𑁧. 𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑀧𑀝𑀺𑀧𑀢𑁆𑀢𑀺

𑁩𑁬𑁫. [𑀧𑀭𑀺. 𑁪𑁨𑁧] 𑀲𑀗𑁆𑀕𑀸𑀫𑀸𑀯𑀘𑀭𑁂 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀦𑀻𑀘𑀘𑀺𑀢𑁆𑀢𑁂𑀦 𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀭𑀚𑁄𑀳𑀭𑀡𑀲𑀫𑁂𑀦 𑀘𑀺𑀢𑁆𑀢𑁂𑀦; 𑀆𑀲𑀦𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁 𑀦𑀺𑀲𑀚𑁆𑀚𑀓𑀼𑀲𑀮𑁂𑀦; 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀦𑁆𑀢𑁂𑀦, 𑀦𑀯𑁂 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦, 𑀬𑀣𑀸𑀧𑀢𑀺𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀅𑀦𑀸𑀦𑀸𑀓𑀣𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁂𑀦; 𑀲𑀸𑀫𑀁 𑀯𑀸 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄 𑀧𑀭𑁄 𑀯𑀸 𑀅𑀚𑁆𑀛𑁂𑀲𑀺𑀢𑀩𑁆𑀩𑁄 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑁄.

𑀲𑀗𑁆𑀖𑁂𑀦 𑀅𑀦𑀼𑀫𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀼𑀓𑀸𑀫𑁂𑀦 𑀦 𑀉𑀧𑀚𑁆𑀛𑀸𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀆𑀘𑀭𑀺𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀫𑀸𑀦𑀸𑀘𑀭𑀺𑀬𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀚𑀸𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀦 𑀦𑀸𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀕𑁄𑀢𑁆𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀆𑀕𑀫𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀓𑀼𑀮𑀧𑀤𑁂𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀚𑀸𑀢𑀺𑀪𑀽𑀫𑀺 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀢𑀁 𑀓𑀺𑀁 𑀓𑀸𑀭𑀡𑀸? 𑀅𑀢𑁆𑀭𑀲𑁆𑀲 𑀧𑁂𑀫𑀁 𑀯𑀸 𑀤𑁄𑀲𑁄 𑀯𑀸. 𑀧𑁂𑀫𑁂 𑀯𑀸 𑀲𑀢𑀺 𑀤𑁄𑀲𑁂 𑀯𑀸, 𑀙𑀦𑁆𑀤𑀸𑀧𑀺 𑀕𑀘𑁆𑀙𑁂𑀬𑁆𑀬 𑀤𑁄𑀲𑀸𑀧𑀺 𑀕𑀘𑁆𑀙𑁂𑀬𑁆𑀬 𑀫𑁄𑀳𑀸𑀧𑀺 𑀕𑀘𑁆𑀙𑁂𑀬𑁆𑀬 𑀪𑀬𑀸𑀧𑀺 𑀕𑀘𑁆𑀙𑁂𑀬𑁆𑀬.

𑀲𑀗𑁆𑀖𑁂𑀦 𑀅𑀦𑀼𑀫𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀼𑀓𑀸𑀫𑁂𑀦 𑀲𑀗𑁆𑀖𑀕𑀭𑀼𑀓𑁂𑀦 𑀪𑀯𑀺𑀢𑀩𑁆𑀩𑀁 𑀦𑁄 𑀧𑀼𑀕𑁆𑀕𑀮𑀕𑀭𑀼𑀓𑁂𑀦, 𑀲𑀤𑁆𑀥𑀫𑁆𑀫𑀕𑀭𑀼𑀓𑁂𑀦 𑀪𑀯𑀺𑀢𑀩𑁆𑀩𑀁 𑀦𑁄 𑀆𑀫𑀺𑀲𑀕𑀭𑀼𑀓𑁂𑀦, 𑀅𑀢𑁆𑀣𑀯𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀦𑁄 𑀧𑀭𑀺𑀲𑀓𑀧𑁆𑀧𑀺𑀓𑁂𑀦, 𑀓𑀸𑀮𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀸𑀘𑀺𑀢𑁆𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁 𑀦𑁄 𑀤𑁄𑀲𑀦𑁆𑀢𑀭𑁂𑀦, 𑀦 𑀉𑀧𑀓𑀡𑁆𑀡𑀓𑀚𑀧𑁆𑀧𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀚𑀺𑀫𑁆𑀳𑀁 𑀧𑁂𑀓𑁆𑀔𑀺𑀢𑀩𑁆𑀩𑀁, 𑀦 𑀅𑀓𑁆𑀔𑀺 𑀦𑀺𑀔𑀡𑀺𑀢𑀩𑁆𑀩𑀁, 𑀦 𑀪𑀫𑀼𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦 𑀳𑀢𑁆𑀣𑀯𑀺𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀦 𑀳𑀢𑁆𑀣𑀫𑀼𑀤𑁆𑀤𑀸 𑀤𑀲𑁆𑀲𑁂𑀢𑀩𑁆𑀩𑀸.

