀢𑁆𑀣𑀸𑀭𑀁 𑀚𑀸𑀦𑀸𑀢𑀺, 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀧𑀮𑀺𑀩𑁄𑀥𑀁 𑀚𑀸𑀦𑀸𑀢𑀺, 𑀉𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀆𑀦𑀺𑀲𑀁𑀲𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁.

𑁪𑁧𑁦. 𑀓𑀢𑀺𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺? 𑀓𑀢𑀺𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺? 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺. 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺? 𑀦𑀺𑀲𑁆𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀅𑀦𑀼𑀫𑁄𑀤𑁂𑀦𑁆𑀢𑁄 𑀦 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀯𑀸𑀘𑀁 𑀪𑀺𑀦𑁆𑀤𑀦𑁆𑀢𑁄 𑀦 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀺 𑁋 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺? 𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀅𑀦𑀼𑀫𑁄𑀤𑁂𑀦𑁆𑀢𑁄 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀯𑀸𑀘𑀁 𑀪𑀺𑀦𑁆𑀤𑀦𑁆𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀺 𑁋 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺.

𑁪𑁧𑁧. 𑀓𑀢𑀺 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺? 𑀓𑀢𑀺 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺? 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺. 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺. 𑀓𑀢𑀫𑁂 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺? 𑀯𑀢𑁆𑀣𑀼𑀯𑀺𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺, 𑀓𑀸𑀮𑀯𑀺𑀧𑀦𑁆𑀦𑀜𑁆𑀘, 𑀓𑀭𑀡𑀯𑀺𑀧𑀦𑁆𑀦𑀜𑁆𑀘 𑁋 𑀇𑀫𑁂 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀦 𑀭𑀼𑀳𑀦𑁆𑀢𑀺. 𑀓𑀢𑀫𑁂 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺? 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺, 𑀓𑀸𑀮𑀲𑀫𑁆𑀧𑀦𑁆𑀦𑀜𑁆𑀘, 𑀓𑀭𑀡𑀲𑀫𑁆𑀧𑀦𑁆𑀦𑀜𑁆𑀘 𑁋 𑀇𑀫𑁂 𑀢𑀬𑁄 𑀓𑀣𑀺𑀦𑀢𑁆𑀣𑀸𑀭𑀸 𑀭𑀼𑀳𑀦𑁆𑀢𑀺.

𑁪. 𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑁄

𑁪𑁧𑁨. 𑀓𑀣𑀺𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀣𑀺𑀦𑀢𑁆𑀣𑀸𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀲𑀫𑁆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀭𑀺𑀓𑀣𑀸 𑀚𑀸𑀦𑀺𑀢𑀩𑁆𑀩𑀸, 𑀓𑀼𑀓𑁆𑀓𑀼𑀓𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀲𑀦𑁆𑀦𑀺𑀥𑀺 𑀚𑀸𑀦𑀺𑀢𑀩𑁆𑀩𑀸, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀚𑀸𑀦𑀺𑀢𑀩𑁆𑀩𑀁.

𑀓𑀣𑀺𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀲𑀫𑀯𑀸𑀬𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄 𑀬𑀤𑀺𑀤𑀁 𑀓𑀣𑀺𑀦𑀦𑁆𑀢𑀺.

𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄.

𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀯𑀺𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸.

𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀲𑀫𑁆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀲𑀢𑁆𑀢𑀭𑀲𑀳𑀺 𑀆𑀓𑀸𑀭𑁂𑀳𑀺 𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀲𑀫𑁆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑀇𑀫𑀺𑀦𑀸 𑀤𑀼𑀲𑁆𑀲𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀲𑁆𑀲𑀸𑀫𑀻𑀢𑀺.

𑀧𑀭𑀺𑀓𑀣𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀧𑀭𑀺𑀓𑀣𑀁 𑀓𑀭𑁄𑀢𑀺 𑀇𑀫𑀸𑀬 𑀧𑀭𑀺𑀓𑀣𑀸𑀬 𑀓𑀣𑀺𑀦𑀤𑀼𑀲𑁆𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻𑀢𑀺.

𑀓𑀼𑀓𑁆𑀓𑀼𑀓𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀦𑀸𑀤𑀺𑀬𑀤𑀸𑀦𑀁 𑀚𑀸𑀦𑀺𑀢𑀩𑁆𑀩𑀁.

𑀲𑀦𑁆𑀦𑀺𑀥𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀤𑁆𑀯𑁂 𑀲𑀦𑁆𑀦𑀺𑀥𑀺𑀬𑁄 𑀚𑀸𑀦𑀺𑀢𑀩𑁆𑀩𑀸 𑁋 𑀓𑀭𑀡𑀲𑀦𑁆𑀦𑀺𑀥𑀺 𑀯𑀸 𑀦𑀺𑀘𑀬𑀲𑀦𑁆𑀦𑀺𑀥𑀺 𑀯𑀸.

𑀦𑀺𑀲𑁆𑀲𑀕𑁆𑀕𑀺𑀬𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀓𑀭𑀺𑀬𑀫𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀳𑀢𑀺.