𑀆𑀲𑀦𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁 𑀦𑀺𑀲𑀚𑁆𑀚𑀓𑀼𑀲𑀮𑁂𑀦, 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀦𑁆𑀢𑁂𑀦 𑀅𑀢𑁆𑀣𑀁 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀘 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦 𑀯𑀻𑀢𑀺𑀳𑀸𑀢𑀩𑁆𑀩𑀁, 𑀦 𑀓𑀼𑀫𑁆𑀫𑀕𑁆𑀕𑁄 𑀲𑁂𑀯𑀺𑀢𑀩𑁆𑀩𑁄, 𑀦 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 [𑀦 𑀯𑀸𑀘𑀸 𑀯𑀺𑀓𑁆𑀔𑁂𑀧𑀓𑀁 (𑀲𑁆𑀬𑀸.)] 𑀪𑀡𑀺𑀢𑀩𑁆𑀩𑀁, 𑀅𑀢𑀼𑀭𑀺𑀢𑁂𑀦 𑀪𑀯𑀺𑀢𑀩𑁆𑀩𑀁 𑀅𑀲𑀸𑀳𑀲𑀺𑀓𑁂𑀦, 𑀅𑀘𑀡𑁆𑀟𑀺𑀓𑀢𑁂𑀦 𑀪𑀯𑀺𑀢𑀩𑁆𑀩𑀁 𑀯𑀘𑀦𑀓𑁆𑀔𑀫𑁂, 𑀫𑁂𑀢𑁆𑀢𑀸𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸, 𑀓𑀸𑀭𑀼𑀡𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀳𑀺𑀢𑀧𑀭𑀺𑀲𑀓𑁆𑀓𑀺𑀦𑀸, 𑀅𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑀸 𑀪𑀯𑀺𑀢𑀩𑁆𑀩𑀁 𑀧𑀭𑀺𑀬𑀦𑁆𑀢𑀪𑀸𑀡𑀺𑀦𑀸, 𑀅𑀯𑁂𑀭𑀯𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀅𑀦𑀲𑀼𑀭𑀼𑀢𑁆𑀢𑁂𑀦, 𑀅𑀢𑁆𑀢𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀧𑀭𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀅𑀥𑀫𑁆𑀫𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀥𑀫𑁆𑀫𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀯𑀼𑀢𑁆𑀢𑀁 𑀅𑀳𑀸𑀧𑁂𑀦𑁆𑀢𑁂𑀦 𑀅𑀯𑀼𑀢𑁆𑀢𑀁 𑀅𑀧𑀓𑀸𑀲𑁂𑀦𑁆𑀢𑁂𑀦 𑀑𑀢𑀺𑀡𑁆𑀡𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑁄 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀬𑀣𑀸 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄, 𑀫𑀦𑁆𑀤𑁄 𑀳𑀸𑀲𑁂𑀢𑀩𑁆𑀩𑁄 [𑀯𑁂𑀧𑁄 𑀧𑀳𑀸𑀲𑁂𑀢𑀩𑁆𑀩𑁄 (𑀲𑁆𑀬𑀸.)], 𑀪𑀻𑀭𑀽 𑀅𑀲𑁆𑀲𑀸𑀲𑁂𑀢𑀩𑁆𑀩𑁄, 𑀘𑀡𑁆𑀟𑁄 𑀦𑀺𑀲𑁂𑀥𑁂𑀢𑀩𑁆𑀩𑁄, 𑀅𑀲𑀼𑀘𑀺 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀉𑀚𑀼𑀫𑀤𑁆𑀤𑀯𑁂𑀦 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀦𑁆𑀢𑀩𑁆𑀩𑀁, 𑀦 𑀤𑁄𑀲𑀸𑀕𑀢𑀺𑀁 𑀕𑀦𑁆𑀢𑀩𑁆𑀩𑀁, 𑀦 𑀫𑁄𑀳𑀸𑀕𑀢𑀺𑀁 𑀕𑀦𑁆𑀢𑀩𑁆𑀩𑀁, 𑀦 𑀪𑀬𑀸𑀕𑀢𑀺𑀁 𑀕𑀦𑁆𑀢𑀩𑁆𑀩𑀁, 𑀫𑀚𑁆𑀛𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘. 𑀏𑀯𑀜𑁆𑀘 𑀧𑀦 𑀅𑀦𑀼𑀯𑀺𑀚𑁆𑀚𑀓𑁄 𑀅𑀦𑀼𑀯𑀺𑀚𑁆𑀚𑀫𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀸𑀲𑀦𑀓𑀭𑁄 𑀳𑁄𑀢𑀺, 𑀯𑀺𑀜𑁆𑀜𑀽𑀦𑀜𑁆𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘.