𑀓𑀣𑀺𑀦𑀢𑁆𑀣𑀸𑀭𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀲𑀘𑁂 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀢𑁆𑀣𑀸𑀭𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀦𑀼𑀫𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁪𑁧𑁩. 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀩𑁆𑀩𑀁, 𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀢𑀤𑀳𑁂𑀯 𑀥𑁄𑀯𑀺𑀢𑁆𑀯𑀸 𑀯𑀺𑀫𑀚𑁆𑀚𑀺𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀲𑀘𑁂 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀺𑀓𑀸 𑀲𑀗𑁆𑀖𑀸𑀝𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀦𑀯𑀸 𑀲𑀗𑁆𑀖𑀸𑀝𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀓𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑁄, 𑀦𑀯𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀇𑀫𑀺𑀦𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀓𑁄 𑀅𑀦𑁆𑀢𑀭𑀯𑀸𑀲𑀓𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑁄, 𑀦𑀯𑁄 𑀅𑀦𑁆𑀢𑀭𑀯𑀸𑀲𑀓𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀇𑀫𑀺𑀦𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀣𑀸’’𑀢𑀺. 𑀢𑁂𑀳𑀺 𑀅𑀦𑀼𑀫𑁄𑀤𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀫𑀸’’𑀢𑀺. 𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀣𑀸’’𑀢𑀺. 𑀢𑁂𑀳𑀺 𑀅𑀦𑀼𑀫𑁄𑀤𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄 𑀅𑀦𑀼𑀫𑁄𑀤𑀸𑀫𑀸’’𑀢𑀺. 𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀳𑀻’’𑀢𑀺. 𑀢𑁂𑀦 𑀅𑀦𑀼𑀫𑁄𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀫𑀻’’𑀢𑀺.

𑁫. 𑀧𑀼𑀕𑁆𑀕𑀮𑀲𑁆𑀲𑁂𑀯𑀓𑀣𑀺𑀦𑀢𑁆𑀣𑀸𑀭𑁄

𑁪𑁧𑁪. 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀻𑀢𑀺. 𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀻𑀢𑀺. 𑀳𑀜𑁆𑀘𑀺 𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺. 𑀲𑀗𑁆𑀖𑀲𑁆𑀲 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀕𑀡𑀲𑁆𑀲 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀲𑀗𑁆𑀖𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺 𑀕𑀡𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺 𑀧𑀼𑀕𑁆𑀕𑀮𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀻𑀢𑀺 𑀦 𑀲𑀗𑁆𑀖𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀦 𑀕𑀡𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀧𑀼𑀕𑁆𑀕𑀮𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀻𑀢𑀺. 𑀳𑀜𑁆𑀘𑀺 𑀦 𑀲𑀗𑁆𑀖𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀦 𑀕𑀡𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀧𑀼𑀕𑁆𑀕𑀮𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺. 𑀲𑀗𑁆𑀖𑀲𑁆𑀲 𑀅𑀦𑀼𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀕𑀡𑀲𑁆𑀲 𑀅𑀦𑀼𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀬𑀸 𑀕𑀡𑀲𑁆𑀲 𑀲𑀸𑀫𑀕𑁆𑀕𑀺𑀬𑀸 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀸 𑀲𑀗𑁆𑀖𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀕𑀡𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀏𑀯𑀫𑁂𑀯 𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺. 𑀲𑀗𑁆𑀖𑀲𑁆𑀲 𑀅𑀦𑀼𑀫𑁄𑀤𑀦𑀸𑀬 𑀕𑀡𑀲𑁆𑀲 𑀅𑀦𑀼𑀫𑁄𑀤𑀦𑀸𑀬 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀲𑀗𑁆𑀖𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀕𑀡𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺.

𑁬. 𑀧𑀮𑀺𑀩𑁄𑀥𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀁

𑁪𑁧𑁫. 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀢𑀲𑁆𑀲 𑀲𑀳 𑀩𑀳𑀺𑀲𑀻𑀫𑀕𑀫𑀦𑀸, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀘𑀻𑀯𑀭𑁂 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀤𑁆𑀯𑁂 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀙𑀺𑀚𑁆𑀚𑀦𑁆𑀢𑀺.

𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀘𑀻𑀯𑀭𑁂 𑀦𑀝𑁆𑀞𑁂 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀢𑀲𑁆𑀲 𑀲𑀳 𑀲𑀯𑀦𑁂𑀦, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀘𑀻𑀯𑀭𑀸𑀲𑀸𑀬 𑀉𑀧𑀘𑁆𑀙𑀺𑀦𑁆𑀦𑀸𑀬 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺;

𑀢𑀲𑁆𑀲 𑀩𑀳𑀺𑀲𑀻𑀫𑁂 [𑀩𑀳𑀺𑀲𑀻𑀫𑀕𑀢𑀲𑁆𑀲 (𑀲𑀻. 𑀲𑁆𑀬𑀸.)] 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀲𑀳𑀼𑀩𑁆𑀪𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 [𑀲𑀉𑀩𑁆𑀪𑀸𑀭𑁄 (𑀓.)], 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀧𑀼𑀘𑁆𑀙𑀸𑀫𑀺, 𑀓𑀢𑀫𑁄 𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺.