𑁩𑁬𑁬. 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬, 𑀑𑀧𑀫𑁆𑀫𑀁 𑀦𑀺𑀤𑀲𑁆𑀲𑀦𑀢𑁆𑀣𑀸𑀬, 𑀅𑀢𑁆𑀣𑁄 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬, 𑀧𑀝𑀺𑀧𑀼𑀘𑁆𑀙𑀸 𑀞𑀧𑀦𑀢𑁆𑀣𑀸𑀬, 𑀑𑀓𑀸𑀲𑀓𑀫𑁆𑀫𑀁 𑀘𑁄𑀤𑀦𑀢𑁆𑀣𑀸𑀬, 𑀘𑁄𑀤𑀦𑀸 𑀲𑀸𑀭𑀡𑀢𑁆𑀣𑀸𑀬, 𑀲𑀸𑀭𑀡𑀸 𑀲𑀯𑀘𑀦𑀻𑀬𑀢𑁆𑀣𑀸𑀬, 𑀲𑀯𑀘𑀦𑀻𑀬𑀁 𑀧𑀮𑀺𑀩𑁄𑀥𑀢𑁆𑀣𑀸𑀬, 𑀧𑀮𑀺𑀩𑁄𑀥𑁄 𑀯𑀺𑀦𑀺𑀘𑁆𑀙𑀬𑀢𑁆𑀣𑀸𑀬, 𑀯𑀺𑀦𑀺𑀘𑁆𑀙𑀬𑁄 𑀲𑀦𑁆𑀢𑀻𑀭𑀡𑀢𑁆𑀣𑀸𑀬, 𑀲𑀦𑁆𑀢𑀻𑀭𑀡𑀁 𑀞𑀸𑀦𑀸𑀞𑀸𑀦𑀕𑀫𑀦𑀢𑁆𑀣𑀸𑀬, 𑀞𑀸𑀦𑀸𑀞𑀸𑀦𑀕𑀫𑀦𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀢𑁆𑀣𑀸𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀧𑀕𑁆𑀕𑀳𑀢𑁆𑀣𑀸𑀬, 𑀲𑀗𑁆𑀖𑁄 𑀲𑀫𑁆𑀧𑀭𑀺𑀕𑁆𑀕𑀳𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀸𑀬, 𑀲𑀗𑁆𑀖𑁂𑀦 𑀅𑀦𑀼𑀫𑀢𑀸 𑀧𑀼𑀕𑁆𑀕𑀮𑀸 𑀧𑀘𑁆𑀘𑁂𑀓𑀝𑁆𑀞𑀸𑀬𑀺𑀦𑁄 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀬𑀺𑀦𑁄.

𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑀼𑀚𑁆𑀚𑀢𑁆𑀣𑀸𑀬, 𑀧𑀸𑀫𑀼𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸, 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸, 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁 𑁋 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺.

𑁩𑁬𑁭. 𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀺𑀲𑀸𑀫𑀬, 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸 𑀓𑀢𑀁;

𑀲𑀼𑀯𑀼𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀼𑀮𑁄𑀫𑀺𑀓𑀁, 𑀕𑀢𑀺𑀁 𑀦 𑀦𑀸𑀲𑁂𑀦𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑀁.

𑀯𑀢𑁆𑀣𑀼𑀁 𑀯𑀺𑀧𑀢𑁆𑀢𑀺𑀁 𑀆𑀧𑀢𑁆𑀢𑀺𑀁, 𑀦𑀺𑀤𑀸𑀦𑀁 𑀆𑀓𑀸𑀭𑀅𑀓𑁄𑀯𑀺𑀤𑁄;

𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀺, 𑀓𑀢𑀸𑀓𑀢𑀁 𑀲𑀫𑁂𑀦 𑀘.

𑀓𑀫𑁆𑀫𑀜𑁆𑀘 𑀅𑀥𑀺𑀓𑀭𑀡𑀜𑁆𑀘, 𑀲𑀫𑀣𑁂 𑀘𑀸𑀧𑀺 𑀅𑀓𑁄𑀯𑀺𑀤𑁄;

𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘, 𑀪𑀬𑀸 𑀫𑁄𑀳𑀸 𑀘 𑀕𑀘𑁆𑀙𑀢𑀺.

𑀦 𑀘 𑀲𑀜𑁆𑀜𑀢𑁆𑀢𑀺𑀓𑀼𑀲𑀮𑁄, 𑀦𑀺𑀚𑁆𑀛𑀢𑁆𑀢𑀺𑀬𑀸 𑀘 𑀅𑀓𑁄𑀯𑀺𑀤𑁄;

𑀮𑀤𑁆𑀥𑀧𑀓𑁆𑀔𑁄 𑀅𑀳𑀺𑀭𑀺𑀓𑁄, 𑀓𑀡𑁆𑀳𑀓𑀫𑁆𑀫𑁄 𑀅𑀦𑀸𑀤𑀭𑁄;

𑀲 𑀯𑁂 [𑀲𑀘𑁂 (𑀓.)] 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀅𑀧𑁆𑀧𑀝𑀺𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑀯𑀢𑁆𑀣𑀼𑀁 𑀯𑀺𑀧𑀢𑁆𑀢𑀺𑀁 𑀆𑀧𑀢𑁆𑀢𑀺𑀁, 𑀦𑀺𑀤𑀸𑀦𑀁 𑀆𑀓𑀸𑀭𑀓𑁄𑀯𑀺𑀤𑁄;

𑀧𑀼𑀩𑁆𑀩𑀸𑀧𑀭𑀜𑁆𑀘 𑀚𑀸𑀦𑀸𑀢𑀺, 𑀓𑀢𑀸𑀓𑀢𑀁 𑀲𑀫𑁂𑀦 𑀘.

𑀓𑀫𑁆𑀫𑀜𑁆𑀘 𑀅𑀥𑀺𑀓𑀭𑀡𑀜𑁆𑀘, 𑀲𑀫𑀣𑁂 𑀘𑀸𑀧𑀺 𑀓𑁄𑀯𑀺𑀤𑁄;

𑀅𑀭𑀢𑁆𑀢𑁄 𑀅𑀤𑀼𑀝𑁆𑀞𑁄 𑀅𑀫𑀽𑀴𑁆𑀳𑁄, 𑀪𑀬𑀸 𑀫𑁄𑀳𑀸 𑀦 𑀕𑀘𑁆𑀙𑀢𑀺.

𑀲𑀜𑁆𑀜𑀢𑁆𑀢𑀺𑀬𑀸 𑀘 𑀓𑀼𑀲𑀮𑁄, 𑀦𑀺𑀚𑁆𑀛𑀢𑁆𑀢𑀺𑀬𑀸 𑀘 𑀓𑁄𑀯𑀺𑀤𑁄;

𑀮𑀤𑁆𑀥𑀧𑀓𑁆𑀔𑁄 𑀳𑀺𑀭𑀺𑀫𑀦𑁄, 𑀲𑀼𑀓𑁆𑀓𑀓𑀫𑁆𑀫𑁄 𑀲𑀕𑀸𑀭𑀯𑁄;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀲𑀧𑁆𑀧𑀝𑀺𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀘𑀽𑀴𑀲𑀗𑁆𑀕𑀸𑀫𑁄 𑀦𑀺𑀝𑁆𑀞𑀺𑀢𑁄.