𑀲𑀳𑀼𑀩𑁆𑀪𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀯𑀼𑀢𑁆𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀏𑀢𑀜𑁆𑀘 𑀢𑀸𑀳𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀤𑁆𑀯𑁂 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀙𑀺𑀚𑁆𑀚𑀦𑁆𑀢𑀻𑀢𑀺.

𑁪𑁧𑁬. 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀲𑀗𑁆𑀖𑀸𑀥𑀻𑀦𑀸? 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀧𑀼𑀕𑁆𑀕𑀮𑀸𑀥𑀻𑀦𑀸? 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀦𑁂𑀯 𑀲𑀗𑁆𑀖𑀸𑀥𑀻𑀦𑀸 𑀦 𑀧𑀼𑀕𑁆𑀕𑀮𑀸𑀥𑀻𑀦𑀸? 𑀏𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀲𑀗𑁆𑀖𑀸𑀥𑀻𑀦𑁄 𑁋 𑀅𑀦𑁆𑀢𑀭𑀼𑀩𑁆𑀪𑀸𑀭𑁄. 𑀘𑀢𑁆𑀢𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑀸 𑀧𑀼𑀕𑁆𑀕𑀮𑀸𑀥𑀻𑀦𑀸 𑁋 𑀧𑀓𑁆𑀓𑀫𑀦𑀦𑁆𑀢𑀺𑀓𑁄, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄, 𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑁄. 𑀘𑀢𑁆𑀢𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑀸 𑀦𑁂𑀯 𑀲𑀗𑁆𑀖𑀸𑀥𑀻𑀦𑀸 𑀦 𑀧𑀼𑀕𑁆𑀕𑀮𑀸𑀥𑀻𑀦𑀸 𑁋 𑀦𑀸𑀲𑀦𑀦𑁆𑀢𑀺𑀓𑁄, 𑀲𑀯𑀦𑀦𑁆𑀢𑀺𑀓𑁄, 𑀆𑀲𑀸𑀯𑀘𑁆𑀙𑁂𑀤𑀺𑀓𑁄, 𑀲𑀳𑀼𑀩𑁆𑀪𑀸𑀭𑁄. 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺? 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺? 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀲𑀺𑀬𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺 𑀲𑀺𑀬𑀸 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺? 𑀤𑁆𑀯𑁂 𑀓𑀣𑀺𑀦𑀼𑀤𑁆𑀥𑀸𑀭𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺 𑁋 𑀅𑀦𑁆𑀢𑀭𑀼𑀩𑁆𑀪𑀸𑀭𑁄, 𑀲𑀳𑀼𑀩𑁆𑀪𑀸𑀭𑁄. 𑀢𑀬𑁄 𑀓𑀣𑀺𑀦𑀼𑀤𑁆𑀥𑀸𑀭𑀸 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺 𑁋 𑀧𑀓𑁆𑀓𑀫𑀦𑀦𑁆𑀢𑀺𑀓𑁄, 𑀲𑀯𑀦𑀦𑁆𑀢𑀺𑀓𑁄, 𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑁄. 𑀘𑀢𑁆𑀢𑀸𑀭𑁄 𑀓𑀣𑀺𑀦𑀼𑀤𑁆𑀥𑀸𑀭𑀸 𑀲𑀺𑀬𑀸 𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺 𑀲𑀺𑀬𑀸 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀺𑀬𑁆𑀬𑀦𑁆𑀢𑀺 𑁋 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄, 𑀦𑀸𑀲𑀦𑀦𑁆𑀢𑀺𑀓𑁄, 𑀆𑀲𑀸𑀯𑀘𑁆𑀙𑁂𑀤𑀺𑀓𑁄.

𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸? 𑀓𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀏𑀓𑀼𑀧𑁆𑀧𑀸𑀤𑀸 𑀦𑀸𑀦𑀸𑀦𑀺𑀭𑁄𑀥𑀸? 𑀤𑁆𑀯𑁂 𑀓𑀣𑀺𑀦𑀼𑀤𑁆𑀥𑀸𑀭𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑁋 𑀅𑀦𑁆𑀢𑀭𑀼𑀩𑁆𑀪𑀸𑀭𑁄, 𑀲𑀳𑀼𑀩𑁆𑀪𑀸𑀭𑁄. 𑀅𑀯𑀲𑁂𑀲𑀸 𑀓𑀣𑀺𑀦𑀼𑀤𑁆𑀥𑀸𑀭𑀸 𑀏𑀓𑀼𑀧𑁆𑀧𑀸𑀤𑀸 𑀦𑀸𑀦𑀸𑀦𑀺𑀭𑁄𑀥𑀸𑀢𑀺.

𑀓𑀣𑀺𑀦𑀪𑁂𑀤𑁄 𑀦𑀺𑀝𑁆𑀞𑀺𑀢𑁄.